ایکینجی قفسه

منیم یئریم بیرینجی ردیفده اولاراق ایکینجی قفسه ده دیر.” عزیزی ” آدلی بیر کیشی ده قیراقداکی قفسه ده. بیزلر گرک بیرتَهَر اوتوراق کی قفسه یه یئرله شه بیله ک. اؤزه ل بیر سایاق کی اونو اؤیره ن مه گه چوخلی واخت قویوب مشق ائتمی شیک. آیاقلاریمیزی قارنیمیزا ییغیب ایکی ألیمیزی دیزلریمیز اوسته حلقه له ییریک.
بیزدن قاباق گلیب قفسه یه دوزولن لری توز – تورپاق باساراق، آنبارین رئیسی ساری نایلونلا موشامبالاییب دیر. سانکی هامیسی بیر چیلتیکین بندی دیلر کی توز کیمی یئره تؤکوله لر. مودیر هر گون قدم وورا – وورا بیزلره باش چکه رک گاهدان دا ایراد توتوری:
– «نییه به او خانیم اَییلیب دیر؟»
یادا کی: « نییه او خانیمین ساچلاری؟»
گاهدان دا ترپه نیش لریمیزه ایراد توتورلار . مَثَلَن بیر یول منه ایشقال توتدولار کی: « نییه مودیرلر گلیب کئچه رک، آیاغینداکی باش بارماق او قَدَر گؤزه ووروری؟»
دئدیم : « ندنسه ائله بارماغیم اؤزو اوزوندور و بوندان آرتیق ییغیلماییر .»
بیر نئچه نفر ییغیشیب بارماغیما باخاراق شوکر آللاها حاققی منه وئریب بیلدیلر کی هئچ بیر قصدیم و مرضیم یوخ ایدی. هردن ده یان یؤوره ده کی قفسه لردن قولاغیما بیر پارا خبرلر یئتیریر کی مَثَلن ییرمی ایل بیر قفسه ده اوتورماقلا، تقاعد یاشینا چاتماق اولار، البته اودا ییرمی گونون معاشینی آیلیق آلماقلا کی او خبر ده هئچ بیر ماراقلی خبر دئییل. هامی نین آغزیندان یالنیزجا و دفعه لرله تکجه بو سؤز چیخیر:- « او قَدَر بوردا اوتوراجاییق کی آخیردا اوتوز گون معاشلا امکلی اولاق.»
موهوم خبرلر معمولن بیزی هیجانا سالیری، ترپه شه رک چالیشیریق کی قیفیل لانمیش أللریمیزی نئچه لحظه آچاراق دریندن نفس آلاق. یئنی لیک ده ائشیت میشیک قفسه ده اولانلار حاققیندا ” آغیر ایشلر ” چرچیوه سینده بیر قانون چیخیب دیر. اگر بو قانونا عمل اولو نورسا ،شاید بیزلر قفسه لردن چیخاجاییق و شاید ده ائده بیله جه ییک کی اؤزوموزو دیشاری چکه ک. قفسه لرده اوتورماق بیزی آیاقدان سالارکن کیریمیش بیر دوروم داییق. نئجه کی ده، سیراغاگون بیر خانیم کی ایستیردی قفسه دن آشاغی یئنه دوروب یولا دوشه رک قیچی سیندی. هر آددیم آتدیقدا سوموگونون سسی داها آرتیق ائشیدیلیردی. گیریش قاپی یا چاتمامیشدی کی آمبولانسین سسی اوجالدی.
بیز بوردا دئمک اولار عشقی ده اونوتموشوق، تکجه هردن بیر یادیمیزا دوشور کی یوخاری و یا کنارداکی قفسه ده عزیزی آغا دا اوتوروبدی. بونو دا چوخ بدن لریمیزین تریندن آنلاییریق. او قَدَر بیر یئرده قالمیشیق کی بورنوموز قوخولارا حساس اولوبدور و تئزلیک له هر اییی و قوخونو گؤیده ووروروق. اگر ائله یه بیله ک قفسه لر آراسیندان بارماقیمیزی ترپه دک، مومکوندور کی یان یؤوره ده کی قفسه لره ده بیر ایشاره ائده ک کی مثَلَن عزیزی جنابلاری بیله لر من ایندی بوردا اوتورارکن اونو دوشونورم. بو تکجه دیلخوشلوغوموزدور کی ائله مک اولور بیر تهر، بورانین آلچاق سقفینه دؤزه بیله ک. بوگون آمما باشقا گونلری لن فرق ائدیر. اؤزومو بو دورومدان قورتارماق ایستیرم. یعنی ایستیرم قیچلاریمی قفسه دن ائشیگه قویام. اگر بئلیمی دوز ساخلاییب و ائده بیلم کی سونرا… البته عیلتی ده بودور کی یوخودا گؤرموشم کی ایکی دانا بالاجا قاناد چیخارتمیشام و قفسه دن اوچا – اوچا دیشاری چیخیب، گئتمیشم زئش دامین لاپ باشینا و آنبارین ایکی قات قفسه سینده یومورتدامیشام.
او یوخاری دا کیمسه نین ألی آداما چاتمیر و بودا منیم همیشه کی آرزولاریم دان ایدی… گؤردوگوم باشقا یوخولار دا وار ایدی کی منی اذیت ائدیردیلر، دؤش لری مین أری ییب سویا گئتمه سی و هابئله هر سازینان نه جور اویناماقی اؤیره نمک کیمی بیر زادلار!
دئییردیم : « آغاجان! بیز اویناماق کی باشارمازدیق آمما او قدر بیزه قات قاریشیق هاوالار چالدیلار کی ایندی هر سازینان اویناماغی اؤیره نمیشیک . . .
ایندی ساعات اون ایکی دیر، ناهاریمی یئمیشم و نظریمه ایندی واختی دیر، آمما بیرجه چتینلیک وار، اودا بو کی ناهاری یئیه ندن سونرا آزجا اولورسا دا مورگو وورمالییام. ناهاردان سونرا مورگوله مک منیم حیاتیمین أن دادلی آنلاریندان دیر. روحومو دینجه لدن حبلری آتمیشام و بو باعیث اولاجاق آزراق کابوس گؤرَم… نشئه دولو یوموشاق و کئف وئریجی بیر یوخو گؤزلریمی قیزدیرسادا هله ده فیکریم اوچماقدادیر. ایستیرم ایستیخاره ائده م کی گؤروره م یاتمیشام و یوخودا حافیظ فالی توتورام کی گؤره م اوچماق… کیتابی ترسه توتموشدوم. دئمه آین ادا اؤزومه باخیردیم. گؤزلریمین ببه گی کی بیر زامانلار دونیانین أن قارا ببک لریندن ایدی، آغ آبباغی اولموشدور. داها بیرزاد یادیما گلمیر. سانکی بیری بیله می یوخودان آییدیر. آنباریمیزین رئیسی ایدی کی اوجا سسله دئدی:
-« خانیم گرک شیرنی وئره سن، آغیر ایشلر حاققیندا کئچیریله ن قانون سیزه ده شامیل اولوبدور. ایندی ائله یه بیلرسیز ییرمی ایل سابیقه ایلن، اوتوز گونون معاشینی آلاسیز.»
عزیزی آغانی آختاریردیم. سونونکو گونلر ایدی کی ائده بیلردیم اونو بیر داها گؤره بیلم.. باشیمی قاباغا أیه رک آیاقیمین باش بارماقین ترپتدیم. هئچ بیر جاواب آلانمادیم.
آنبار رئیسینین سسین ائشیتدیم کی دئدی :« دالیجا گزمه خانیم! دونن اوستونه نایلون چکمیشیک.»
میترا داور
چئویرن: علیرضا ذیحق

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz