آشیق غافار ابراهیمی حیاتا گؤز یومدو

اینسانلارین کیم اولدوغون و نه اولدوغون، اونون یاشامی و حیاتدا گؤردوگو ایشلر ایله قضاوت ائتمک
ان دوغرو تثبیت اولار دئسک یانیلمامیشیق. آذربایجان مدنیتی تاریخی و آذربایجان عاشیق صنعتی تاریخی صفحه‌لرینده بیر چوخ عالی درجه‌ده صنعت اوستادلاری واردیر، آدلاری صنعت صفحه‌لریمیزین بزه‌گی اولان اوستادلار ایچره بلکه بارماق ساییسی قدر اوستاد واردیر کی سؤزون تام آنلامیندا متعهد اینسانلار اولموشلار، اوستاد «عاشیق قافار ابراهیمی» او دئدیگیمیز متعهد اینسانلاردان بیری‌دیر و عاشیق موسیقی‌سی و آذربایجان مدنیتی اوغروندا بیر عومور جانلا باشلا چالیشمیش و داها دوغروسو بو یولدا عومرونو قویموشدور.
آذربایجان عاشیق موسیقی‌سی اونونچون اویانیش فلسفه سیدیر، اوستاد مدنیتیمیزن دیرچه‌لیشی و جانلانماسی اوچون عاشیق موسیقی‌سی امکانلاریندان یارارلاناراق خلقی آیدینلاتماغا و اینسانی دیرلری یایماغا چالیشمیدیر.
اوستاد هر زامان وطنه و آذربایجانا اورکدن باغلی اولموشدور. اصلینده او آذربایجانا قلبینی وئردی و بلکه ده ان دوغروسو وطن اونون اوچون بویوک بیر عشق‌دیر، بو عشقی ایللر بویو قلبینده یاشاتدی و اینسانلارا وطن و اینسانلیغی اویرتمگه چالیشدی.
ایللر بویو شخصی امکانلاری ایله فرد اولاراق بیر جمعیت و انجمنین ایشین گؤردو، اونون یاندیردیغی اوجاغین ایستی‌سیندن و ایشیغیندان یوزلر نفر فایدالانیب بهره‌لندی…
اوستاد «عاشیق قافار ابراهیمی» گونش ایلی ۱۳۳۳-ده آذربایجانین گؤزل گوشه‌سی اولان قاراداغ بولگه‌سی‌نین مئشه پارا ماحالیندا دونیایا گؤز آچمیشدیر. چوخ گنج چاغلاریندان عاشیق صنعتی و موسیقی‌سی ایله ماراقلانیب بو صنعت ده فعالیته باشلامیشدیر.اوستادلاریندان «عاشیق رسول قربانی»، «عاشیق حسن غفاری» و «عاشیق علسگری» ساناماق اولار. حیاتی بویونجا بیر چوخ ادبی محفل‌لرده فعالیت گؤسترمیش و بعضی ادبی انجمن‌لرین ده مؤسس‌لریندن اولموشدور، اوستاد اوروپادا سوئد و سوئیس کیمی اولکه لرده عاشیق موسیقی‌میزی لاییقینجه تمثیل ائتمیشدیر، تورکیه ده و آذربایجان جمهوریتینده دفعه‌لرلن عاشیق سمپوزیوملاریندا اشتراک ائتمیشدیر.
باکی‌دا عاشیقلار بیرلیگی‌نین عضوو و ایراندا عاشیقلار ائوی‌نین عضوو و آغساققالی اولاراق مختلف استانلاردا سمینار و کنگره‌لرین اشتراکچی‌سی اولموشدور.
اوستاد ۲۵ کیتابین یازاری‌دیر و اونلاردان ساده‌جه ۴ دنه‌سی چاپ اولونوب و ایشیق اوزو گؤرموشدور. «ائل قوشمالاری»، «سئوگی مقدس‌دیر» و «داغلار منیم اولدو من ده داغلارین» کیتابلارین ساناماق اولار. اوستادین ادبی ارثی‌نین قورونوب ساخلانیلملسی دا عایله عضولری‌نین و شاگیردلری‌نین بورجو کیمی دورور و اینانیریق کی بو ایشی لاییقینجه یئره یئتیره‌جک‌لر…
سؤز یوخدور کی آذربایجان میللی مدنیتی اوغروندا فداکارجا چالیشان اوستاد «عاشیق قافار ابراهیمی» چکدیگی زحمتلردن دولایی تقدیره لایقدیر، امید ائدیریک خالقیمیز اونون مراسیم لرین اونا لاییق کئچیره‌رک اونا اولان بورجوموزو اؤده‌مه‌یه چالیشسین/قیزیل قلم.
شعردن نمونه:
« یازاردیم »
یارادان وئـرســئیدی مــنه اخـتیار
دونـیانی بـاش‌باشـا الوان یـازاردیم
قویمازدیم بیر گولون رنگی سارالسین
هـرگتوله بـیر دنـه باغبان یازاردیم
***
شیطانی توتاردیم قارنین سؤکردیم
اختلاف بوخجاسین بیر یول بوکردیم
تـامـام مـسلـک‌لـره قـلم چـکردیم
بیر باشدان هامینی اینسان یازاردیم
***
گــؤزل قـسمت‌لـری بـوتون بشره
هئچده فرق ائتمزدی آغ ایله قره
اوزو آغ گـلردی هـامی مـحشره
عدالت قوراردیم میزان یازاردیم
***
خـیانت ائتمزدی دوست دوستونا
بـشر گـئیینمزدی گونده یوز دونا
شـادلـیقلا عمرونو ووراردی سونا
بیر-بیره مهریبان مهمان یازاردیم
***
اینـسانـلار آتاردی فقرین داشینی
اوجـالداردی ائللر ایچره باشـینی
آخیـتمازدیـم یئتیمین گؤز یاشینی
بوتون موشکول‌لری آسان یازاردیم
***
فیـکیر یـاراداردیـم بئیین‌لـر دولو
اینسان دوز سئچردی ساغ ایله سولو
معـنالی سؤز شـاعیرلرین محصولو
جـانیـمی قـانانا قـوربان یازاردیم
***
اینـسانـلار وارلـیغی خـلقتدن بری
شـهرت تاپیب اولوب دیللر ازبری
قـوینوندا بـسله‌ین قوچ ایگیدلری
دونـیا بـیلیر آذربایجان یازاردیـم.
روحو شاد، یولو داواملی اولسون

دیدگاه بگذارید

avatar
  Subscribe  
باخبر شدن از