روزنامه کثیرالانتشار سراسری صبح ایران
به دو زبان ترکی و فارسی

۱۳۹۹/۰۷/۰۴
روزنامه ساقی آذربایجان
تبلیغات
آمار بازدید
  • 0
  • 720
  • 700
  • 1,332,660
عاشیق ماهنیسی ( رؤیا عالمینده )

کور پئشمان سئوگیلی سی نین یانینا قاییدیب اونون باخیش لارینا دالارکن دئدی: « من نه تکجه طبیعت ده بلکه گئجه نین سوکوتوندا ایسه چوخلی نغمه لر دویوب قوشلار تک بوغازیمین تئل لریندن آسیلسام دا تکجه بیر نغمه ده اوره ییمدن جوشمادی! بونا گؤره گل بو سئودادان واز کئچیب بیر سقفین التیندا یاشاماقلا، اوره ییمیزده کی عشق اودونو یاشادارکن اونون یاندیریجی آلاوینی سؤندوره ک و دونیادا گؤردویوموز باشقا سئوگیلی لر تک قوشا قاری ییب حیات یولوموزو بیرگه دوام ائده‌ک.»
گول اوزلو آل یاناق سئوگیلیسی گولومسه رکن گؤردویو بیر رؤیادان سؤز آچیب قارا اوزون ساچلاریندان یئددی تئل آییریب اونا هدیه ائتمک له دئدی: « بو تئل لری باغرینا باسیب دورنالارین اوچوشو ایله آغری داغینا یولا دوشوب اوردا کؤکی ریشه سی گؤی لره یوکسه لن بیر آغاج آختارمالی سان. دونیادا هر نه نغمه وارسا او آغاجین کؤنلون دن قوپوب عطیر کیمی کاییناتی و اوره ک لری بورویوب دور. آنجاق بورادک هئچ بیر اینسان، محبت دالغالاریله اونون چاغلایان نغمه لرینه لاییق اولمایینجا، تانری نین اینسانلارا او آغاجدان بیر هدیه سی اولماییب دیر! سئوگی دولو کؤنول له او تحفه نی اوولاییب قاییتماغینا اینانارکن، یولونو یئنه گؤزله یه جه یم.»
گنج عاشیق، سئوگیلی جانانی نین تئل لرینی قوتسال بیر امانت کیمی اؤزو ایله داشی یارکن آیلار بویو دورنالار آردیجا یول دؤیوب آغری داغینا چاتارکن، آغری دان و یورقون لوق دان آز قالا حیاتینی ایتیرسه ده سینه لریندن قان فیشقیران بولبول لری یادا سالیب اؤزونه گوج وئردی. آغری داغینی آلت ویریب اوست چیخارکن، اونون زیروه سینده بولورلار تک آخان پارلاق بیر شلاله گؤردو. جان آتیب قایالارا دیرماشارکن شلاله نین آخدیقی اوجالیقا چیخدی. اورا چیخدیقدا یوزلرجه چاغلایان دوم دورو بولاغ گؤردو و سئوگیلی سی نین دئدیگی کیمی، گؤی لرده گؤی قورشاغی تک ریشه سالان آغاجی. دینجین آلیب اؤزونو تاپارکن تانری نین عظمت لی وارلیقی نا و اونون معجزه لرله دولو یارانیشینا حیران قالیب باغرینداکی قارا تئل لری او آغاجین مین لر تئله آیریلان و یوزلر رنگه چالانبیر جیلینه آسیب گؤزلری ایشیقدان ائله قاماشدی کی حیس ائتدی درین بیر یوخونا گئتمه لی دی. باشینی یئره آتیب یاتارکن، رؤیاسیندا آی دان یونولموش بولور قانادلی بیر ملک گؤردوکی اونا ساری گلدی و نورلار ایچره گیزله نن بیر هدیه گتیردی. تحفه نی آلارکن گؤردو ایندی یه دک هئچ گؤرمه دیگی بیر زاد دیرکی اونون وارلیقی کؤکی گؤی لره یوکسه‌لن‌ آغاج‌دان‌ دوغرولارکن سئوگیلی سی نین پارلاق تئل لریله بزه نیب دیر.
أل لرینی تئل‌لره وورماقلا مین لر نغمه نین جوشدوغو بیر آن چکمه دی. شاشقین حالدا بو نغمه لردن لذت دویارکن، ایپک ساچلی او ملک گولوب دئدی: « تانری اینسانلارا سونسوز هدیه وئرسه ده، بو تحفه نی اوره ک ده پاک سئوگی بسله ین عاشیق لرین حورمتی ایچون آداملارا ایتحاف ائدیر. اینسانلار دردلری، کدرلری یالنیزلیق لاری و عشق آلاولارینی اونودماقا خاطیر، بونون نغمه لری له آرامیش تاپیب لذت لی یئنی دویغولارلا حیاتین آغیر یوکونو، یونگول لت مه یه چالیشاجاق لار.»
گنج اوغلان ملک دن بو تحفه نین آدینی سوروشارکن دئدی: « بونا هر ائل اوبا اؤز دیلینده بیر آد وئرسه ده اونون گرچک آدی « ساز » دیر کی اؤز وارلیقی له اینسانلارین دانیشیق خزینه سینه یئنی آنلاملارلا ایکی کلمه داها آرتیراجاق. اودا « عاشیق » و « ماهنی » دیر.
بو سازی سینه نه آلیب درین ایلهاملار کؤنلونو ایشیق لاندیرارکن ائله سؤزلر و نغمه لر اوره ییندن و سازدا اوینایان بارماق لاریندان چاغلایاجاق کی هامی اینسانلاری واله و حیران ائده جک.
سنین عشقی نین صافلیغی و یاشارلیقی ایچون سنه و سندن سونراکی ساز چالانلارا « عاشیق » و سئوگیلی نین آدی ماهنی اولدوغونا خاطیر، دیلدن دوداق دان قوپان سئحیرلی و شعیرلی نغمه لره « ماهنی » دئییله جک دیر.»
گنج عاشیق جادولار قده ر اینانیلماز اولان بو رؤیادان آییلارکن، باشی اوستونده داها کؤکی گؤی لره اوجالان آغاجی یوخ بلکه او آی تکین ملکین هدیه ائتدی یی سازی گؤردو.
دلی قانلی گنج اوغلان یولا دوشوب یوردونا دؤنه رکن، سازی ایله و ماهنی لاری ایله ائل اوبایا شن لی نغمه لر ایتحاف ائدیر و سئوگیلیسی، بیر ملک کیمی اوناساری قاناد آچارکن اونا « عاشیق » دئییب باغرینا آلیر.
ایکی سئوگیلی بیر ـ بیرلرینه قاوووشارکن اونلارین عشقی ایله دونیادا ماهنی ایله ساز چئشیدلی آدلارلا حیات تاپدی و شن لیک بیر نسیم تک اوره ک لره کؤچوب اینسانلارین دویغولاری ایله سایسیز ـ حساب سیز موسیقی هاواسی، هاوانی دالغالاندیردی و بئله لیک له سئوگی دولو یانیقلی و دردلی اوره ک لره مرهم اولوب نسیل دن نسیله سئل تک جوشوب آخدی. علیرضا ذیحق

دیدگاه بگذارید

avatar
  Subscribe  
باخبر شدن از
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز