روزنامه کثیرالانتشار سراسری صبح ایران
به دو زبان ترکی و فارسی

۱۳۹۷/۰۹/۲۰
روزنامه ساقی آذربایجان
باجینین آدینی قویدوم اؤزومه

قورخا قورخا یان یوراما باخدیم .کیمسه کوچه ده یوخ ایدی .آرخایین اولدوقجا کوچه یه گیردیم .تابلو مطببین سول دونوش ده اولدوغونو گؤستریردی. بویانا دوندوکجه کوچه قاپالانیردی.اوره ییم آز قالیردی یئریندن قوپا.قاپی یاریم آچیق ایدی.زنگی چالمادان حیطه گیردیم.ایچه ری ده آغ داشلی ایکی قات بیر بینا وار ایدی .کیمسه حیط ده یوخ ایدی. سس سیزلیییندن قورخدوم. حیطین ساغ یونونده یام یاشیل بیر باغچا گؤرونوردو . قوخوسو حیطی ساریمیشدی. بیر آز ایره لی گئتدیم، بیر آن بینانین آشاغی قاتیندا اولان بیر قاراژین قاپی سینین اوستونه یاپیشدیریلمیش بیر یازییا گؤزوم ساتاشدی
“ایچه ری گیرمه ده ن زنگی چالین لوطفن”
قاییدیب حیط ده ن ائشیگه چیخدیم. زنگلرین هر ایکی سینی چالدیم. کیمسه سس وئرمه دی، یئنه چالدیم.
اؤز اؤزومه دئدیم: “اولمایا برق کسیلمیش ،اونا گورا جواب وئرمیرلر؟ ”
یئنی ده ن حیطه گیردیم. پیلله نی قالخیب ، دهلیزین قاپیسینی چالدیم. بیر آز سونرا پنجره لرین بیریندن بیر اورتا یاشلی قادین باشینی ائشیگه چیخاریب، دئدی:”بویورون نه ایشینیز وار؟ ”
“دوکتور واردی؟ ویزیت ایسته ییرم. ”
بونو دئییب، دهلیزین او باشینا ،قادین آچان پنجره یه ساری گئتدیم.
“بیر آز دایانین ” قادین بونو دئییب پنجره نی یاریم آچیق قویوب، ایچه ری قاییتدی . گئتدیکجه قورخوم چوخالیردی. آغزیمین سویو قوروموشدو. ائله سانیردیم کیمسه اوره ییمی سیخیر،اوره ییم یئرینده دئییل دی. دوکتورله نئجه دانیشاجاغیمی بیلمیردیم .کئشگه منی یاخشی دوشونه! لعنت اولسون سنه!
” خانیم خسته خانایا گئتمیش،ایکیندی گله جک. ”
اورتایاشلی قادین بونو دئییب پنجره نی باغلادی .
باساماق لاری ائندیم .حیطین قاپی سینی یاریم آچیق قویوب، کوچه ده ن خییاوانا ساری یورودوم.
قیشین سازاق چالان گونلری نین بیری سی ایدی .ایکیندی؛ ساهات دؤرد ده ؛ سنله گؤروشه جکدیم.دئمه لی بو سنله ایلک گؤروشوم اولوردو .اوزاماناجاق یالنیزتئلفوندا سسی نی ائشیتمیشدیم.سنی گؤرمه یه تله سیردیم .من قیرمیزی اورتویومو اورتموشدوم.دوداقلاریما دا قیرمیزی ماتیک وورموشدوم . یئتدی گؤز کورپونون اؤنونده دایانیب، سنی گؤزله ییردیم .اوزاق دان سنی گؤردوم گلیردین اوزون بیر قارا پالتو گئیمیشدین، اوجا بوی و آریق ایدین .سنی گؤرجه یین من چاشدیم .ائله ساندیم یاناقلاریم اود توتوب یانیر .بونو سن بیلیب گولدون .” جانیم گل اوتور ماسا اوستونده ” دئییب الیمده ن یاپیشیب،منی اؤزونه ساری چکدین.
” نه قدر اللرین سویوق دور! ” دئدین.
سونرا سویوقدان بوزارمیش اللریمی اووجلارینا آلدین .اللرین ایستی ایدی و منه نه قدر بو ایستی خوش گلدی. ائله ساندیم اووجلارین دونیانین ان سیجاق یوواسی دیر.
ساققاخانا کوچه سی نین باشیندایدیم. ساققاخانانین اؤنونده نئچه آرواد شام یاندیریردیلار.شام ساتان قوجا کیشی رادیوا قولاق آسیردی. اؤنونده ن کئچیب کوچه یه گیردیم.دولان با دولان کوچه لر ده ن بیر بیر سووشوب،آلا قاپی یا چاتدیم.ساغ یؤنده، بیرینجی تابلو دوکتورلرین بورادا اوتراق ائله مه یینی گؤستریردی.
