بیری وار ایدی، بیری یوخدویدو ،بیر قاری
وار ایدی. بو قاری نین بیر بالاجا نه وه سی
واریدی . نوه اوْ قه ده ر بالاجا ایدی کی
اوْنا جیرت دان دئییردیلر.
بیــــر گؤن جیرت دان گؤردو کی، قونشو
اوشاقلاری مئشه یه اوْدونا گئدیرلر،گه لیب نه نه سینه دئدی:
– آی نه نه ، اوشاقلارلا اوْدونا من ده گئده جه یم.
قاری اوشاقلاری چاغیریب هره سینه بیر پارچا یاغ یاخماجی وئردی. جیرت دانی دا اوْنلارا تاپیشیردی. یولدا جیرت دان اؤزونو یئره ووروب گئتمه دی، یولداشلاری دئدیلر:
– آی جیرت دان نییه گلمیرسن؟
جیرت دان دئدی:
– نه نه م منی سیزه تاپیشیریب ،منی دالینیزا آلیب آپارین.
یولداشلاری اونو نووبه ایله دالینا آلیب ، مئشه یه گتیردیلر.
اوشاقلار باشلادیلار اوْدون ییغدیلار.سونرا هر کس اؤز اودونونا شال باغلاییب دالینا آلدی.
گؤردولر جیرت دان اوتوروب باخیر. اوْنا دئدیلر:
– آی جیرت دان ،سن نییه اوْدونو گؤتورمورسن؟
جیرت دان جاواب وئردی:
– یورولموشام.نه نه م سیزه یاغ یاخماجاسی وئردی …
یولداشلاری اوْنون سوزونو آغزیندا قویدولار. اونلاردان بیری جیرت دانا آجیقلاندی:
– پیس اؤیره نرسن. داه
ا سنی دالیمیزا گؤتوره ن ده ییلیک!
جیرت دان علاجسیز قالیب یولداشلارینین دالیجا گئتمه یه باشلادی. اوْنلار بیر خیلی گئتدیکده ن سونرا آخشام اوْلدو. قارانلیق قوْووشدو، یولو آزدیلار. مئشه دن چیخاندا گؤردولر کی،بیر طرفدن ایشیق گلیر، اوْ بیری طرفده ایت هورور. بیری دئدی: ایشیق گله ن طرفه گئده ک، اوْ بیری دئدی: ایت هوره ن طرفه. بیلمه دیلر ها طرفه گئتسینلر. آخیردا جیرت داندان سوروشدولار:
– آی جیرت دان ،ایت هوره ن طرفه گئده ک، یوخسا ایشیق گه لن طرفه؟
جیرت دان جاواب وئردی:
– ایت هوره ن طرفه گئد سه ک، ایت بیزی قاپار ! ایشیق گه لن طرفه گئده ک ،بلکه یولو تاپیب بیلدیک!
اوْشاقلار ایشیق گه لن طرفه گئدیب بیر دیوین ائوینه چیخدیلار. دیو اوْنلاری گؤره نده سئوینیب اؤز-اؤزونه دئدی: ” یاخشی اوْلدو. گئجه اوْنلاری بیر-بیر یییه ره م “.
اوْشاقلارا بیر آز چؤره ک یئدیردیب یاتیردی. گئجه دن بیر آز کئچه ندن سونرا دیو اوشاقلاری یئمه ک ایسته دی. اوْ قالخیب و گئتدی کی دیشلرینی ایتیتسین . اوْشاقلارین یاتیب-یاتمادیغینی بیلمک اوچون دئدی:
– کیم یاتیب – کیم اوْیاق؟
بو سؤزو ائشیدنده، جیرت دان تئز باشینی قالدیریب دئدی:
– هامی یاتیب جیرت دان اویاق.
دیو دئدی:
– جیرت دان نییه یاتمیرسان؟
جیرت دان دئدی:
– منیم نه نه م هر گئجه منه قایغاناق بیشیریردی، یئدیریب یاتیراردی.
دیو قالخدی، تئز قایغاناق بیشیریب جیرت دانا یئدیردی کی،بلکه یاتسین. بیر قه ده ر کئچه ندن سونرا دیو یئنه سوروشدو:
– کیم یاتیب ،کیم اویاق؟
یئنه جیرت دان باشینی قالدیریب دئدی:
– هامی یاتیب ،جیرت دان اویاق.
دیو سوروشدو:
– جیرت دان ، ایندی نییه یاتمیرسان؟
جیرت دان دئدی:
– هر گئجه نه نه م منه چایدان قَلبیرله منه سو گه تیرردی.
دیو آیاغا قالخیب،بیر قلبیر گؤتوروب ، چایدان سو گتیرمه یه گئتدی. جیرتدان دا تئز یولداشلارینی اویالدیب دئدی:
– بو دئو بیزی یئمه ک ایسته ییر. قالخین ، قاچاق.
اوْشاقلار
تئز قالخیب چایدان
کئچدیلر. بو طـــرفده ن دیو
هر نه قده ر قه لــــبیری سویا
سالیب قالدیرســــــا، قلبیرده سو
قالمیر.
آخیردا تنگه گلیب قاییتماق ایسته ینده، بیردن گؤردو کی ، اوشاقلار چایین اوْ طرفینده گئدیرلر. ایسته دی سودان کئچیب اوشاقلارین داللارینا دوشسون، آمما کئچه بیلمه دی.
آخیردا اوْنلاری سسلدی:
– آی اوشاقلار ،سودا نه جوره کئچدینیز؟
جیرت دان تئز جاواب وئردی:
– گئت بیر دنه ده ییرمان داشی تاپ، بوینونا کئچیرت،اوزونو سویا آت ،اوْندا کئچرسن. دیو جیرت دانین سؤزونو ایناندی، گئدیب بیر ده ییرمان داشی تاپیب بوینونا کئچیرتدی، اؤزونو سویا آتدی،داش اونو سویون آلتینا چه کدی و دیو بوغولوب اؤلدو.
تیموری