« ادبیات اوجاغی » کیتابیندان بیر تُحفه توپلایان : رحمتلیک اوستاد یحیی شیدا

خوی
عابدی
دوغوم ایل: ۱۳۲۸
هاشم عابدی کی شعرده « عابد » تخلص ائدیر، خوی شهری نین دویغولو شاعریندنیر.
عابد ۱۳۲۸ – اینجی ایل خویون اندراب کندینده دونیایه گؤز آچدی. دیپلوم اولاندان سونرا معلم اولوب ایندی ایگیرمی ایله یاخیندیر کی بو مقدّس وظیفه ده چالیشیر. دئمه لی ییک کی معلم چیلیکده لیسانس آلماغادا موفّق اولموشدور.
اونون آذربایجان دیلینه سونسوز محبتی واردیر. بودیلده یازدیغی شعرلر محتوالی ، آخیجی و دولغون دور.
عابد یازیر:« هئچ واخت حاضیر اولمامیشام شعرلریم بیر یئرده چاپ اولسون ».
دئدیکلرینه گؤره بو اوّل شعرلریندندیر کی بو مجموعه ده چاپ اولور، بو اُمید ایله کی گله جکده دیوانلار ترتیب ائدیب وطنداشلارین فایدالاندیرماقلا برابر ، گؤزه ل اینجی لر ادبیّات خزینه میزه علاوه ائتسینلر.ایندی بو احساسلی شاعردن نمونه شعر بوردا گتیریریک:
وجداندان ایراق
قادالار قوی منه دگسین او شیرین جاندان ایـــراق
پوزغون ائتسین حالیمی ، زلف پریــــشاندان ایراق
کنعانین یوسفی چیخدی قویودان اولدو عزیــــــــــز
چیخماییر خسته کؤنول چـــــــــاه زنخداندان ایراق
اجلین تیشه سی چوخلی اوجا بوی سـروی سالیب
اینجه بئللیم! بو بلا سرو خــــــــــــــــراماندان ایراق
تا واریم بیر باخیشیلا منی بیــــــــــــر یادیوا سال
وارلیغین یوخلوغو وار سئوگیلی جاناندان ایــــراق
بوکی آهیـــم بورویوب توستو کیمی دام – دیواری
یانیـــــــــــــرام عشق اودونا شمع شبستاندان ایراق
گؤرمه دیم دونیادا انسانلاری غمسیــــــــز یاشاسین
تکجه بیر گون نولی غملـــــر اولا انساندان ایراق
سانکی موج ایچره دوغوبدور منی دهــرین آناسی
اودور اولمور گؤزومون ساحلــــی طوفاندان ایراق
باده ایچ، خرقه نی یاندیر ، سازی چال ، سبحه نی قیر
آمما « عـــــــابد » یاشاما لحظه ده وجداندان ایراق

دیدگاه بگذارید

avatar
  Subscribe  
باخبر شدن از