روزنامه کثیرالانتشار سراسری صبح ایران
به دو زبان ترکی و فارسی

۱۳۹۹/۰۷/۰۹
روزنامه ساقی آذربایجان
تبلیغات
آمار بازدید
  • 0
  • 134
  • 814
  • 1,335,870
دنی آز اولسا دا ، سویو چوخدور

قدیم زامانلاردا ، اوجسوز- بوجاقسیز بیر قوشون بیزیم اؤلکه یه یوروشه کئچدی . اونلار چالیردیلار ، چاپیردیلار آنجاق یورولماق دا بیلمیردیلر ، دویماق دا !
چاپا – چاپا گلیب گونئی ماحالینا چاتدیلار . آتی دا یئییردیلر، ایتی ده . بونلارین آغیزیندان حئیوانلارین قویروغونون اوجو دا یئره دوشموردو ؛ آرتیق آداملارین اتینی کاباب چکیب ، یئییب ، یاغ – سومویوندن ده شوربا پیشیریردیلر.
جاماعات قاچیب داغا ، ماغارا سیغینمیشدی . قاداش آدلی بیر کیشی ده باشقالاری کیمی قیتلیق دان بیر دری – بیرسوموک اولموش دور . اونون ، آریق لیقدان قابیرغالاری دریسینی دیشلیردی .
قاداش هارادنسا بیر آز چؤرک تاپدی . بالالارینی دویوراندان سونرا ، اؤزوده یئییب ، دویماق ایسته دی . آنجاق چؤره یین دیش کسمز قیراقلاری قالمیشدی . کؤنلونه شوربا دوشدو . نه ایله شوربا دوزلتمه یینی بیلمیردی . بیردن آناسینین شوربا پیشیرمه سی یادینا گلدی ؛ ائوه قفیل دن قوناق گلنده آناسی ایکی چاناق سو ایله بیر قیرتیم دوزو چؤلمه یه آرتیرماقلا ایشی قوشاردی . دئمک ، شوربانین سویونو آرتیراردی . قوناقلارا دا دئیه ردی :
– دنی آز اولسادا سویو چوخدور ، دوغرایین ، یئیین ! دوزودا چوخدور ، اوره ییزی توتار !
او زامان سو بول ایدی . دوز ایسه تاپیلمیردی . اونا گؤره ده دوز چؤرک دئیه ن ده قدیم دوز چؤرک لر. شوربا دوزلتمه یه دوز گرکلی ایدی . قاداش دوزو گزه- گزه شرفخانا لیمانیندان باش چیخارتدی . اورا دا دا دوز یوخ ایدی . آنجاق اورمو گؤلونون شور سویو دالغالانیب ، ساحیله چیرپیلیب ، گؤیه سوورولوب ، بولودلاری دا ایسلادیردی .
قاداش چؤره یینی گؤلون سویوندا ایسلادیب ، تیلته سینی یئدی . آزجا دویان کیمی اولدو . اوزانیب ، دینجلمک ایسته دی . بیردن نئچه دویماق بیلمه ین گؤزو آج چاپقینچی اونو آرایا آلدیلار. قاداش اونلاردان چکینسه ده ، اونلاردا ائسکئلئت کیمی قبیردن چیخمیش اؤلویه اوخشایان قاداش دان قورخوردولار . آنجاق، دیدیلیب- داغیلماق قورخوسو قاداشی جایدیرمادی . او ، درین دن نفس آلیب ، دؤشونو قاباغا وئریب ، چاپقینچی لارا دئدی :
– گؤرورم یاوانلیق آختاریرسیز !
دئدیلر : – هن !
دئدی : – چؤره ییز اولسا ، بوتون قوشونوزا شوربا وئره رم !
دئدیلر : – بو داغ – داشین بوغداسینین چؤره یی بیزیم دسترخان دا دیر . ایندی ده سنی یاوانلیق ائتمک ایستیریک !
قاداش ، اولسون اؤزوم ده شوربانین دنی اولارام ! – دئییب، قیوراق چپیش کیمی بیر داشین اوستونه آتیلدی . اؤزونو شوربانین دن- دؤشو کیمی گؤسته ره رک ، اورموگؤلونه جومدو . آج چاپقینچی لار ماریت – ماریت باخیب ، اوولاری نین اللریندن قاچماسیندان تعجوب لنیردیلر . بیردن قاداش باشینی سودان چیخاریب دئدی :
– دنینین آزلیغینا باخمایین ! دنی آز اولسادا ، سویو چوخدور دوغرایین ، یئیین !
دئیه نلره گؤره بوتون قوشون شوربا یئمه یه یوروشه کئچدی . یئدیلر ، یئدیلر….. گؤلون بوتون سویونو قوروتدولار . آرتیق آغاران دوزلارینی دا یالادیلار . قاشیق لارینا دن گلمه دی . دئمک قاداش ، اورمو گؤلونون مارال سیغینان آدالاری نین بیرینه سیغینمیشدی .
دئیه ر لر او شوربا ، او قوشونو نئجه ایناندیغیز کیمی سوسوزدوردو . اونلار اورادان چیخیب قاچماغا مجبور اولدولار . اولا بیلردی عوممان دنیزینه ، فارس کؤرفزینه ساری اوز قویوب قاچسین لار .
بو گونلر ده اورمو گؤلونون قوروماسی ، منی بیر داها اویدوردو . اونا گؤره ده بو قوروماق ایله او قوروماغین ، اوخشار – اوخشاماز یؤن لرینه فیکیرلشدیم .
اؤنجه اوخشاماز یؤن لر :
– اوندا قاداشین گؤستریشی ایله ،موهاجیم قوشون ، گؤلو قوروتموش دور ؛ ایندی ایسه گؤرونوشه گؤره ، قاداش اؤزو گؤلو ایچیر، قورودور .
– اوندا سئچمه دئییلدی ، دولدورما ایدی ؛ دوزونو دا یئییر دیلر ، سویونودا ؛ ایندی ایسه ، دوزونو ساخلیرلار سویونو ایچیرلر .
– اوندا جاماعات بیر قیرتیم دوز آختاریردی ؛ ایندی بیر چیرتیم سو .
– اوندا گؤل قوروسادا، ایچینین باشا- باشیندا “بوغدا” گؤیه رردی ؛ ایندی بوغدا سهل دی ، او هنده ور ده بیر کیشی نین دوداغی اوسته “بوغ “ دا گؤیه رمه یه جک .
– اوندا اورمو گؤلونون قیراغی کروان یولو ایدی ؛ زینقیروولاری زینقیلدایا- زینقیلدایا دوه کروانلاری کئچردی . بوندان سونرا، اورادان بیر یولونو آزمیش قاتیر دا کئچمه یه جک . آرتیق قاداشی “ قاتیرچی نین یوخ قاتیرینی نه یه اورکوتدون “ – دئیه ، دؤیه جکلر .
– اوندا اورا یوروشه کئچن لر قاچدیلار ؛ ایندی اورادا یاشایان لار قاچاجاقلار.
دئیه سن او چاغ ایله بو چاغین بیربیرلرینه اوخشامایان یؤن لرینی سادالاماق ، اوخشار یؤن لرینی سایماغا ماجال وئرمه یه جک . باشیزی آرتیق آغریتماییم – دئیه ، اوخشامایان یؤن لری سادالاماق دان واز کئچیرم ، ائله جه ده اوخشار جهت لرینین حاققیندا دوشونمه یی سیزه بوراخیرام .
گؤستریش اوچون ، اوخشار یعنی بنزر . منیم بو گؤزوم بو بیری گؤزومه بنزه ییر ، یعنی اوخشاییر . من سیزه اوخشاییرام ، سیزده منه ! دئمک آرزی- دیلک لریمیز ، کؤنول ایستک لریمیز ، یولوموز بیردیر!
ائله ایسه دئیه ک :
چاغلاداق چایلاری ، دالغالاندیراق اورمو گؤلونو ، یاشاداق قاداشی ایله قاداش لاری !
اکبر صالحی ( قاداش )

دیدگاه بگذارید

avatar
  Subscribe  
باخبر شدن از
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز