الیف شافــاکین «عشق» آدلی رومانی
قــــوزئی آذربایجانلی مترجم، نریمان
عبدالرحمانلی الی‌له آذربایجان تورکجه‌سینه
چــــــئوریلن اثری، مهدی میمندی طرفیندن عـرب
الیفباسینا کؤچورولوب و آزجــــا رئداکته اولوناراق،
اتک یازیلارلا تبــــریزین نباتی نشــــریاتی طرفینــــدن
۴۳۲ صفحه‌ده، رقعی بیچیم‌ده ۱۳۹۷-جی ایلین شهریور
آییندا یایینلاندی.
الیف شافاک، ۲۵ اوکتیابر ۱۹۷۱-جی ایلده فرانسادا، ایستراسبورقدا دونیایا گلمیش تورک اصیللی یازیچی‌دیر. آتاسی سوسیال پسیخولوق نوری بیلگین، آناسی دیپلمات شافاک آتایمان‌دیر. دوغولاندان قیسا بیر واخت کئچندن سونرا آتاسی و آناسی آیریلیب، آناسی‌نین کؤلگه‌سینده بؤیویوب و سوی‌آدی کیمی آناسی‌نین آدینی گؤتوروب. اورتا تحصیلینی آناسی‌نین چالیشدیغی یئر اولان مادریدده، داها سونرا لیسانس تحصیلینی «آنکارا آتاتورک آنادولو اونیوئرسیتئتینده» آلیب. یوکسک تحصیلینی اورتا شرق تکنیکی اونیوئرسیتئتی‌نین اولوسلار آراسی علاقه‌لر فاکولته‌سینده آلیب..
الیف شافاکین اینگیلیسجه قلمه آلدیغی و ۲۰۰۹- جو ایلین مارت آییندا چاپ ائدیلن «عشق» آدلی رومانی تورک ادبیّاتی تاریخی‌نین «اَن قیسا مدتده اَن چوخ ساتیلان ادبی اثر»ی آدینی قازاناراق تورکیه‌ده بوتون ساتیش رئکوردلارینی تزه‌لییر. بو رومان یازیچی‌نین شهرتی‌نین اوستونه شهرت گتیریر.
ائللا روبینشتئین‌ ۴۰ یاشلی ائولی قادیندیر. تیپیک بورژوا دیرلری‌نین حاکم اولدوغو چوخ وارلی عائله‌‌‌سی، گؤرونتوده اولدوقجا ساغلام و پروبلئم‌سیز عائله‌‌‌سی وار. اوچ اوشاغینی بؤیوتدوکدن سونرا بیر نشریاتدا رئداکتور یاریمچی‌سی کیمی ایشه دوزه‌لیر. ایلک ایشی ع. ز. زاهارا آدلی تانینمامیش بیر یازیچی‌نین تصوّف فلسفه‌سی موضوعسوندا اولان تاریخی رومانی «عشق شریعتی» حاققیندا رأی یازماقدیر. لاکن حیاتی‌نین قارماقاریشیق چاغلاریندا الینه آلدیغی بو کتاب، هئچ گؤزله‌مه‌دییی شکیلده ائللانی سارسیداجاق. دونیوی عشقی کشف ائتمک آدینا چتین و تهلکه‌‌‌لی بیر یولجولوغا چیخماسینا نه‌دن اولاجاقدیر. حیاتیمیزین دورغون گؤلونو دالغالاندیران داش مثالی… ع. ز. زاهارانین «عشق شریعتی» آدلی اثرینده مولانا و تبریزلی شمس آراسینداکی ایلاهی عشقدن سؤز آچیلیر، شمسین دیلیندن صوفی‌لرین ۴۰ قایداسی قلمه آلینیر. بونلا یاناشی ائللانین یاشامی و عزیزله علاقه‌سی روماندا گلیبدیر.
یازیچی‌نین اؤزو بو رومان حاققیندا
بئله یازیر:
«…بو روماندا اوخوجویا اؤز اوره‌ییمی آچدیم.
تصوّف منیم سرّیمدیر، او سرّی اوخوجو اوچـــــون
آچدیم.. بو کتابی شمس تبریزی و مولانا رومی حاققیـــندا
بیر کتاب یازماق آرزوسویلا قلمه آلمادیم. بو کتابدا من
عشقی آنلاتماق ایسته‌دیم. اساس مقصــــــدیم بو ایدی.
هم دونیوی، هم ده معنوی اؤلچولرله عشــــقدن یازدیم.
بیر- بیرینه ضد اولان کاراکتئرلری یان- یانا گـــتیره‌رک
اونــلارین معنوی باغلیــــلیق‌لاری‌نین اولماســـــینی آرزولادیم.
۲۰۰۸ جی ایلده بوستوندا یاشایان، اوچ اوشاق آناسی اولان بدبخت بیر آمریکالی یهودی قادین اوچون «مولانا نه‌یی افاده ائدیر؟»
سوالی‌نین جاوابینی آختارماغا چالیشدیم.
اثرین یازیلماسینا گلدیکده ایسه، البته‌‌‌، خطالار و قصورلار اولا بیلر.
یوخسا شمس‌له مولانادان یازماغا باشلایاراق هر شئیی باشا دوشدویونو ادعا ائتمک تکبّرلوک اولار.
آمّا بونو صمیمیّت‌له سؤیله‌یه بیلرم:
من بو رومانی عشق‌له یازدیم، عشق‌له ده اوخونماسینی ایسته‌ییرم»
نباتی و آذرتورک نشریاتی کتابلارین؛ تبریز، امام خیابانی، طالقانی اوچ یولو، شهریار پاساژی، آلت قات، ۴۶ نؤمره‌لی توکاندان اَلده ائده‌بیلرسینیز.
نشریاتین تئلفون نؤمره‌سی: ۰۴۱۳۵۵۴۷۵۱۰
قیزیل قلم