دوکتور بویورور: «میــن جوره نعمت‌دن اوزاق گز
تاپسان، یئ بیرآز ســووزو- چؤره‌ک، ات‌دن اوزاق گز»
ائو صاحیبی، دستور بویورور: «ایل باشا چاتمــیش
مستأجر آقا! آرتیق اقامــــــــــــــت‌دن اوزاق گز»
واعظ بویورور: «پول‌کی وار، ال چیــــرکینه بنزه‌ر
قوی من تالاییم، سن، بالا! ثــــروت‌دن اوزاق گز»
گئــــــــــتسه قیزا ائلچی، آناسی تئز وئره‌ر اخطار:
«ائوله ماشینین اولماسا، وصلـــــــت‌دن اوزاق گز»
وارلی وئره‌ر احســـــــــــان، ائله‌یر پوللونو دعوت
سؤیلر فقیره: «گئت، بو ضـــــــیافت‌دن اوزاق گز»
آرواد بویورار: «آل منه بیر بوللو جـــــــــــــــواهر
یوخدوری پولون، ائوده محبـــــــت‌دن اوزاق گز»
قبره قویولان گون‌ده، «نکیر» سؤیلـــــه‌یه‌جک‌دیر:
دوز سؤیله‌ جواب، یئرسیز حکــایت‌دن اوزاق گز»
قبر اوسته گلیب گون‌ده، طلبکار دئیه‌جـــــک‌دیر:
«بوش چیخدی چکین، بوردادا راحت‌دن اوزاق گز»
قورخوم بودو، محشرده ملایک‌ده بویورســــــون:
«پولسوزلارا یئر قالمادی، جنّــــــت‌دن اوزاق گز»
گئتسه‌م‌ده بهشته، منه «رضــــــــوان» دئیه‌جک‌دیر:
«مئیوه یئمه، آرخلارداکی شــــربت‌دن اوزاق گز»
حوری دئیه‌جک: «بیرجه قاریش‌دیر بویون، آنـجاق
یورما الی، شومشاد کیـمی قامـــــت‌دن اوزاق گز»
چوخلار منه چوخ سؤز دئمیش، هم ده دئیه‌جک‌دیر
آنجاق دئمه‌ییرلر کی: «فلاکــــــت‌دن اوزاق گز»
تنقید یازانین، باش- قولاغـــــــــی ساغ قالا بیلمز
«آرش»! بو مقامات‌لا ظـــــــــرافت‌دن اوزاق گز!
حمید آرش آزاد