حسین منزوی ۱۳۲۶ جی ایلده زنگاندا بیر ادب سئوه ر عاییله ده آنادان اولدو. آتاسی – محمد منزوی، زنگانین آدلی – سانلی تورکجه غزل شاعیری دیر. حسین ده بئله بیر آتانین خلف اوغلو کیمی، گنج یاشلاریندا شعر و ادبه ماراق بسله ییب و شعرلر یازدی. چوخ کئچمه دن چوخلو آدلیم ایران شاعیرلریله آیاق بیر اولوب، چاغداش فارس غزلینده بیرینجی یئری اؤزونه باغلامیشدیر. حسین منزوی نین شعرلری اساسیندا بیر نئچه موسیقی آلبومو دا یاییلیبدیر. زنگانین ده یرلی مغنی سی – یوسف تاور، منزوی
نین تورکجه شعرلرینی آذربایجان موسیقی سینده بسله میش و گؤزل بیر آلبوم یاراتمیشدیر. فارسیجا شعرلرینی ده افتخاری و باشقا فارس خواننده لری اوخوموشلار.
حسین منزوی ۱۳۸۲ جی ایلده گؤزونو بو دونیادان یوموب، دونیاسینی دگیشدی.
حسین منزوی فارسیجا بیر نئچه شعر دفتری معروفدور. بوگون فارسیجا شعر یازان شاعیرلر آراسیندا درین بیر حؤرمته مالیکدیر. اونون شعر دفترلری نین نئچه سی بونلاردیر:
شعرها و حنجره ها
دومان (ترکی)
این ترک پارسی گوی – اوستاد شهریار حاققیندا ادبی آراشدیرما
منزوی غزل اوستادی اولاراق، تورکجه دیوانیندا – “دومان” آدیلا، چوخلو قوشمالار و بایاتیلار یازمیشدیر. ایندی بیر نئچه بایاتی و ایکی شعرینی بیرگه اوخویالیم:
حالیم یامان اولدو، گل،
صبریم تالان اولدو گل؛
پیچاق سومویه ده یدی،
اوره ییم قان اولدو گل!
بیلمه ین وار، بیلن وار،
گولمه ین وار، گولن وار،
اوره ییم سس ائشیدیر،
ائله بیل کی گلن وار.
قاشین گؤزه ن یاراشیر،
آغزین سؤزه ن یاراشیر،
هر بیر زادین یئرینده،
اؤزون اؤزه ن یاراشیر