عزیزیم بی کـسم من
داغلاردا کی سَسَم من
دوشمنیمین گؤزونده
بیرآن قویما کوسم من
***
عزیزیم قاشی کامـان
آغـزینا گلـمز یـامـان
دوشمن سسین ائشیتجک
دوشـمنه وئـرمز آمان
***
قیزیل اینه سـاپلانماز
آتـارام اوْدا یــانـماز
دئسم باشیم آغرییـیر
یاد اوغلـودور اینـانماز

*

دامدان داما دامیمیز

قوْشادیر ائیوانـیمیز

سن اوْردان گل، من بوردان

کوُر اوْلسون دوشمانـیمیز

*

چای قیراغی بیچیلمز

سویو درین گئچیلمز

بیر جاندان ، بیرده یاردان

شیرینلیکدن گئچیلمز

*

گلیردیم یاواش یاواش

آیاغیما دَیدی داش

سندن منه یار اوْلماز

گل اوْلاق باجی قارداش

*

سو درین‌دی گئچیلمز

بولانلیقدی ایچیلمز

دئـییرله یاریندان گئچ

یار شیریندی گئچیلمز

*

عزیزیم بولاریمیش

ایچمه‌لی سولاریمیش

عزرائیلین آدی پیس

جان آلان یوْللاریمیش

*

باشیندا گوموش سانجاق

گئدیردی بیر یار آنجاق

دئدیم بو اوجا بوْی یار

گؤره‌ن منیم اوْلاجاق

*

قیزیل اوزوک دار بارماق

سؤزلرین بال، دیل قایماق

سئوگی‌لرین حاققی‌دیر

کؤنول تاپشیریب آلماق

*

قالادان اندیم آنجاق

باشیمدان ساری سانجاق

نه قیز اوْلدوم، نه گلین!

اوْدلارا یاندیم آنجاق

*

قیزیل اوزوک دار بارماق

اؤیره‌نیرم تار چالماق

منیم نه واختیم ایدی

بوْشانـیب ائوده قالماق

*

آلمالار بوداق بوداق

یاراندیق بیز، غم اوتاق

نئیله‌میشدیم، کؤسموسن؟

نه ائیله‌ییم باریشاق

*

من یاری گؤردوم بایاق

الینده ساری داراق

قاچدیم توتا بیلمه‌دیم

سیناسان بئله آیاق

*

توت آغاجی پیتـیراق

چادیر چالاق اوْتوراق

بیرین سن دئه، بیرین من

قوْی بو غمدن قورتولاق

*

آبی پاچین، گوی داراق

یاریمی گؤردوم بایاق

قاچدیم چاتا بیلمه‌دیم

سینایدی بئله آیاق

*

سو داغدان ملر گلیر

داشلاری د‌لر گلیر

ائلدن آیری دوشه‌نین

باشینا نه‌لر گلیر؟

*

پنجره‌دن داش گلیر

خومار گؤزدن یاش گلیر

سنی منه وئرسه‌لر

آللاها دا خوْش گلیر

*

کهر آت نالی نئـیلیر

آغ بوخاق خالی نئـیلیر

یاری گؤیچک اوْلان‌لار

دونـیادا مالی نئـیلیر

*

داغلار آلاهی نئـیلیر؟

بؤرکو کولاهی نئـیلیر؟

سن اوْردا یان من بوردا

گؤر‌ک ایلاهی نئـیلیر؟

*

های سالیرام اوْیانمیر

دردی غمه بوْیانمیر

عشق اوْدونا دوشموشوک

من یانـیرام اوْیانمیر

*

آراز آراز خان آراز

سولطان آراز خان آراز

گؤروم سنی یاناسان

بیر دردیمی قان آراز

*

داغلاردا قارا باخماز

چیچه‌یه، بارا باخماز

سنی گؤرن گؤزلریم

آیری بیر یارا باخماز

*

درد الیندن جان دورماز

یارام چوْخدور قان دورماز

منی بئله یاندیردین

اوْد دا ائله یاندیرماز

*

سونبول یاغیش‌سیز آچماز

آی گون ایلن قاریشماز

فلک آغلادان کیمه

دئـییب گولمک یاراشماز

*

نه‌دن‌دیر گئده‌ر قالماز

آخار سو گئد‌ر قالماز

وفالی‌یا جان قوربان

وفاسیز گئد‌ر قالماز

*

بوردا دورنا کؤچ سالماز

آلما گؤندرسم آلماز

غم یـئمه دلی کؤنلوم

زمانه بئله قالماز

*

بو داغدان آشماق اوْلماز

نارینجی باشماق اوْلماز

بیر قورو سؤز اوستونده

یارلا ساواشماق اوْلماز

*

بو داغدا ایلان اوْلماز

دردیمی بیلن اوْلماز

دردیمی بیلن اوْلسا

چاراسین قـیلان اوْلماز

*

باخچانـین اوستو اوْلماز

اوْجاق‌سیز توستو اوْلماز

دوْستدان دوشمان تاپیلار

دوشمانـین دوْستو اوْلماز