ای حضرت مسئول! مسلمان! دی! تکان یئه!
ائیله باهالیق دردینه درمان دی! تکان یئه!
اولماز هره اؤز سئودیگی قیمتله کی ساتسین
بازاره بیر آز وئر سر و سامان دی تکان یئه!
ال چک میراثا قالمیش او میر میز دالیسیندان
دئینه: اولا لعنت سنه شیطان!! دی تکان یئه!
چیخ گل بازارا گؤرنه ساتیرلار نه یئییرلر
بیر جیزبیزا ائت شاعیری مئهمان دی تکان یئه !
چیخدی قاتیغین دولچاسی اون بئش مینه واخ واخ
اولدی کاسیبین باغری بوتون قان دی تکان یئه!
هر شی باخیسان اوستونه اون – ییرمی قویوبدور
قیمتلر ائدیر شهرده طوفان دی تکان یئه !
آقای نماینده !!! نظارت هارا گئتدی
دؤرد ایل یئتیشر باشه آی اوغلان! دی تکان یئه!
اوندا رأی آلان واختیدا انگین چالیشیردی
ایندی نه گلیب بس سنه قوربان !!دی تکان یئه
مجلس ده دانیش لایحه وئر راحت اوتورما
شکر آللاها ساغدیر هله اومبان دی تکان یئه
آقای وزیر!! اولمایا راحت یاتیسان ! هه !؟!
چنته نده نه وار ائیله نمایان !دی تکان یئه!
دابباغ دوتوب اولما ایاغون کتده اینک تک
آی دیلده اولان تالی اصلان دی تکان یئه !
صبح اولدی آییل !! هاممی آییلدی نه یاتیبسان!
قویما سنی کاردان سالا یورقان دی تکان یئه
نه واختاجا بیر یئرده قالیب ایله نه جکسن
آخ چای کیمی دریایه مسلمان! دی تکان یئه !!
هر یئرده کی رهبر بویوران سؤزلره باخدیز
مشکل لر اولوب اوردا چوخ آسان دی تکان یئه
آمریکایا بئل باغلاماغین فایداسی یوخدور
بوشلا او ابرقدرتی الان ! دی تکان یئه !!
دونیاده گره ک کشوریمیز باش اوجا اولسون
دونیاده گره ک آدلانا ایران دی تکان یئه !!
علی شهودی بستان آباد