رقیه کبیری نین « تبریزیم آل تبیمی » کیتابینا بیر باخیش

آذربایجان قادین شعری نین ایران چرچیوه سینده یازیب – یارادان آدلیم سیمالاریندان بیری ” رقیه کبیری “دیر. او ۱۳۹۰جی ایلده ایلک شعر مجموعه سینی یازیب یایسادا، یارادیجیلیقی نین ایزلری و چوخلی اثرلری کئچمیش ایللرده چئشیدلی درگیلرده چاپ اولاراق، ادبیات وورغونلارینا تانینمیش بیر آد ساییلیر. شعرلرینی سربست فورملاردا یازان شاعیر، ” هیجا – هیجا هؤرولن سسینی ” دویدورماق اوچون ” بیر نفس، یالنیز بیر نفس لکه سیز هاوا ایسته ییرم ” سؤیله مک له ” داماری نین هر وورغوسوندا بیر شعر دویغوسو ” ایزله دیر. او حیاتی بیر قادین کیمی گؤرور و اؤزو دئمیشکن :
” آچیلمامیش پرده،/ باغلی پنجره نین چاتلاق شوشه سیندن/ سیزان هاوادیر یاشام!/ بلکه ده بیر قادین دیر / گوزگوله نیرکن/ اونودور/ ساچلاری نین قیریلمیش تئللرینی / داراغین دیشلرین ده / قیزدیریر اللرینی / فینجانلارین قیزغین هاواسیندا … “
قادینلیق اسرارینی داشی یان ” قیزلی قیزیل لی ” بو شعر توپلوسوکی ” تبریزیم ، آل تبیمی ” آدی لا یاییلیب ، تکجه خیاللار دونیاسینی ترنّم ائتمه یه کیفایت لن مه ییب بلکه بوتون ادبیتی له ” عوصیان بوغازی ” کیمی بیر اوبراز داشی ییر:” آنام / ایلمه ایلمه / قیز بسدی توخویور” وهابئله شاعیرلیریک دویغولو سئحیرلی لوحه لرین یارادیجی سی اولور :
” بولودلار یاغمورلو/ کئچن هفته بیرلیکده آددیملادیغیمیز/ آخشام کیمی . / خییاوانلار سن سیز/ سسین قولاغیمدا! یاغمورون دامجی لاری / ساچلاریمدان اوره ییمه دوغرو یوخ، گؤزلریمین چوخوروندا گؤل باغلاییر! “
شاعیرین شعر دیلی بیر پارا اؤزل لیک لره شامیل دیر کی او جمله دن کلمه لردن یئنی فعل یاراتماقدیر و بو آرادا “گوزگو لنمک” آیدین بیر میثال دیر. هابئله چاغداش لیقین دیجیتال تأثیری کی تئلویزیون کانال لاریندان آخیجی اولاراق تورک دیللرینه آخیری او قدر گوجلودور کی تورکیه تورکجه سی نین لوغت لری، اونون شعرلرینده آزگؤرونمور . میثال اولاراق : چاپقین لیق، ساقین، ماسا، رئکلام، دوراق ، اوچاق، کؤی، ندن، خولیا و. . .”
بو شعر توپلوسونون گؤزل لیک لریندن بیری ده آذربایجان فولکلوروندان باشاردیقجا فایدالانماق دیر و بیر پارا افسانه وی شخصیت لر موعاصیر حیاتدا جانلی اولاراق، دیرچه له نرکن چاغداش رُل لار ایفا ائدیرلر :
ساریمتیل گئجه سانجیلاندی / دوغدو منی گونه باخان تارلاسینا/ ساری گلین/ اوره یینی سرگیله میشدی شهریمین یولارینا…”
“رقیه کبیری ” آذربایجانین چئشیدلی جوغرافیاسینا دا شعرده رسم ائتدی یی ناخیشلاری ایلا گئنیش یئر وئره رکن، او کؤی و شهرین تانینمیش یئرلرینه ده جان وئریر:
” بیری بوغولدو ” آبرسان ” دا دالغالارا/ بیری ایسه “عینالی “اته یین ده / ” باغمئشه ” ده ساریلدی قیرمیزی تورپاقلارا…”
شاعیرین بو ایلک اثری یئنی دوغموش بیر عاطیفه لی و خییال یئلکنی گوجلو اولان بیر یاردایجی صنعتکاری بیزه خاطیرلادیر کی شعریمیزین پارلاق ایسم لری سیراسیندا یئرآلیر. بئله دئمک کی بیر نئچه آدین سیراسیندا قادین شعریمیزین تمثیل جی سی سیماسی اولور. من رقیه کبیری نی، لاله جوانشیر، زیبا کرباسی، نگار خیاوی و حمیده رئیس زاده ( سحر ) کیمی شاعیر لر سایاقی گؤرورم کی اونلارین تأثیر گوج لری شعریمیزی قایاقجیل آددیملارلا دونیا پوئزیاسینا دویونله ییرلر . بو اوزدن ایسه شاعیرین اَن دویغولو و اونودولماز بیر شعری ایلن بو قیسا یازییا سون وئریرم :
هی …!
باشینی بیر قالخیز…
ماتادور شینئلیم یئلله نیر
گؤرمه دین می !؟
سیرغالاریم دسمالیمین رنگین ده
دیک دابان چکمه لریم قوملارا قویلانیب
باااخ !
دسمالیم قیپ قیرمیزی …
باری ایاق دؤی یئره
توزتورپاق اولسون…
یوخسا اسپانیانین یوخولارین دا
سیرغالی ماتادور اویوماییب می !؟
رضا کسگین

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz