روزنامه کثیرالانتشار سراسری صبح ایران
به دو زبان ترکی و فارسی

۱۳۹۷/۰۱/۳۰
روزنامه ساقی آذربایجان
آمار بازدید
  • کاربران حاضر: 0
  • بازدید امروز: 831
  • بازدید دیروز: 834
  • کل بازدید ها: 622,430
عشق دونیاسی

سلطان حسین، حسینی تخلص سئچه رک، بیر عشق و سئوگی شاعری اولاراق، ادبیات تاریخیمیزده قالیر. حسینی، عاشقدیر و کؤنلونون معمور اولماسینی دیله ییر و بئله لیکله حرص و هوسی اوره کدن قازدیری:
کؤنلوم ائت معمور، مهرین ایله، لیکن قویماگیل!
نفـــس اوندا قیلا کی حرص و هوس طرحین بنا.
بو گؤزه للیکده سؤز، اوندان اؤنجه تورک عالیمی خاص حاجب آدیله تانینان بؤیوک شاعریمیز- قوتادقو شاعری دیلیندن ائشیتمیشیک. خاص حاجب بو ده یرلی اثرینده، شاهلار، سلطانلار و خاقانلارا اؤلکه نین اداره ائتدیگینی اؤیره ده رک، اونلارین اوره کلرینده حرص و هوسی چیخیریب ، یئرینده سئوینج و محبت اکدیگینی ایسته ییر. سؤز یوخدور کی سلطان حسین بو کتابی اوخوموش و اوندان الهام آلاراق، بئله معنالی شعرلری قوشا بیلیر. بئله دیر کی سلطان حسین بیر خاقان اولاراق، عینی حالده ده یرلی شاعردیر ده. آنجاق عشق اونون دیلینده شاهلیق ایستک لریندن آیریلمیر و بیر سلطان دیلی ایله ده بیانی نی تاپیر. شاعر، بوتون کلاسیک شاعرلریمیز کیمی، غمین قوشون چکمه سیله، ساقیدن می ایسته ییر و غم مصافینا گئدیر:
غم سپــــه چکدی، ساقیا، توت جام صاف،
کیم بولور جام می ایچندن دلیر اهل مصاف.
شاعر ، عشقی انسانلارین تقدیری و آلین یازیسی کیمی تصویره آلیر. او اؤزونو جام الستدن مست اولدوغونو بیلدیری:
دان یوخدور کیم بولوب من مست تا شام ابد،
کیم ازلده قسمتیم بولدی منه جام الـــــــست.
بئله بیر شاعر، هجردن ده قورخمور. چون مصافا گلیرسه، اونو شکست وئره جه یینه اینانیر:
ای حسینی، وصل اوچون هر نئجه کیم چکدیم مصاف،
هـــــجر بولماق روبرو قلبـــــــــیم آرا بولدی شکست.
او، عشقین اولماسیله هر شئیه دال چئویریر:
قیلمادی عشق عقل و دین و ننگ و نام ترک،
بونجا رسوالیق قبول ائتدیم من رســـوا و بس!
صریح و صمیمی سؤیله ییر:
یئره گیرسین اشک کیم آقیزدی باغریم قان ائدیب،
یوخ کی مخفی سر عشقیم ائیله دی افشا و بـــــس!
حسینی، اؤزونو بیر بولبوله بنزه دیر کی گولون تیکانینی، گوموش قفسه ترجیح ائدیر:
ای حسینی، هجرده جسمیم آرا کؤنلوم قوشی
گولدن آیری عندلیبی دور گرفتار قفس.
و یئنه دئییر:
توختاماز خنده مژگانین ووران کؤنلوم قوشــــو،
خوش گؤره ر بولبول جواهرلی قفسدن خارینی.
آنجاق عشق یولوندا ناله ائتمه گی ده قبول ائدیر:
گر حسینی ناله قیلسا عشق آرا، عیـــــــب ائتمه نیز،
کیم دورور عاشق کیم اونون شیوه سی افغان دئییل؟
حسینی، تاریخی و اوسطوره وی عاشیقلاردان دا آد آپاریر و بوتون کلاسیک ادبیاتا صادق قالیر، اما هردن بیر فرقلر ده گؤزه چارپیر. بو عاشیقلر وصالا چاتماییب، اؤزونو اونلارلا توتوشدوراراق، اؤز داستانینی باشقا بیر نوع بیلیر:
حالتیم فرهاد و مجنون قصه سینه اوخــــــــشاماز،
کیم ایرور عشق ایچره مهلک داستانیم اؤزگه نوع.
اونون باشقا نوع اولدوغو بئله دیر:
عشق ظلموندن اگر فرهاد و مجنون اؤلدولر، عار دئییل
منده هر دم دور اؤلوم، مندن آلار مظلوم دئــــــــــییل.
حسینی نین دیوانیندا گؤزه ل بیان ایله ده اوز اوزه گلیریک. موسیقی یه تانیش اولدوغونو ده شعرلرینده گؤروروک. بیر شعرینده “حسینی: پرده سینه اشاره ائده رک دئییر:
چون حسینی توبه سیندیردی، مغنی دوز نوا،
هم حسینی پرده سینده، ساقیا، سن باده سوز!
شاعر عشق سئوه ر بیر شاعردیر. عشق آنا یودو ایله جانینا گیرمیش، اجل گلمه سیله جانیندا چیخاجاقدیر:
عشق سود ایله تنیمه گیذدی، چیخار جانیله،
ناصحا، منع ائتمه ایلن عادت معـــــــهوددن!
آنجاق بیر سیرا شعرلریندن، آلماق اولور کی حسینی مجازی عشقه ده دوشموشدور:
ای حسینی، هجردن جانیم قوتولسا عهد ائده ر،
کاشــــــنالیق قیلمایین جنس بنـــــی آدم ایله..
او، گؤزه للر قدرینی بیلن انساندیر و وفالی یار اوچون جاندان علاوه باشقا بیر سؤز دئمه گی سئومیر:
ای حسینی، بی وفالارا کؤنلونو وئرمه گـــــیل!
چون وفالی یار تاپدین، سؤز دئمه جان اوستونه!
عینی حالدا، حسینی کلاسیک شاعرلر کیمی خرقه سینی می اوچون رهنه وئریرو یولدان دؤنمه ین بیر عاشق کیمی جانیندان کئچیر:
میه خرقه م رهن و من مخمور، نئتدی می فروش
یانا بیر پیمانه هم وئرسن بو مرهــــــون اوستونه؟
او، انسانلاری دوشونمه گه چاغیریر و تورپاغا چئوریلمه میشدن اؤنجه یاشاییشدان بهره لنمه گی ایسته ییر:
اوزو خوش توت گیل که آخر تیره خاک آستیندادیر،
اول که حــــــــالا رخش سوره ر چرخ گردان اوستونه.
و بونا گؤره ده دونیادان کام آلماغا چاغیریر:
ای حسینی، تاکه ممکندور جهاندان کام سور،
عاقبت ناکاملیق یئتدور کوی چون چـرخ دون.
نهایت واعظه اوز چئویریب، گؤزه ل طنز ایله گؤزه للری سئومکی گناه سایدیقلاریندان لوغازا توتور و دئییر کی من چکینمه یه جه یم، چونکی تانریمین رحمتی منه بئله لیکله داها آرتار:
واعــظا، گر خوبلارین عشقی گناه ایرور، نه غم؟
چونکی تانری نین گناه اهلینه چوخدور رحمتی!
شاعر، بئله لیکله عشق میدانینا قدم قویوب جان وئرمکدن ده اسیرگه میر:
عشقده جانیـــــمی آل، جسمیمی یاندیر ای اجل!
یئله ساوورگیل که عشق اهلی نین اولسون عبرتی!
م.کریمی

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز