دمیر یولوندا

یاغیشین آلتیندا دمیر یولوندا
گؤزلریم یول چکیر گلیرسن دییه
دیشلریم سوکوتو چئینه ییب دورور
اوره ییم اووجومدا سنه هدییه
اومودلار ایچیمده حال با حال اولور
بیر فیشقا سسیله،دیزلریم اسیر
ایچیمده کی اؤزلم قرارسیزلانیر
اوره ییم اؤزومدن اؤنجه تله سیر
یولچولار ائندیکجه سریلدیم یئره
یویولدو یوللارا مین لرجه دیله ک
سنسیز گلدى قاطار یول آلیب گئتدى
تیکانا چئوریلدی الیمده چیچه ک
اوره ییم باغیریر دیلیم لال اولور
یوخلایا بیلمیرم کیمسه دن سنی
تانری اؤفکه‌ سینى دؤیور باشیما
بللى، اؤلدوره جک بو یاغیش منی
بو قاطار بو یاغیش سسیز گئجه ده
اورکودور جانیمی اؤلوم قوخویور
مزاریم سون دوراق، قاطار عجلیم
یاغیشسا باشیمدا قورآن اوخویور
سئوگیمیز ایچیمده دیز اوسته چؤکوب
گؤزومو باغلاییر اینجه داملالار
هر قاطار فیشقاسی هر یاغیش سسی
سئوگیلیم فرزینی یادینا سالار
فرزین نقی یان

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz