ایلمه‌چی‌لر

کئچمیشه باخاندا قیرخ ایل بوندان اؤنجه بیر قونشونون یاشامی‌ هَله‌ده اوره‌ییمی‌ یاندیریب یاخیر. بیر کَنددن گلمیش عائله کی بئش باش‌ایدیلار. بؤیوک اوشاق “اکرم” آدیندا بیر قیزیدی. دوققوز یاشیندا اولاردی. او عائله یاپ اَلی یالین کنددن کؤچوب تبریزه گلمیشدیلر. اکرمین آتاسی بیر قوروموش عاجیز کیشیدی و فحله‌لیگه گئدردی. بیرگون ایشلردی، ایکی گون ناساز اولاردی. اولارین داوارانیشی چوخ چَتینیدی. ائله اولدوکی ائو کیراسی وئرنمه‌دیلر. بیر قونشو او قیزین الیندن توتوب آپاریب کدخدا کارخاناسینا ایلمه سالماق اوچون تاپشیردی. بیر کؤهنه داخما ائو واریدی کدخدانین بونلارا رحمی‌گلیب وئردی اولارا کی اوردا کیراکیش اوتورسونلار. اکرم ده اونا ایشله‌ییب و آتاسی‌دا کدخدایا قوللوقچی اولسون ائوین کیراسینین عوضینده. قرار اولدو اکرم اوردا سحر تئزدن گون باتانا قده‌ر ایلمه سالسین.
کارخانا بیر قارانلیق اوزون کالاواییدی؛ تکی تورپاقلیق‌ایدی کی سو سپردیلر توز اولماسین. اکرم بیر آز یاواش ایشله‌سیدی خَلفَه‌لر آرخاسیندان بیر اوخلو چکردیلر و او آغلایا-آغلایا ایلمه سالاردی. کارخانادا نئچه دانا خیردا بویلو قیز و اوغلان اوشاغی ایشلییردیلر. اوشاقلار ایپ قیران پیچاقلا بارماقلارینین باشین کسسیدیلر او گونون موزدو یئتیشمزدی اونلارا و ائولرینه گوندرردیلر. او گون آنالاری اولاری وروب چؤرکده وئرمزدی یئمکلرینه. بونلار جمعه‌لر حاماما گئدردیلر و بیر آز دینجه‌لردیلر.
یاندیریجی قیشین سویوغوندا اکرمین قالین پالتاری اولمادیغی اوچون هئی ناخوش اولاردی و آناسی چاراسیزلیقدان ساواشاردی کی: “دور گئد ایشیوه، گؤرمورسن کئچینه بیلمیریک؟ بئش باش ائوده آجیم اولا-اولا بوگون سحر بیریده گلیر، من باشی داشلی نینیرم آخی اوشاغی؟ آتان دئییر بلکه اوغلان اولدو، مندن سونرا سیزه کمک اولار. آچیلان سحردن گئد ایشیوه‌ها!!”
زاوللی بالا اوجانیله دوروب گئدردی ایشه. بیر گون خلفه‌لرین بیری گؤردو اکرم اوسگوردو و آغزیندان قان گلدی. آتاسینی چاغیریب دئدی قیزین قان قوسور. او دئدی بیلیرم بابا چوخداندیر، هئچ زاد اولماز. بیز یوخسوللارین جانی درده اورگه‌نیب، نئیله‌مک؟!! قیز آخیندی آتاسی قیزی دالینا آلیب گتیردی ائوه. اکرم بیرده قان قوسدو. داها جانیندا هِئی قالمادی. آپاردیلار حکیمه و او دئمیشدی کی قاب قاشیغیزی بوندان آییرین، “سیل” مرضی توتوبدو بو قیز. ائوه یئتیرن کیمی‌آناسی دئدی: اؤل باشی داشلی، ایشله‌مه‌یین دردیندن هر پئشه گئتدین باشیما.
هاوا آلاتورانلیغیدی. قارلی کولک یامان اسیردی. بونلارین یاناجاغی دا یوخودو. یوخسوللوق قم سازینی چالیردی. بیردن گؤردوک‌هارای قوپدو؛ چیغیرماق-باغیرماق سسی محلله‌نی بورودو. گئدیب گؤردوک اکرم‌گیلین قاپیلاری شولوقدور. مچیدین میجورو “مَشد یوسوف” بیر تابوت گتیریب، اکرمی‌قویدولار اونون اوستونه. بو زاواللی قیز گودک یاشامیندا نه یئدی؟ نه گئیدی؟ نه دولاندی؟ قارا گونلر بوغوب توپراغا تاپشیرد.
یوخسوللوق الیندن اؤلنلر چوخودو، تک اکرم ده‌ییردی. بیریسی دام کوروینده دامدان دوشوب اؤلردی، بیریسی قیرخ آیاق چشمه‌ده دوشوب بوغولاردی و مینلر اونلارا بنزر یوخسوللوق الیندن اؤلنلر. سیل نوخوشلوغو، ذات‌الریه نوخوشلوغو، چیچکدن، قیزیلجادان اؤلن اوشاقلار داهادا چوخودو. بؤیله دورومدا یاشام سورمک چوخ چتین‌ایدی.
او گونون اومیدیله کی خیردا اوشاقلار ایشه گئتمه‌ییب، درسه گئدیب شن یاشاسینلار. من اکرمله دوست اولماغیما گؤره قوبارلانیب بئله بایاتی چاغیردیم:
خالیم داردان کسیـلــــــدی
مئینه واردان کســــــیـلـدی
داخـــــــما ایشیق گؤرمه‌دی
الیم یـاردان کســــــــیـلـدی
*
ایلمه ســـــــالدیم بوتـامـدان
الـیــــــــم کسـر تـوتـانـدان
اوخـــــول یولون دئییشدیم
داخما یولون تـوتانـــــــدان
*
گؤز آچدیم داری گؤردوم
آغ گـولـو ساری گؤردوم
ظـــــالـیـم فلـک الـیـندن
قـمی‌قـوبـــــاری گؤردوم
*
تبـریـز فرشی ایپکــــــدن
دفـه ووردوم اورکــــــدن
دردلی چنگی چالمـــادان
قولوم دوشـدو بیلکــــدن
*
ایلمه‌چی‌لر توخـــــــودو
داردا بولبول اوخــــــودو
آیاق گزر اَل یئــــــــریـن
هئچ خیریم یوخـــــــودو
*
ایلمه سالدیـم قـــــــاردان
آل- قیرمیزی بویـــــــادان
سؤیله گوناهیـم ندیـــــــر
یئـری گـویـو یـــــارادان؟
*
آه چـکـدیــم فغـان اولـدو
تئـللـریم یـان- یـان اولـدو
کؤکسوم دردی دئشیـلـدی
خــامـالار آل قــان اولــدو
*
گـل آنــا بیــزلــــــره بـاخ
حسـرتلی گــؤزلـــــره بـاخ
آرخامدا خلفـه وئــــرمیش
اوخلولو ایــزلــره بـــــــاخ
*
آغیـزلاردا سؤز اولـــــدوم
تاپدالانمیش ایز اولـــــدوم
یاشامدا بوی آتمـــــــادیـم
قؤرایکن مَویـز اولــــــدوم
رقیه علیقُلیان ( لاله )

دیدگاه بگذارید

avatar
  Subscribe  
باخبر شدن از