عوام ایچینده شؤهرته چاتماق

چوخ زامان اولاردی کی عوام ایچینده بیر نفردن چوخ آد آپاریلیردی. و اونون شؤهرتی پاکلیقدا و دینلی اولماقدا اوجالمیشدیر. آداملار هر یئرده اونون آدین آپاریردیلار و اونو بؤیودیردیلر.
امام صادق(ع) حضرتلری نین یانیندا او کیشی دن دال با دال ، یاخشیلیق ایله آد آپاریلیردی و آداملارین اونا نسبت ارادت و ایسته گیندن دئییلیردی.
امام(ع) فیکیره دوشدو کی باشقالارین گؤزوندن ایراق، او کیشینی کی ائل ایچینده بیر بئله علاقه باغلاییب و اوندان بؤیوکلیک ایله آد آپاریرلار ، یاخیندان گؤرسون.
بیر گون ، تانینماز حالدا اونون یانینا گئتدی و گؤردو اونون ایسته ینلری کی عوام طبقه سیندندیر ، دؤره سین آلیب غوغا سالیبدیرلار.
امام(ع) اؤزون تانیتدیرمادی و یاخیندان دولانیشیغا گؤز قویدو . اوّل شئی کی امامین باخیشین اؤزونه ساری چکدی ، اونون عوام آلدادان دوروشوقی و یؤندملری ایدیر. آنجاق او آداملاردان آیریلدی و تکجه یولا دوشدو و امام یاواش یاواش اونون دالیجا دوشدو تا گؤرسون هارا گئدیر و نه ائدیر و او کیشی نین عمللری نئجه عمل لردندیر؟!
چوخ چکمه دی کی او کیشی بیر چؤره کچی دوکانی نین قاباغیندا دایاندی.
امام(ع) چوخ تعجّب ائده رک گؤردو کی ، او کیشی دوکان صاحابی نین گؤزوندن یایینیب، یاواشجاسینا ایکی دانا چؤره ک گؤتوروب پالتاری نین آلتیندا گیزلتدی و یولا دوشدو. امام اؤز اؤزونه دئدی، شاید منظورو آلماق ایمیش و چؤره گین پولون قاباقجادان وئریبدیر! یادا سونرا وئره جکدیر. سونرا فیکیر ائدیب دئدی ، پس اگر بئله دیرسه نییه چؤره گی گیزلین گؤتوروب آپاردی؟!
آنجاق یئنه ده امام او کیشی نین دالیجا دوشدو . هله فیکیری چؤره کچی دوکانی نین ایشینده ایدیر کی گؤردو او کیشی بیر میوه ساتانین طاباغی نین قاباغیندا دوردو ، بیر آزدان سونرا میوه ساتانین گؤزوندن قیراق، ایکی انار گؤتوروب پالتاری نین آلتیندا گیزله دیب یولا دوشدو.
بو ایش امامین تعجّبینه آرتیردی. امامین تعجبّی اوندا لاپ چوخا یئتدی کی گؤردو او کیشی بیر ناخوشون سوراغینا گئتدی و چؤره ک لریله نارلاری اونا وئریب یولا دوشدو. بو آندا امام اؤزون او کیشی یه یئتیریب و بویوردو: « من بو گون عجیبه بیر ایشلر سندن گؤردوم! »
بوتون گؤردوگی ایشلری اونا تعریفله ییب ، جاواب ایسته دی.
او کیشی امامین اوزونه باخیب دئدی: « گومان ائدیرم سن جعفر بن محمد اولاسان! »
– بلی دوز بیلیبسن، من جعفر بن محمدم.
– البته سن تانری پیغمبری نین بالاسی ، و شرافت صاحابی سان ، آمما افسوس اولسون کی بیر بئله جاهل و نادان سیز!
– من دن نه جهالت گؤروبسوز؟!
– ائله بو سؤز کی سوروشورسوز، جاهیل لیگین لاپ آخیری دیر! بوردان بیلینیر کی دین ده بیر ساده حسابی دوشونه بیلمه ییرسن! مگر بیلمه ییرسن کی تانری قرآن دا بویوروبدیر: « من جاء بالحسنه فله عشر امثالها » ، هر بیر یاخشی ایشین اون برابر ثاوابی واردیر.
یئنه ده قرآن بئله دئییر: « و من جاء بالسیئه فلا یجزی الا مثلها » ، هر بیر پیس ایشین تکجه بیر برابر کیفری واردیر. بو حساب ایله پس من ایکی چؤره ک اوغورلامیشام ، ایکی خطا ساییلیر. ایکی دانادا نار اوغورلامیشام ، اوست اوسته دؤرد خطا ساییلیر. آمما عوضینده او ایکی چؤره ک و ایکی ناری ، تانری یولوندا باغیشلامیشام. اونلارین هره سی نین یئرینه اون ثاوابیم واردیر کی اوست اوسته قیرخ ثاواب منه یئتیشیر.
بوردا چوخ ساده بیر حساب ایشی آیدینلادیر. و اودا بودور کی قیرخ دان دؤردون چیخسان، اوتوز آلتیسی قالار . بئله لیکله منیم اوتوز آلتی خالیص ثاوابیم اولور. و دئدیگیم کیمی همین ساده حسابدیر کی سن اونو دوشونمکدن عاجیز سن!
– تانری سنه اؤلوم وئرسین! دوشونمه ز سن سن کی اؤز گومانین ایله بئله حساب ائدیرسن. مگر قرآن دا بو آیه نی گؤرمه ییبسن کی تانری بویورور: « انما یتقبل الله من المتقین » ، تانری تکجه ایناملی و پرهیز ائدنلرین عملین قبول ائدیر .
ایندیجه ده چوخ ساده بیر حساب کیفایت دیر کی سنی اؤز اشتباهینا واقیف ائتسین.
سن اؤزون دئمیشکن دؤرد گوناه ائدیبسن! و چون اؤزگه نین مالین احسان و صدقه آدیله آیری لارینا وئربسن، نه تکجه ثاواب ائتمه ییبسن کی هئچ بلکه هر بیری نین یئرینه باشقا گوناها دا باتیبسان! پس دؤرد گوناه دا قاباقکی دؤرد گوناهیوا آرتدی. و اوست اوسته سگگیز گوناه اولور. و هئچ ثاوابین دا یوخدور!
*
امام بو سؤزلری بویوراندان سونرا بیر حالداکی او کیشی نین حئیرتله نه رک گؤزلری امامین اوزونه اویوخموشدور ، امام دان آیریلیب ، قاییتدی.
امام صادق (ع) اوندا کی بو ناغیلی یولداشلارینا بیان ائدیردی بویوردو: « بئله بیر دوشونمه زجه و قوُلای تفسیرلر و توجیه لر دین ایشلرینده ، بیر پارا آملارین یولدان چیخماسینا سبب اولور و باشقالاریندا یولدان ائدیر.
قایناق: داستان راستان
چئویره ن: الف. عظیمی

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz