سن دوشه رسن یادیما !

اتک اتک سحرلــــــــر
چن دوشنده داغـــــلارا
آرغین یورغون گئجه لر
آی ائننده باغــــــــــلارا
شئعیر – شئعیر اوچارام
سنله اوتن چاغــــــلارا
سن دوشه رسن یادیما !
*
سئوییب سئوه نلـر کیمی
سایریشاندا اولــــدوزلار
قاناد – قاناد چیلغین یئل
چیرپیناندا سون باهــار
آیــاغیمیــن آلتیــنــــــدا
خاطیره لــــــر خیشیلدار
سن دوشه رسن یادیما !
*
کولک – کول کؤیشه نی
پاییــــــــــز یایدان آلاندا
سالخیم سویود ، گیلانار
یارپاق – یارپاق سولاندا
آه ، بنووشـــــــه تئلینی
بورولغانـلار یـــــولانـدا
سن دوشه رسن یادیما !
*
ماهال – ماهال کوچنده
آذربــــــــــایجان ائللری
دونــــه یاللی گئدنـــــده
داغــــدا ائلات گوللری
آتلار نال – نال اویناییب
دیندیــرنــده چـؤللــــری
سن دوشه رسن یادیما !
*
عطیــــــــــر پایین آلاندا
قـــرنفیـلدن کپنـــــه ک
کولگه ندیـریک قوراندا
زمیلیکده گؤبــــــه لک
انلیک کیرشان یاخــاندا
داغا داشا ، گول چیچک
سن دوشه رسن یادیما !
*
باهــــار موشتولوقچوسو
قارانقوشــــــلار اوچاندا
یالقیــــز قارتال اوفوقده
قیزیل قاناد آچـــــــــاندا
بیزیـــــم ســــارا گلینی
آرپـــــا چایی قوجـــاندا
سن دوشه رسن یادیما !
*
اووسه ننده چایــــــلارا
آیین گوموش ساچـاغی
کهلیک اوتو قوخــوسو
چولقالایــــاندا داغــــــی
قورتوم- قورتوم دره لر
اوتقونانــدا بـولاغـــــــی
سن دوشه رسن یادیما !
«حیدر بـابـا » چیینیندن
آی بویلانیب باخــــاندا
گئجه شووقو باجـــادان
شلاله تک آخـــــــــاندا
آنام پیسوز چیــــراغی
قیش گئجه سی یاخاندا
سن دوشه رسن یادیما !
*
دان اولدوزو دنیـــــــزه
گؤز آتاندا هر سحــــر
آخشام چاغی گونئی یه
سوروننده کولگه لــــــر
گزدیگیمیز او کوچــــــه
سنی مندن ایسته یَــه ر
سن دوشه رسن یادیما !
*
قانادیندا بایــــــــــــرامی
گتیـــرنـده سیغیـــرچین
ماوی لییه جومــــــــاندا
دورنا،لاچین،گؤیه رچین
سونبوللوکده سوزه نـــده
قُمری،کهلیک،بیلدیرچین
سن دوشه رسن یادیما !
*
سنله اوته ن سون ایللر
منده گون-گون چالخانار
سنسیــز « محمدرضا »
آلاو چکیب اودلانــار
آدیـــن گلنده مین غــــم
بو داغ داشــا ، جالانـــار
سن دوشه رسن یادیما !
محمدرضا مقدسی

دیدگاه بگذارید

avatar
  Subscribe  
باخبر شدن از