نئجه رحملیدی، نئجه آمانسیز،
نئجه مهرباندیر قادین اوره یی!
سن اونو سیندیرسان، بیل کی آ قانسیز !
آغلایان کاماندی، قادین اوره یی
***
گولدورسن، عؤمورلوک سعادتین دیر
سؤندورسن، یانماغی بیر ده چتین دیر
او، ظریف دویغونون، محببتین دیر
سئوگیسیز، زیندان دیر قادین اوره یی
***
داشی دا اریدر، داش دا اولار او
اریییب گؤزلرده یاش دا اولار او
باهار دا اولار او، قیش دا اولار او
داملادی_عومماندیر، قادین اوره یی
***
اونونلا دونیادیر سنه قفس ده
اونسوز هئچ یاشاما بو تورپاق اوسته
سئون بیر اوره یه، آخیر نفسده
ان شیرین درماندیر، قادین اوره یی
***
اونو آلچالدان دا، اوجالدان دا بیز
درد وئریب وعده سیز قوجالدان دا بیز
بیلنده قدرینی بو جهاندا بیز
همشه جاواندی، قادین اوره یی
***
بعضن گول تک سولار آجی بیر سؤزدن
آغلایار خلوتی، گولسه ده اوزدن
بعضن اوشاق کیمی، ان اورکسیزدن
محبت اوماندیر، قادین اوره یی
***
بیر نامرد الیندن زهر ایچنده
چورودر عؤمرونو او یاس ایچینده
بعضن ده قییمتلی لیباس ایچینده
ناله دیر، فغاندیر قادین اوره یی
***
عؤمره زینت وئرن، سعادت قوران
سئوینن قلبینی نورلا دولدوران
عیصمتی، بیر نسلی گؤیه قالدیران
عشقه حؤکمراندیر قادین اوره یی
***
سنسیز ال چکه رم آرزودان_کامدان
نه چیخار سئوگیسیز_ سنسیز، ایلهامدان؟
اینجیتسن دؤزه رم… ، “توفیق بایرام” دان
اینجیمه آماندیر! ، قادین اوره یی!
توفیق بایرام