روزنامه کثیرالانتشار سراسری صبح ایران
به دو زبان ترکی و فارسی
۱۳۹۹/۱۱/۰۵
– گلین… گلین!
من کی گلین دئییلدیم. فیکریم قالمیشدی. مندن قاباقدا گئدن کؤلگه‌‌مده. اونون دا چیین‌لری دؤشونه لنگر سالمیشدی. خبریم اولمادان، کؤلگه‌م ده من ایله برابر قوجالیرمیش.
بئلیمی‌دیکلتدیم.کؤلگه‌م یئرده شاخ اوزاندی. گلین سسینی ائشیتمه‌میش کیمی باش آلیب، یولومو گئتدیم.
– گلین!… آی گلین، سنیلنم‌هاااا.
سس اوجالمیشدی. اؤز- اؤزومه دئدیم: «آخی ۵۲ یاشیندا دا گلین اولار؟»
ایسته‌دیم گلین سسی گلن طرفه دؤنوم، قارانلیق کؤلگه‌م ایستی قیر کیمی یاپیشدی آیاغیما. بیلینج آلتیمین* سسی ایچیمدن قالخدی: «باشیوی سال یولیوی گئت. دیلنچی‌دن زادداندی»، دئدی.
دئیه‌سن گئنه کؤلگه‌مله بیلینج آلتیم اَل بیر اولموشدولار. منه گؤره بیلینج آلتی دا ذهنین آیریلماز کؤلگه‌سی‌دیر. منیم ذهنیم‌له جیسمیمین کؤلگه‌لری بیر- بیرلرینه بنزه‌ییرلر. بیلینج آلتیم، یئر آلتیندان یاسا گئدنلردن، گؤلگه‌م ایسه، سامان آلتدان سو یئریدنلردندی. ایکیسی هیم‌له‌شنده، شعوروم اَل- آیاغینی ایتیریب، ایکی هاوالی قالار.
بئینیمده دینجه‌لن شعوروم یئرینده قایناشیب، دئدی: «تبریز دیلنچی‌سیز شَهردیر. بوردا دیلنچی نه قئیریر؟!»
بیلینج آلتیم شعورومون سؤزونو یاری کسیب، دئدی: «کئچلین آدینی قویارلار زلفعلی. سن هله کلاسیک دیلنچی‌ایله، مدرن دیلنچینی بیر- بیریندن سئچه بیلمیسن!»
شعوروم سسینی اوجالتدی: «خطا اولماییب کی او اتریش‌لی کیشی سنی نم‌هانسی دیب- بوجاقدان چیخاردیب، آدام اوزلو ائله‌دی! هر شئیی‌ین شوُرون چیخارتدین. اولمویا دیلنچی‌لیک ده بیر ادبی ژانردیر؟ نه دخلی وار مدرنیزم‌دن کلاسیکه؟»
شعورومون آتماجا سؤزو بیلینج آلتیما توخوندو. «اؤزیوی لوغازا قوی» دئدی. کؤلگه‌م اؤنومده اوزانیب، اؤزونو گونشه وئرمیشدی. بیلینج آلتیم منی سس‌سیز گؤرونجه، مئیدان گؤتوردو. دیلی آچیلدی:
«سن هله بیلمیرسن بو شهرده نئجه دیلَنچی‌لیک ائله ییرلر! آیاغیوی قوی کره‌نئی خانا آغزینا، ایستیرسن بیر کیلو میوه آلاسان، بیر قوجا آرواد، یا بیر قوجا کیشی اَییلیب، قولاغیوین دیبینه پیچیلداییر: “بالا، بیر کیلو دا منه یئرآلما- سوغان آل. پیشیرمه‌یه ائوده بیر چؤپ بئله یوخومدی” . یا گؤرورسن داواخانا قاباغیندا، الینده نوسخه… سنین کیمی‌شعورا ائله یاراشیر گؤزونو یوموب، بوغازینی جیرسین، هئی دئسین کی تبریز دیلنچی‌سیز شَهردیر!»
منسه ایکی هاوالی قالدیم. شعورومون سؤزونه باخیم، یوخسا بیلینج آلتیمی دینله‌ییب، سسی ائشیتمه‌میش کیمی باش آلیب، گئدیم.
– قیزیم، سنیلنم‌ها… بورا بیر باخ!
قیزیم سسی ائشیتدییمده، شکّ- شوبهه یاغ کیمی بئینیمده اَریدی. سسه ساری دؤندوم. یاشلی بیر خانیم‌ایدی، اوتوبوس دوراغینین صندلیندن منه ساری اَییلمیشدی. خانیما ساری گئدنده، گؤلگه‌م تله‌سیک بؤیرومه دورتولوب، منیم‌له برابر گلدی.
خانیم الینده‌کی اسکناسی منه ساری اوزالتدی: «قیزیم قیچیم توتولوب یئرییه بیلمیرم. منه بیر تاکسی چاغیر.»
خیابانا ساری گئدنده، کؤلگه‌م اوتانیب، آرخامدا گیزلندی. بیلینج آلتیم‌لا شعوروم لال اولموشدولار…
بیلینج آلتی: فارسجا ناخودآگاه معناسیندا.
رقیه کبیری
برای عضویت در خبرنامه پیامکی، اطلاعات خود را وارد کنید
Loading ...از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.
دیدگاه بگذارید