” هه ائله اوردولار بورادان باشلاییر.” دئدیم.
سؤزومد ن گولمه ییم گلدی، آنجاق گوله بیلمه دیم. بیر آز دوداقلاریم قاچدی.
اؤز اؤزومه دئدیم:” داوینچی هاردا ؟منده ن بیر رسیم چکه. آند ایچیرم منیم رسیمیم ژکوند گولومسنمه یین دن داهی باهالی اولار. ”
ایلک گؤردویوم مطب بیر اسکی بینا ایدی. اورتویومو قاباغا چکدیم. درین دن بیر نفس آلدیم. اؤزومو چوخ توختاق گؤستر مه لی ایدیم.تاختا قاپینی دویوب ایچه ری کئچدیم.ایچه ری ده ماسانین دالیندا بیر گنج قیز اوتورموشدو. اوندان باشقا، کیمسه مطبده یوخ ایدی.قیزی سالاملادیم : “دوکتور واردی؟ ”
گنج قیز دئدی: “یاریم ساهاتا گلر .بیر آز بوندان اؤنجه زنگ آچمیشدی دئدی یولدادیر. ایسته ییر سن ویزیت وئریم .”
قیز بونلاری دئییب ماسانین دالینداکی کئشونو آچیب دفترینی چیخارتدی.
” آدینیزنه دی ؟”
اؤز آدیمی دئمک ایسته مه دیم. منیم بورایا گلمه ییمی ایسته میردیم کیمسه دویا.بیر تاخما آد تاپمالی لی ایدیم.سنین کیچیک باجینین آدینی خاطیرلادیم .
دئدیم:” سولماز عزیزی ”
باجینین آدینی اؤزومه قویدوم. هر یئره گئتسم بو آدلا ویزیت آلاجاغام. سن منیم آبریمی توکدون، منده باجینین آدینی پیسه چیخارداجاغام. کئچیب بیر صندل اوستونده اوتوردوم. اوره ییم داغداغایا دوشموشدو ائله دویوردوم بوغازیمدا بیر تیکه قالمیش. سندن آیریلارکن بو قورخو منی ساریدی.ایلک سایمادیم. آخی بئله بیر ایشین باش وئرمه یی عاغیلا سیغماییردی. اوندا اؤز اؤزومه دئدیم نئچه گون دؤزوم هله گؤروم نه اولوربلکی دوروموم دئییشیله ! اوچ دؤرد گون ده دؤزدوم، سونرا گؤردوم یئنه دوروموم دئییشیلمه دی . داهی یاواش یاواش نیگران اولدوم. اوتوروب حئسابلادیم .کئچن دؤنه نه زامان اولموشدوم؟آهان دوز اوتوزآلتی گون بوندان اؤنجه، هر ایکی سینین آراسی دا ایگیرمی بیر گون اولور. نهایت بیر ایکی گون اویان بو یان اولور. آنجاق ایندی اون بئش گوندور دالی توشوب ،بئلیمده آغریمیر. هر دؤنه آی باشیما نئچه گون قالانداسانجی قارنیمی،بئلیمی دوغرایاردی. ایلک گونلرآغریدان گوندلیک ایشلریمه ده یئتیشه بیلمرم.
بیر دن های کوی سسی قالخدی. دیققت له قولاق آسدیم، بیر قیزین دا آغلاماق سسی بو های کویه قاریشمیشدی .آیاخچی ماسانین دالیندا قالخیب دوکتورون اوتاغینا ساری قاچدی. ایره لی گئدیب ایچه ری باخدیم ایکی اورتا یاشلی قادینی گؤردوم . آنجاق اونلار آغلامیردیلار. دوکتورون سسینی ائشیتدیم حیرصله دانیشیردی:” اولماز،بو ایش یاساق دی، منه آغیر باشا گلر.بو ایشی گورسم اؤزومو گودازا وئررم.تکجه یولو بودور اوغلاندان شیکایت ائلییه سیز.”
قادینلارین بیری سی دئدی: “اوغلانی تاپا بیلمیریک،کند دن قویوب گئتمیش!”
باشقاسی دوکتوره یالواریردی :”خانیم دوکتور باشینا دولانیم! قویما آبریمیز توکوله،ائل اوبا اوزوموزه توپورر.آتاسی دئییب بو قیزی بو تهر ائوده گؤرسم، باشینی کسه جه یم. الله بالانی ساخلاسین خانیم. بیزیم ایشیمیزی بیر تهر ائله.الله ایشینی راس گتیرسین.”
دوکتورسسینی اوجالتدی:” اولماز.اوشاق ایندی آلتی آیلیق دیر.من بیر ایش گؤره بیلمه رم .گئدین بو شهر ده آختارین من یوخ، هئچ دوکتور ده سیزه بیر ایش گؤره بیلمز. اوشاق بیرآیلیق یا ایکی آیلیق اولسایدی اوندا بیر تهر ائلییه ردیم، آنجاق ایندی اوشاق چوخ یئکه دیر.”
آغلاماق سسی اوجالدی.
“بو غلطی ائلیینده آغلاییردین.” آیاخچی، قیزا دئدی
یانیمدا اوتوران گنج قادین دا دئدی:”اوندا فئندیلی چالیردی.”
قیزین سسی بئینیمده گومبولداییردی.گئتدیکجه اوره ییم بولانیردی. آز قالیردی قوسام. بیر آن اوره ک دن آرزیلادیم قارنیمین ایچینده اولان هر نه وار آغزیمدان ائشیگه توکوله. اوندا هر نه چوخ راحت قورتاراردی.الیمی آغزیما توتوب نئچه دؤنه اؤگه دیم.قارشیمدا اوتوران قوجا قادین سوردو:”ایلکین دی؟”
قوجا قادینا های وئرمه دن باشیمی دووارا سؤیکه ییب،کوکسومو اوتوردوم.یانیمدا اوتوران قادین الیمی چینیمه قویارکن دئدی:”داریخما !هامی ایلک گونلر بئله اولور.آنا اولماق قولای دئییل.”
آنا سؤزونو ائشیتدیکجه بیر تهر اولدوم.یانی من ایندی آنا اولموشدوم؟ لذذت دویدوغوم چاغ بیر آن سهو ائتدییمدن یارانمیش بیر اوشاغین آناسی منه دئمک اولار می؟بیر آن قارنیمدا اولان او اوشاغدان ائله ایرندیم، بویله کی ایسته دیم الیمی بدنیمین او دئشیگینه سوخوب قارنیمین ایچیندن اونو چیخاریب ائشیگه آتام. بئله اؤزومو و او یازیق اوشاغی قارا طالع دن قورتارام.
قادینلارین بیری گنج قیزین الیندن یاپیشیب ائشیگه چیخدی. بیری هله ده دوکتوره یالواریردی. قیز اون دورد، اون بئش یاشیندا گؤرونوردو. ندنسه او قیزی دونیا دا اؤزومه ان یاخین اولان کیمسه دویدوم . اونا و اؤزومه یازیقلیغیم گلیردی. گله جه یینی چوخ راحات جیزماق اولاردی.
سنه دوشوندوم. ایندی هاردایدین؟سنی آندیقجا داهی چوخ اوره ییم بولانیردی. بیزیم آرامیزدا هر نه قورتارمیشدی ائله بو ساده لییه.
دئدین :”بوردان گئدجه یم، اوزاق بیر یئره.نم نیشان دا قویمایاجاغام.”
کاغیذی گؤستردیم. الیمدن آلیب جیردین:”منی قورخودورسان،بو کاغیذی روشوت نن یازدیرمیشسان ”
آغلاییب یالواردیم :” سن منه سؤز وئرمیشدین ؟دئمیشدین بیر آیا منله ائولنه جکسن ……….”
ایکینجی قادین دا ائشیگه چیخدی. یایلیغینین اوجویلا گؤزلرینین یاشینی سیلرکن، باشقاسینا دئدی:” نه قدر یالواردیم ،بویون آلمادی. قورخور! دئییر بلکی کندلرده اولان قابیله لر بیزه بیر ایش گؤره.”
مطبده اوتوران قادینلارین بیری گنج قیزا ساری دئدی:”دردین بیر اینه یه باغلی دیر، اونو تاپسان ایشین دوزه لر.”
ایکی قادین گنج قیزلا مطبدن گئتدیلر.دوکتورله گؤروشوب دانیشماغیم فایداسیز ایدی.بو قیزا بیر ایش گؤره بیلمه دی، منه ده گؤره بیلمز. آرتیق بورادا اوتورماغا حوصلم یوخ ایدی. ویزیت اولونمادان دوروب گئتدیم. دوکتورون ، قادینلارین بیری سینه دئدیی سؤز بئینیمده فیرلانیردی”کندلرده کی قابیله لر بلکی بیر ایش گوره بیلدیلر”. ربابه قلی زاده

دیدگاه بگذارید

avatar
  Subscribe  
باخبر شدن از
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز