اوشاق فولکلورو

آنالارین دوغما ایستکلریندن جوشان و صاف احساسلاری ایله قانادلانان اوشاق فولکلورو، ائل ادبیاتیمیزین اولدوقجا گوجلو قوللاریندان ساییلیر. دونیایا تازا گؤز آچان کؤرپه لردن توتموش ایلکین یاشلارینی کئچیرن بالالار و یئنی یئتمه لرله ایلگیلی سئویله نن لایلالار، نازلامالار، اوخشامالار، آرزمالار سانامالار، تکرلمه لر، تاپماجالار، اوشاق ناغیللاری کیمی بؤیوکلرین و ها میدان چوخ آنالارین اؤز بالالارینا یاراتقلاری و یاشاتدیقلاری ساده، یاراشیقلی و موزون ائل ادبیاتیمیـــــزین بهره لی
و آنا ایستگی قدر دولغون
بو گؤزل نغمه لر ظاهری
گؤرونوشــــده اوشاقلاری
یاتیزدیرمـــاق، اونلارین
بویونا اوخشاماق.
دیله توتماق و اگلندیرماق
خاطره اولسادا دیل آچماقدا، حیاتلا آشنالیق قاتماقدا، دوغما آنادیلی ایله آلیشماقدا بیر سؤزله حیاتین آنلامینی دریندن باشا دوشمکده اونودولماز نمونه لری سیراسیندا یئرله شیر .
آختلاریشلار و آراشدیرمالار گؤستریرکی، درین دوغمالیق و توکنمز آنا محبتیندن چاغلاییب گلن بو سؤزو احساس اینجه لیکلری عصرلر بویو اوزون تکامل یولو کئچیرمگله بیزه گلیب چاتمیشدیر، آنا سودو قدر ایلک مکتب اولموشدور. تاسفلر اولسون کی، دوننه قدر سوادسیز آنالاریمیزین سینه سی بو مکتبین توکنمز لایلاری- اوخشامالاری-ناغیللاری و آیری- آیری ائل سؤزلری و ائل نغمه لری ایله جوشوب- داشدیغی حالدا بوگون بیزیم بیر چوخ سوادلی آنالاریمیز اؤز دوغما دیللرینده کؤرپه لرینه شیرین- شیرین لایلا دئمه گی، بویونا اوخشاماغی و ناغیل سئویلمه گی یادیرغامیشلار .
ائلین وارلیق دایاغی اولان آنالارین لایلالاریمیزی ، ناغیلاریمیزی ائل نغمه لریمیزی اونوتمالاری هر بیر علته اولور اولسون. صاباح شبهه سیز اوشاقلاریمیزین تکجه اؤز آنا دیللری نین اینجه لیکلرینی یادیرغاماسی و اونوتماسی ایله یوخ، بلکه اونلارین ملی وارلیقدان اوزاقلاشماسی و ملی روحیه دن آیری دوشمه سی ایله نتیجه لنه جکدیر صاباح چوخ گئج اولاجاق. بیز بوگون و ائله بوگون کورپه لریمیزین معنوی- ملی تربیه سی خاطره ،منلیگیمیزی و کیملیگیمیزی اوشاقلارا آشیلاماق خاطره لایلالاریمیزا ،نازلامالاریمیزا و ناغبللاریمیزا قاییتمالی و بونلاری بؤیوک ملی- معنوی بیر میراث کیمی قورومالییق .اوشاق فولکلوروموز بوتون اینجه لیکلری،آل- الوانلیقلاری ایله ائل ادبیاتیمیزین آیریلماز بیرحصه سی ساییلیر. فلکلوروموزون آیری- آیری دامارلاریندان چاغلایان سؤز قورولوشو ،آهنگدارلیق، سس اویوشمالاری، تصویر درینلیگی اوشاق ادبیاتیمیزدا اولان اینجه- لیکلرله وحدت تشکیل ائدیر. ائله بوناگؤره ده اوشاق فولکلوروموزو بوتون فولکلور مجموعه لرینده خلق ادبیاتمیزین آیری- آیری نمونه لری سیراسینا گئچیر و بیرلیکده نشر ائدیلیر. بئله لیکله اوشاق فولکلوروموزون توپلانماسی و آراشدیریلماسی سیخ صورتده عمومی فولکلوروموزون توپلانیب آراشدیریلماسی ایله بیرله شیر .
بو باشلانیشی دوغرولتماقدا حیات یولداشیم م. ع. فرزانه نین قایغی لی گؤستریشلریندن فایدالانمیشام و آشاغیدا نمونه اولاراق نازلامالاردان نئچه بند گتیریریک …
نازلامالار :
آلتینــــــــدا خالچا
چالیـــــــر کمانچا
اون دانا خـــــونچا
گلیر قیزیم اوچون
***
گوزگوده دوگمـه
توزونو ســـــــیلمه
خونچادا تیــــــرمه
گلیر قیزیم اوچون
***
ائیـــــنه ده وار دوز
دؤوره سی صــدف
بیر زرلی اؤرپــــک
گلیر قیزیم اوچــون
***
آغ مایا اللـــــــــــر
بئلینده کمـــــــــــر
قیزیل دویمـــــــه لر
گلیر قیزیم اوچــون
***
گولوســـتان باغی
یاشیل یـــــارپاغی
قیزیل بئــــل باغی
گلیر قیزیم اوچون
***
هر یانا گــؤزوک
ایــلقاردا دوزوک
بیریلیانـت اوزوک
گلیر قیزیم اوچون
***
داغــلار دا جیئران
بو قیــــــزا قوربان
اون خــــارا تومان
گلیر قیزیم اوچون
***
هیئـــــواسی ناری
الیمیــــــــن باری
اون ساپ میرواری
گلیر قیزیم اوچون.
یازان : خانم بدوستانی

دیدگاه بگذارید

avatar
  Subscribe  
باخبر شدن از