قــرا گــؤزونده گــؤزه ل قصــد جــان علامتـی وار
بو جـان اونونـدو قوی آلسیـن منـه نه منتی وار
***
گـؤزون گـؤز ائیلـه دی جـان آلماقا، قاشـون آلدی
بو امـر خیـر ده قاش و گؤزون، شـراکتی وار
***
بو درد هجر ایله ن اؤلمه ک اگرچه خوشدو منه
باشیـم دیزینده وئره م جان بیـر اؤزگه لذتی وار
***
نه قـدری اوخ آتا مژگـان لارین، توتـار سینـه م
سنیـن اوخونلــه منیـم سینه میـن رفاقتی وار
***
او خنجـرون، بو باشیـم، کس آپار منی، قورتار
چکنــمه رم بدنــه باشـیمــین اذیتـی وار
***
شکنج زولفـیـوی گؤرجـه ک دئـدی نجـوم اهلی
بو آی باشینــدا عجـب فتنه لـر قیامتـی وار
***
گَتـیر قدمـلریوه باش و جـان ائدیـم شـاباش
گؤروم بو جـان سـنه قوربـان اولا، لیاقتی وار
***
ملامـت ائتمــه منی مدعی اوتـان تاریدان
بو عشق، عشق مجازی ده گیل، حقیقتی وار
***
منیـم بو عشقیمه بنزه ر نئجـه سنین عشقین
ظهـوری منـده ائدیب جلوه؛ سنـده صحتـی وار
***
منیـم نگاریمی عاشـق گـؤزونده گـؤرمه میسـن
همین بو قدر ائشیدیبسن گؤزلدی، شهرتی وار
***
زبـان حـال ایلــه حالیمـدن ائتمیشــم حالی
چـوخ اهـل حالیـدی یاریـم، غریبه حالتـی وار
***
نه قدر من اونی چـوخ ایسته رم اوره ک دولوسی
اونـون منـه بیـره یـوز میـن ائلـه محبتـی وار
صراف تبریزی