فرانس کافکا*، ۱۸۸۳-جو ایلده بیر آلمانلی عایله‌ده پراق شهرینده دونیایا گلدی. فرانس عایله‌نین ایلکین اوشاغی‌ ایدی. ایکی قارداشی، یئددی یاشلارینا یئتیشمه‌میش دونیادان گئتمیشدیلر. اوچ باجی‌سی ایسه نئچه ایللر سونرا ایکینجی دونیا ساواشی‌نین اؤلوم کمپ‌لرینده اؤلدورولدولر. کافکانین آتاسی چوخ مذهبی و جدی ایدی. اونون بو اخلاقی آتا-بالا آراسیندا بؤیوک اختلافلارا نه‌دن اولدو. البته بو جدی‌لییی کافکانین اثرلرینده ده گؤرمک اولور.
کافکا بیرینجیل [اولیه/مقدماتی] اؤیره‌نیمینی [تحصیلاتینی] قورتاراندان سونرا بیلیم‌یوردوندا درسینی داوام ائتدیرمک اوچون شیمی قولونو [رشته‌سینی] سئچدی. آنجاق ایکی هفته‌دن سونرا سئچدییی قولو ده‌ییشیب حقوق قولونو سئچدی.
بو قول ده‌ییشمه، فرانسین آتاسینی دا راضی ائتدی. هم ایشینین گله‌جه‌یی داها آیدین ایدی، همده حقوق اوخوماغا چوخ زامان احتیاج اولدوغونا گؤره، بیلیم‌یوردوندا چوخ قالیب، ادبیات ایله اینجه‌صنعت مطالعه‌سینه داها چوخ ایمکان یارانیردی.
کافکا، بلیمی‌یوردوندان، دوکتورلوق آلاراق، بیر ایل مدت‌ینده جنایی محکمه‌ده چالیشماغا باشلادی. سونوندا بیر سیغورتا [بیمه] شیرکتینده استخدام اولوب، ایشچی‌لره ده‌بیلقه‌نین [ایمنی بؤرک-ون] بیرینجی نمونه‌لرینی طراحلیق ائتمکله چوخ تئز ایشینده اوغور قازاندی. آما سئل خسته‌لییی گنج و ائنئرژیک فرانسی باسمارلادی. بو سبب‌له نورمال واختیندان تئز أمکلی [بازنشسته] اولدو. ایش ائله یئره چاتدی، بعضی واختلار آتاسی‌ ایله باجیسی یاشاییش هزینه‌لرینی وئردیلر.
کافکانین ساغلیقیندا نئچه قیسّا حیکایه ایله بیر نئچه اثری ایشیق اوزو گؤرسه‌ ده، حیکایه‌لریندن دوز-عمللی استقبال اولونمادی. بونا باخمایاراق، او، یازیب اوخوماغا آلیشقان ایدی و مکتوب یازما، کافکانین ماراقلاندیغی ایشلردن بیری ایدی.
سونوندا، کافکا قیرخ‌بیر یاشیندا، ۱۹۲۴جو ایلده، سلّ خسته‌لییی نتیجه‌سینده وفات ائتدی. اؤلومونون أن آجی یئری اونون آجیندان اؤلمه‌سی ایدی. سلّ خسته‌لییی‌نه گؤره بوغازی یارا اولموشدو و هئچ نه یئیه بیلمه‌ییردی. او زامان داماردان ایینه وورما هله کشف اولمادیغی اوچون، کافکا، سئل نتیجه‌سینده یوخ، بلکه، آجلیق نتیجه‌سینده دونیاسینید ه‌ییشدی.
فرانتس کافکا تکجه آلمانین بؤیوک یازیچی‌لاریندان بیر اولاراق دئییلدی، او ۲۰-جی یوز ایللییین أن تأثیرلی یازیچی‌لاریندان ایدی. «چئوریلمه» [مسخ]، «قصر» و «محاکمه»، اونون أن تانینمیش اثرلریندندیرلر.
اؤلوموندن سونراکی یاشام
کافکا، ساغ ایکن، ادبی شهرتی یوخ ایدی. بونا آرتی، چئوریلمه رومانی ایله بیر نئچه حیکایه‌سیندن سونرا قالان اثرلرینی یاریمچیق بیراخاراق هئچواخت اونلاری باشا چاتدیرمادی. کافکا وصیت ائله‌میشدی او اؤلندن سونرا بوتون اثرلرینی (یاییلان یا دا یاییلمایان) اوخومامیش یاندیرسینلار!
آما اونون صمیمی یولداشی «ماکس برود» اونون وصیتینی یئرینه یئتیرمه‌ییب اثرلرینی چاپا یئتیردی. چوخ تئز کافکانین اثرلری علاقه‌لرینی چکیب، شهرت قازاندی.
کافکانین یازیلاری، قارماقاریشیق لا یاریمچیق اولدوقلاری اوچون، ماکس برود، اونلاری چاپ ائتمه‌میشدن اؤنجه اصلی متن‌ده ده‌ییشیکلیک‌لر ائده‌رک، حیکایه‌لری بؤلوب دوزه‌نله‌دی. بعضاً ده یاریمچیق جمله‌لرله ماجرالاری بوتونله‌شدیردی. آما ۱۳۶۱-جی ایلده «مالکوم پیسلی»، او زمان بیر قروپ‌لا بیرلیکده کافکانین اثرلرینین اصلی نسخه‌لرینی تاپیب یایدیلار.
*‌ فارسجادا “فرانتس” یازیلیر.
تورکجه‌یه چئویریب حاضیرلایان: حسین واحدی