زامان آغلاتـدی منی

آغلامازدیم زامان آغلاتدی منی
دوز یولوندان آزان آغلاتدی منی
*
گؤردوم حسرتدی همالر سوموگه
ایشله ییر شـاختا سوموکدن ایلیگه
دوزومـــــــوزده اَییلیر اَیری لیگه
قالدی قانماز قانان آغلاتدی منی
آغــلامازدیم زامان آغلاتدی منی
*
تک صبیر گلدی دئدیم ایش دوزه له ر
قار گئده ر، بوز ارییه ر یازدا گله ر
نه بیلیم یازدا بوران باغری ده له ر
یوخا چیخمیش گومان آغلاتدی منی
آغـــلامازدیم زامان آغلاتدی منی
*
دئدیلر بیر گون اولار ساز حالیمیز
قیتلیــق اولسا واریمیز یاغ بالیمیز
ایندی کی اون تک اولوب ساققالیمیز
بو یالان سؤز یامان آغلاتدی منی
آغلامازدیم زامان آغلاتدی منی
*
ظنّ ائدیردیم آغیر اولسا یارالار
یارالار آغریسین آنجاق یار آلار
نه بیلئیدیم اوره گی یار یارالار
بیلمه مز لیکدی، قان آغلاتدی منی
آغلامازدیم زامان آغلاتدی منی
*
اره لر دوشــــدو کی جنگل جانینا
تولکی لــر تــور توخودو اصلانینا
طرلانی اووچـــی باتیر جاق قانینا
اوخدان آرتیق کامان آغلاتدی منی
آغلامازدیم زامان آغلاتدی منی
*
اَری مه ز قالدی بئیینـــده بوزوموز
گؤیده سایریشمادی بخت اولدوزوموز
نه قویون قالدی نه املیک قوزوموز
قوردا بنزه ر چوبان آغلاتدی منی
آغلامازدیم زامـان آغلاتــدی منی
*
من دئدیم باغلاسا یادلار قولـومو
دایاقیم وار قورویا ساغ سولـــومو
قوپدو بیر چن کی ایتیردیم یولومو
داغا باخدیم دومان آغلاتدی منی
آغلامازدیم زامان آغلاتدی منی
*
وای بیـــــزه اولدو پوزولمـاز یازیمیز
مضراب اود دوتدو قیریلدی سازیمیز
قالـــــدی قیشلانمادا عاصم یازیمیز
یازی گـــول سوز یازان آغلاتدی منی
آغلامازدیم زامــــان آغلاتدی منی
عاصم

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz