روزنامه کثیرالانتشار سراسری صبح ایران
به دو زبان ترکی و فارسی

۱۳۹۷/۰۵/۳۰
روزنامه ساقی آذربایجان
آمار بازدید
  • کاربران حاضر: 0
  • بازدید امروز: 908
  • بازدید دیروز: 1,161
  • کل بازدید ها: 762,261
حاق آشیغی

حاقّی و عدالتی تبلیغ ائدن عورفان صاحیبی، صوفی شاعیر آشیق آلی نین یارادیجیلیغی ایله آشیق شئعیری نین یئنی عؤمرو، یئنی دؤورو باشلاندی.
۱۸۰۱-جی ایلده گؤیچه ماحالی نین قیزیل ونگ کندینده یوخسول بیر عاییله ده دونیایا گلن آشیق آلی ۱۹٫ عصر گؤیچه آشیق موحیطی نین ان اونلو صنعتکارلاریندان بیری اولدو.
جامالین شؤوقوندن دیلیم اولــــدو تنگ،
چایـــــــــــدا بالیق اولار، دریادا نهنگ،
ماحالیم گؤیچه دی، کندیم قیزیل ونگ،
آشیق آلی بیردیـــــــــر، بیره-بیر گرک.
اوغلونون درراکه لی و حسساس بیر اوشاق اولدوغونو ائرکن یاشلاریندان حیسس ائدن آشیق آلی نین آتاسی میرزه کیشی اونو اوخوتماق قرارینا گلیر. آلی موللاخانادا تحصیل آلسا دا، ایچینده اولدوغو آشیق موحیطی اونو داها چوخ چکیر.
آلی نین گؤزل و ملاحتلی سسیندن خبر توتان آتاسی اوغلونو گؤیچه نین کرکیباش کندینده یاشایان آغ آشیغا شّییردلیگه وئریر.
ایلک گونلردن شییردی نین فیطری ایستعدادا مالیک اولدوغونو دویان آغ آشیق آز مودتده بوتون ساز هاوالارینی آلییا اؤیره دیر.
دئییلنلره گؤره، آشیق آلی بویو ایکی مئتردن اوجا، ائنلی کورک، ساریشین، قومرال گؤزلو بیر آدام اولموشدور. ملاحتلی سسی، اولدوقجا شیرین لفظی، داستان سؤیله مک قابیلیتی اونو اینسانلارا سئودیرمیش، دؤورونون نادیر شخصیتلریندن بیری کیمی آد-سان قازاندیرمیشدیر. آشیق آلی نین سسی-سوراغی تئزلیکله گؤیچه نین حودودلارینی آشیر. اونون حیاتی و آشیقلیق فعالیتی ایله باغلی معلومات وئرن قایناقلاردان بیری ” آشیق آلی نین تورکییه سفری ” داستانیدیر. آلی نین داستانداکی آشیق اوبرازی حاق آشیغیدیر. کلاسسیک محبت داستانی تیپی ایله ” آشیق روایتی ” آراسیندا اورتا مؤوقئعده دایانان بو داستان آشیق حاقیندا یادداشلاردا ساخلانیلان بیلگیلرله زنگیندیر.
داستاندا آشیق آلی نین گؤیچه ماحالی نین چامیرلی کندینده نیفتالی آدلی وارلی بیر کیشی نین بستی آدلی قیزینی سئودیگیندن بحث ائدیلیر. باشلیغی وئره بیلمه ین آلی ناخچیوانا، تورکییه یه سفر ائدیب بو دییارلاردا آشیقلیق ائدیر. سئوگیلیسینه ایکی ایله گله جگینی دئسه ده، همین مودتده آشیق آلی وطنه دؤنه بیلمیر. قوربتده هم یئرلیلریندن بیرینه راست گلن آشیق ” دئیینن ” ردیفلی قوشماسینی یازیب گؤندریر:
قاصید، گئدر اولســــــــــــــان بیزیم ائللره،
بو نامه نی او جـــــــــانانا دئیینـــــــــــــــن.
قوهوم-قارداش، دوست-موصاحیب اولانلار،
گؤز دیکمه سین باشـــــــــــــــقا یانا دئیینن.
قیزین آتا-آناسی اونو زورلا باشقاسینا اره وئرمک ایستسه لر ده، آشیق آلی دوغما وطنینه سئوگیلیسی نین تویونون باشلاندیغی گون گلیب چاتیر و داستان خوشبخت سونلوقلا بیتیر.
” آشیق آلی و اسمر خانیم ” داستانی ایسه ” آشیق آلی نین تورکییه سفری ” داستانی نین واریانتیدیر.
آشیق آلی گؤزل شاعیر اولماقلا یاناشی، هم ده ساز هاوالاری نین میثیل سیز یارادیجیسی کیمی تاریخه دوشوب. ” گؤیچه شریلی ” ، ” گؤیچه گولو ” ، ” آغیر شریلی ” ، ” گؤیچه قایتاغی ” ، ” قهرمانی ” ، ” ائل بایاتیسی ” ( ” کؤچ بایاتی ” )، ” گیله نار ” ساز هاوالاری نین آشیق آلی طرفیندن یارادیلدیغی هئچ کیمه سیرر دئییل.
اونون عظمتلی و مؤحتشم پوئتیک دوهاسی اینسان گؤزللیگینی، هارمونییا و آهنگدارلیغی موکممل صنعت نومونه سی کیمی تقدیم ائتمه یه ایمکان یارادیر.
سوسنلی، سونبوللو، تر بنؤوشـــه لی،
یایــــــلاق، بیزیم یایلاقلارا بنزرسن.
ایچن اؤلمز سنین کؤوثر سویوندان،
بولاق، بیزیم بولاقـــــــلارا بنزرسن.
آشیق آلی یارادیجیلیغیندا صمیمی اینسان حیسسلرینی یوکسک صنعتکارلیقلا قلمه آلیر:
ایستکلی سئوگیلیم، گلدیک اوز-اوزه،
الیمــــــــــــــــی الینه آل گوله-گوله.
چوخ گزدیم دونیانی، سئچه بیلمه دیم
سنین تک گؤزلـــدن، آل گوله-گوله.
آشیق آلی نین اؤز دست-خطی ایله یازدیغی اوچ کیتاب الیازماسی شئعیرلری و اوستادی آغ آشیقدان یازدیغی بیر کیتاب الیازماسی ۱۹۳۸-جی ایله دک کلبجرده ” دیلسوز و خزانگول ” داستانی نین مؤلیفی آشیق نبی نین شخصی آرخیوینده ساخلانسا دا، تأسوف کی، بو نادیر نوسخه همین ایل آنلاشیلمازلیق اوزوندن یاندیریلمیشدیر.
آشیق آلی نین ۲۰-دن چوخ شّییردی اولدوغو دا معلومدور. آشیق علسگر، آشیق مئهدی، آشیق محمد، آشیق هوممت کیمی قودرتلی صنعتکارلار اوستادین الیندن سو ایچمیش، اؤزلری ده اوستادلیق سویییه سینه یوکسه لیب، اوستادلاری نین اوزونو آغ ائتمیشلر.
بو گون بیر حیکمت گؤرموشم
عالمــــــــــــــــه ایمان وئریر،
یئدیگی تکـــــــــــرار یئییلیر،
هامیسینـــــــــــی تامام وئریر.
اؤزو عالمی دویـــــــــورور،
ناله چکیـــــــــــر، آجام من،
اونون نه کی یئمــــــگی وار،
جمعینی اینســـــــــــان وئریر.
آشـــــــــــــیق آلی بؤیوک تجنیس اوستاسی

اولدوغوندان ائل آراسیـــــندا اونو
” تجنیس آلی ” ، ” لوغمان آلی ” ،
” دده آلی ” ، ” شیـــــــــــخ آلی ”
دا دئیه چاغیرارمیــشلار. آشیغین ادبی
ایرثی بوتؤولوکده بیزه گلیب چاتماسا دا،
الده اولان قوشــــــما، تجنیس، تصنیف،
بایاتی، گرایلی، اوستادنامه، دئییشمه لرین هر بیری اصیل صنعت نومونه سیدیر:
هاوالانــــــــــما، دلی کؤنول،
زورونان ایشیـــــــــــن ندی؟
منصور تکی حلبـــــــــــــده
دارینان ایشیــــــــــــن ندی؟
توت اوروجون، قیل نامازین،
شوکور ائت آلــــــــــلاهینا،
یوخسولسان، آلچاقدان یئری،
وارنان ایشیـــــــــــــن ندی؟
دئییلنلره گؤره، آشیق آلی عؤمرونون آخیرلاریندا دونیا ایشیغینا حسرت قالمیش، اؤز ایشیقلی سؤز دونیاسیندان دونیایا بویلانمیشدیر.
چکمه خجالتی، اونوتما عـــاری،
ساخلا بو سینه ده عار، آشیق آلی.
بیر زامان آقیلدیم، باشدا اَیلشـــن
ایندی ده آیاقدا کور آشیـق آلی.
۱۹۱۱-جی ایلده دونیاسینی دییشن صنعتکاردان گله جک نسیللره بؤیوک بیر ایرث میراث قالدی. آشیق آلی هم ده تاریخه آغ آشیغین شّییردی، آشیق علسگرین اوستادی کیمی دوشدو. بو اوچ صنعتکار – آغ آشیق، آشیق آلی، آشیق علسگر ۱۹٫ عصر آشیق ادبیاتی نین اوچ گئدیشلی-گلیشلی، ابدی یولونا چئوریلدی.
ترانه واحید
قایناق : مدنیت آز
کؤچورن : ع.ائلچین

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز