عاشورا گونو – محشر گونو

عاشورا گونو ناماز قیلیردیلار، بیردن بیره دوشمانین قوشونو حضرتین خیمه لرینه ساری یوگوردو. لعنتلیک« شمر» او قوشونون باشچیسی اولموشدو. او قیشقیریردی، امام(ع) و اونون اهل بیتینه یامان دئییردی!
حضرتین یاردیملاری نین بیــــری « مسلم بن عوسجه » آدیندا اذن ایسته دی کی شمرین اوستونه یوگوروب اونو وورسون ، آمما آغا بویوردو من سئومه ییرم دؤیوشو باشلایان بیز اولاق، سونرا آغا قاباغا گئدیب ، عمر سعدین قوشونون نصیحت ائتدی آمما حئیف کی او قانمازلارا نصیحت کار کسمه دی.
آنجاق « عمر بن سعد »ین باشچیلیغی ایله دوشمانین قوشونو امام (ع) و اونون یاردیملارینا ساری اوُخ آتماغی باشلادیلار.
آغانین یاردیملاری بیر بیر شهادته یئتشیردیلر، و آغا دؤیوش عرصه سینده یالقیز قالدی ، آمما یئنه او حضرت (ع) اتمام حجّت اوچون دوشمانی نصیحت ائتمه گه باشلادی، آمما او اوره گی داش و کؤنه ز آداملار ، پیغمبر(ص) دن ائشیده ائشیده کی او بهشت جاوانلاری نین ایکی آغاسیندان بیری دیر، باش قوشمادیلار، و آغانی دؤره له ییب هره بیر اوُخ ، دیل یاراسی ، داش و نئیزه ووردولار.
آغایا دال با دالا او قده ر هجوم ائتدیلر کی آخیردا جاندان دوشوب یئره ییخیلدی.
ائله بو چاغدا دوشمان خیمه لری تالان ائتمه گه یوگوردو و آرواد اوشاقلارین قیزیل لارینادک اللرین دن آلماقا باشلادیلار.
آغا خیمه لره ساری اولان یوگورمه گی گؤرجه ک اونلارین اوستونه قیشقیردی:
وای اولسون سیزلره، ای ابوسفیان تؤره مه لری ! اگر دین یوخوزدور و محشر گونون دن قورخماییرسیز، لا اقل آزاده اولون و غئیرتیز اولسون! اگر کیشی سیز ، کیشی تکی دؤیوشون!
بو چاغدا ملعون « شمر» سَسله ندی: ای حسین! نه دئییرسن!
حضرت (ع) بویوردو : دئییرم سیز من ایله دؤیوشورسوز، آرواد اوشاقلارین نه گوناهی واردیر، تا من دیرییَه م ، سربازلاریوی و قوشون ایوی منیم حرمیم دن و ناموس لاریمدان قیراق ائتگیله و منیم اهل بیتیمی اینجیتمه یین!
اوندا دوشمان دالی اوتوردو ، ملعون « عمر بن سعد » دستور وئردی کی: گئدین اونون ایشین قورتارین!
قوشون باشچی لاریندان نئچه نفر گلیب ایسته دیلر امام حسین(ع) حضرتلرین شهادته چاتدیرسینلار آمما اینجاردان دوشوب قاییتدیلار.
آخیرده ، لعنتلیک « شمر » – یا سنان بن انس – قتلگاه ایچره گیریب، چوخ پیس و اوتانمامازلیق حالیندا آغانین مقدّس باشین بدنیندن آییردی کی دیل و قلم اونو یازماقدان اوتانیــر.
قایناق: تلخیص از: مقتل خارزمی: ج۲،ص۳۳،تاریخ تبری:ج۴،ص۳۴۴،مشیرالاحزان:ص۷۲،بحارالانوار:ج۴۵،ص۴۷ – ۵۷
چئویره ن: الف. عظیمی بیلوردی

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz