دیل یاراسی

دئییر : بیر اودونچو هر گون مئشه یه گئدیب ، اودون قیریب سونرادا گتیریب بازاردا ساتاردی . بیر گون کیشی اودون قیراندا بیر آیی قاباغینا چیخیر . آیی اونا دئییر کی:
_ من اودون قیریب داشیماقدا سنه کؤمک ائده جگم . سن ده عوضینده منه یئمک وئر .
اودونچو آیی ایله ایشه ال قوشان ، گوندن چوخلو اودون گتیریب ساتیب ، گذرانی چوخ یاخشی اولموشدو . بیر گون اودونچو آیی یه یئمک وئرنده قاییدیر کی :
_ آدام کیمی یئیه بیلمیرسن ؟ نییه ایت کیمی گوه له ییر سن ؟
آیی دورور آیاغا یولا دوزه لیر . اودونچو نه قده ر چاغیریرسا جواب وئرمیر . آرادان بیر _ ایکی گون گئچیر . بیردن نئجه اولورسا اودونچو گئنه آیی ایله راستلاشیر .
سوروشور :
_ آی آیی سنه نه اولوب ؟ نییه منه کؤمک ائله میرسن ؟
_ تئز اول الینده کی بالتا ایله منیم باشیمی یار . یوخسا سنی پارچالارام .
اودونچو جانی نین قورخوسوندان آیی نین باشینی یاریر . آیی باشینین قانی آخا _ آخا دینمزجه چیخیر گئدیر .
اودونچو بیر _ ایکی آی سونرا آیی ایله راستلاشیر . آیی باشینی اودونچو یا گؤستریب سوروشور :
_ باخ گؤر یارانین یئری ساغلیب یا گئنه قان گلیر ؟
اودونچو باخیر کی آیی نین باشی لاپ ساغالیب . آرخایینجا قاییدیرکی :
_ تامام ساغالیب . ائله بیل هئچ یاراسی اولماییب . آمما من هله ایندی ده بیلیرم کی سن نییه باشینی یاردیردین !
_ یادینا گلیر می سن چؤرک یئینده سینه مه سؤز یاراسی ووردون ؟
سونرادا من سنین الینله اؤزومه بالتا یاراسی ووردوتدوم ؟ ایندی بالتا یاراسی ساغالیب آمما او دیل یاراسی ساغالمیر کی ساغالمیر .
آیی بونو دئییب اودونچو دان اوزاقلاشیر . بیرده اونون گؤزونه گؤروشمور .
عزیزیم دیل یاراسی
آغیردیر دیل یاراسی
خنجر دگسه ساغالار
ساغالماز دیل یاراسی
حاضیرلایایان: شبنم توحیدی
« تانسو خیاولی»

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz