روزنامه کثیرالانتشار سراسری صبح ایران
به دو زبان ترکی و فارسی

۱۳۹۹/۰۹/۱۲
روزنامه ساقی آذربایجان
تبلیغات
آمار بازدید
  • 0
  • 1,072
  • 1,097
  • 1,390,237
اوروجلوق آییندا ده یه رلی پایلاردان ( پیغمبر شاعیری )

رمضان آیی نین اوچونجو گونونده، شاعیر و تدقیقاتچی دوستوم «سخاوت عزتی» (عندلیب اهری) همیشه کی کیمی گولر اوزله، تزه چاپدان بوراخیلان کتابینی منه هدیّه وئردی. کیتابی اوپوب گؤز اوستونه قویدوم و تشکّرلر ائله دیم. رمضان گئجه لرینین بیر حیصّه سین بو کتابی اوخوماغا واخت قویدوم. «پیغمبر» آدلی کیتاب، «قرآن» نازیل اولان گئجه لرده منده بیر شیرین معنویت یاراتدی. گئجه لر، گوندوزلر اوخویوردوم، نهایت نورلو «قدر گئجه سی» گلدی یئتیشدی. مچیدلره ییغیشدیق، صبحه دک احیا ساخلاییب، نماز قیلیب، دوعا ائله دیک. «ابوحمزه ثمالی» دوعاسین اوخودوقجا «پیغمبر» کیتابی نین لوحه لری ذهنیمدن سوووشوردولار. «زلیمخان یعقوب» بو کیتابیندا الله دان بئله بیر ایسته یی واریمیش:
ای قادیر آلله !
بیر قدر گئجه سی
ایسته ییرم من،
یئردن ده، گؤیدن ده
ثاواب گؤندره،
ساچا ایشیغینی
قارانلیقلارا.
گیزلی سؤاللارا
جاواب گؤندره
بیرقدرگئجه سی
ایسته ییرم من،
هر سطری آللهین
نورویلادولا
«پیغمبر» آدیندا
کیتاب گؤندره.
نئجه کی، زلیمخانین دوعاسی حاق درگاهیندا مستجاب اولوب و «پیغمبر» کیتابینی یازماغا اونا ظرفیت وئریلیب، منه ده ائله بو کیتاب، بو رمضان آییندا وئریلدی تا نورلو اوباشدانلاردا و موقدّس گئجه لرده، پیغمبر و قرآن و ایسلام تاریخینه منی وورغون ائله سین و بو دَه یَه رلی کیتاب احترامینا، منیم ده قاپیمی، ملکلر آچسین!
بو دوعا گئجه لرینده، بوعطیرلی، حؤرمتلی لحظه لرده، زلیمخان منیم گؤزومون اؤنونده دورموشدو. هر نه راز و نیازیم اولدو، زلیمخانلا شراکتیم اولدو. بو «پیغمبر شاعیری» اولماغین، شیرین اثرلریندندی !
من زلیمخانی بیرنئچه کیتاب شعر توپلوسویلا تانیییردیم. اونو نئجه کی وار، بیر اوجا ذیروه لی شاعیر بیلمیشه م. سئحرلی شعرلری، گوجلو قلمی، شجاعتدن، شهامتدن سؤز وئره ن قوشمالاری، زلیمخانا اوره­کلریمیزده بیر بویوک یئر آچیب. لاکین «پیغمبر» پوئه ماسینی یارادان زلیمخان، آیری بیرشخصیته چئویریلیب. موقددسلیک، مودریکلیک، معنوی و عرفانی سیما و فیکیر صاحیبی، بیر ایسلام شوناس و قرآن موفسّری کیمی اولو بیر الهی معلمه بنزه ییر. زلیمخان اؤزونو «پیغمبر شاعیری» آدلاندیرماقلا «حسّان بن ثابت» کیمی بویوک شاعیرله آددیملاشیب و ائله کی اولو پیغمیر یمیز، حسان بن ثابیته بویوروب: سنین شعرینین هر بیتینه، جنّتده بیر قصیر وئریله ر! ائله دوشونورم کی، زلیمخان دا بوتحفه لری حضرت پیغمبر دن آلیب و اودورکی «پیغمبر» ده یازیلان لوحه لر، الهی سؤزلر اولوب و زلیمخانا پیغمبر الیلن «سئوگی دولو جام وئریبلر، یاندیرماغا، قارانلیقدا، شام وئریبلر! تؤکنمز بیر حیات عشقی، سؤنمز بیر اینام وئریبلر! هر سؤزونه، صوحبتینه، داد وئریبلر، تام وئریبلر!» و زلیمخان یعقوب «پیغمبر شاعیری» اولوب:
نه بویوک بختورلیک –
سو کیمی آیدین، دورو،
بال کیمی شیرین اولماق،
اود ایچینده زمزمین،
سویو تک سرین اولماق،
سنین خدمتچین، قولون،
سنین شاعیرین اولماق،
ای منیم پیغمبریم
سنین شاعیرینم من!
سنین دئدیکلرینی
باشیمدا تاج ائله دیم،
کؤنلومون باغچاسیندا
اریش – آرغاج ائله دیم،
عشقینی کعبه بیلدیم
قلبیمی حاج ائله دیم،
ای منیم پیغمبریم،
سنین شاعیرینم من !!!
زلیمخان بو اثری اؤزو یاراتماییب. اونون «چیینینه ملکلر، دسته دسته قونوب، نور داغی نین ایشیغی بئینینه دوشوب ملکلرله دانیشیب، ملکلردن گوج آلیب، فلکلرین دیلین بیلیب، پیغمبرین عشقینه دایاغلانیب، قدر گئجه سینده آیلارین سولطانی رمضانی آلقیشلاییب»، نهایتده بو اثری یازماقلا، حضرت محمدین اللرینی سیخیب! آللاه ایله دوست اولوب، «اوندان گلن باغلاری کسمه ییب، قلبینده سسله نن تئلی قیرماییب»، اؤزونی بویوک تانری یا وصل ائدیب، مرتبه – مرتبه یوکسه لیبدیر:
آللاه ایله دوست اولانین
یولو قیریلماز یاریدا،
یئددی قاتدان یئتمیش قاتا
کئچر مرتبه – مرتبه .
آللاه اؤزو عزیزله یَر
ان سئویملی بنده سینی،
کؤنوللردن – کؤنللره
کئچر مرتبه – مرتبه
تانری دوستو اولانلارا
گؤیلر آچار قاپی سینی
محبت اؤز ایشیغینی،
ساچار مرتبه – مرتبه
زلیمخان بو الهی ایلهام اثرینده، بیر توکنمز معنوی ثروت صاحیبی اولدو، کامیل بیر اوستاد مقامینا چاتدی، «پیغمبره اولان عشقین، گؤیه یازدی، «پیغمبر» کیتابینی، «آلله» دئیه – دئیه یازدی». بوکیتابی «الله» دان بیر قیسمت بیلیب، بئله شوکورلر ائله دی :
قوش بوداغا، آغاج کؤکه،
آریلار شانا باغلاندی،
جان جانا کؤرپولر سالدی،
جاهان جاهانا باغلاندی،
شوکور حاققین قیسمتینه،
گلدی قرآنا باغلاندی،
منیم اولو، منیم اوجا،
منیم موقدّس قسمتیم !
زلیمخان بو موقدّس قیسمتیندن، فایدالانیب، حضرت پیغمبرین حیاتینی سئحرلی قلمی له یازیر، پوئما یارادیر، پیغمبر دئیه نی یازیر، و بو شاعیر لییه فخرائله ییر و شعرلرین پیغمبر ین گؤزل جمالینا، بیر صالاوات بیلیر و الله دان ایسته­ییرکی یئرله – گؤی آراسیندا پیغمبره اولدوغو محبتینی قبول ائله سین.
هله شاعیر ائله مقاماته چاتیر که پیغمبرین قرآن اوخوماغین، دینله ییر:
تاختی اوجا، باختی یئیین،
بو آواز شاه آوازیدی،
دورولانیب تمیز لنمیش
اولو درگاه آواز یدی،
بو، بنده نین ایشی دئییل،
بو بیر آللاه آوازیدی،
محمدین نفسییله،
اونو بیر اینسان اوخویور،
باخ پیغمبر آوازینا،
گؤر نئجه قرآن اوخویور.
زلیمخان بو عیرفانی مقاماتی مرتبه – مرتبه کئچیردیب، پیغمبر شاعیری یوخ، بلکه پیغمبره اورک وئریب، اونا عاشیق اولوب، بو عشقدن بئله یازیب :
نورو شربت کیمی ایچیب گئدرسن،
کؤنولدن کؤنوله کؤچوب گئدرسن،
هارادان یئریییب کئچیب – گئدرسن،
سن کئچن یوللارین ایزیندن اؤپوم.
سن منیم روحومون لایلاسی، شعری،
زووار زیارتدن قالارمی گئری؟
گؤستر قدملرین توخونان یئری،
گلیم، آیاغی نین توزوندان اؤپوم.
شاعیرین عمرونون ان گؤزل چاغلاریندا دفعه لر مکه زیارتی اونا نصیب اولور. کعبه نین قاپیلارین، داشلارین، اؤپوشه غرق ائدیر. بو سفرلره باغلی شعرلر یازیرکی « پیغمبر» کیتابیندادا گلیبلر. ، بوشعرلرده، زلیمخان بویوک عرفانی مقاما چاتیب و «فنا فی الله» مرتبه سینده گورونور :
نئجه کئچدی زیارتیم،
قوی اونو بیر خدا بیلسین،
بیر جانیم وار قادیر الله،
اونو حاقدا فدا بیلسین.
کعبه منیم قلبیم ده دیر،
من اوندایام، او منده دیر،
هئچ اولارمی شاعیر کؤنلوم،
جانی جاندان جودا بیلیسین،
تانریم ایله وحدتده یم
آلله ایله صؤحبتده یم
حاققی بیلن – هر سؤزومو
حاقدان گلن صدا بیلسین
اگر بیر گون اونودارسا
پیغمبریم یاتان یئری،
اولو تانری زلیمخانی،
خان بیلمه سین، گدا بیلسین.
زلیمخان یعقوب مرتبه – مرتبه فرشی یاشاییشدان اوجالانیب آللهین عرشینده دیلده قرآن آیه لری، افوقلری اوپدو. حاققا باغلاندی .
حاققین ووران اوره یی،
عشقی، عاغلی، منم، من.
ساچیندان داماغینا
یارادانا – آللها –
حاققا باغلی منم، من !
«پیغمبر» شاعیری «گون به گون نورلاندی، ایشیقلاندی، دایاز ساحیللردن اوزوب کئچدی، پیغمبر آیاغیندان چیچکلر دریب، پیغمبر گئدن یوللارین توزوندان اوپدی». آللهدان غیری هئچ کسه گؤز تیکمه دی، آللهین دوستونا چئوریلدی و اولدی بیر حاق عاشیقی:
گوؤن بو دونیانین یاراشیغینا
پیغمبر نورونا، حاق ایشیغینا.
ایندی کی دؤنموسن حاق عاشیغینا،
ایشیقلان کعبه نین نوروندا، کؤنلوم
زلیمخان «پیغمبر» کیتابیندا «مناجات» لوحه سینده بئله آرزیلا میشدی:
ای اولو یارادان،
ای قادیر آللاه !
.
بیر قدر گئجه سی
ایسته ییرم من،
هر سطری آللاهین
نورویلا دولو
«پیغمبر» آدیندا
کیتاب گؤندره.
تانری سئوگیسیله
دینیم، دیندیرم،
یازدیران حاق اولا،
یازان من اولام.
.
حاق منی دؤندره،
حاق عاشیقینه،
بو عشقین یولوندا
اوزان من اولام.
شاعیر بو مقاما چاتماغا، اوز توتوب آللاه درگاهینا شوکورلر ائدیب، سئوینجلرگوستریر:
چالدیم اوز هاوامی بیر کیتاب اوسته
دیل وئردیم سازیما، الحمدلله !
حاققین اؤزو ووردو ناخیشلارینی،
خطیمه، یازیما، الحمدلله !
مندن سالام اولسون اولودرگاها
تاپیندیم تانریا، یئتدیم آللاها
اؤلسم ده بیر ذره دردیم یوخ داها،
چاتدیم مورادیما، الحمدلله !
زلیمخان یعقوب «فنا فی الله» مرحله سیندن کئچیب، ابدی وارلیغا چاتیب، آللهدان بو کیتابینا یاخود عشقینه، عاشیقلیغینا، تأیید موهرو ایسته ییر :
آللاهدان ایسته دیم
اؤزکیتابیمی،
یوخ یئردن وار اولار،
آلله ایسته سه !
.
ائله بو اثرله
وورار مؤهر ونو،
زلیمخان وار اولار،
آلله ایسته سه !
یئری گولزار اولار،
آلله ایسته سه !!!
بئله لیکله زلیمخان یعقوب، آلتمیش یاشینا چاتارکن، عرفانی مرحله لری سیر ائله ییب، اؤز مورادینا چاتیب، «پیغمبر» قولو، «پیغمبر» شاعیری و نهایتن حاق عاشیقی اولدو !
گل – گل دئدی منه عشقین عذابی
چکدی اورک منله حاقی ، حسابی،
خالق ایسته دی ، مؤولام وئردی کیتابی،
سینه دولو بیر دفتر له گلمیشم.
.
بللی توخوم، بللی سونبول، بللی دن،
حاق اؤزودور موشکوللری حلل ائدن.
یوک باغلادیم، مایا توتدوم اللی دن،
آلتمیشیما «پیغمبر» له گلمیشم.
یازار : حسین دوستی

دیدگاه بگذارید

avatar
  Subscribe  
باخبر شدن از
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز