قارلی سهند

اود دوتوب بیر زامان داشی یانیـــبدیر
سؤندوروب. اودلارین قاری سهندین
اوزولمه ز باشیندان حق وئرن نعمت
گئدیر هر بیر یئره واری سهنـــدین
*
یایلی. قیشلی. آغ پاپاغی باشینــــــدا
یاشیلدان بیر سورمه واردیر قاشــیندا
جیران دوزده گزه ر. کهلیک داشیندا
قالماز دیلده آه و زاری سهندیــــن
*
هر بیر گؤزللیگی وئریبدیر فلـــک
داراییب باشیندان تؤکوب آغ لئچگ
بیر یانی چمندیر بیر یانی چیچک
تانری اؤزی اولوب یاری سهندین
*
یارادان یارادیب اصیل بزکـــــــلی
آچیخ سوفره سی وار دوزلی چورکلی
باشی مه دومانلی یاشیل اتـــــــــکلی
باغلاری یئتیریر باری سهنــــــــدین
*
بالیندان گؤتوروب یاغا قاتاسان
بوللی نعمتیندن کاما چاتاســـــــان
دریب گوللرینــدن دسته دوتاسان
یوخدو گوللرینده خاری سهندین
*
«اصغر» او داغلارا قوشما یازاجاق
ســـــــــهندین داغیندان ایلهام آلاجاق
تاریخ صفــــــحه سینده دائم قالاجاق
ناموسی غیرتــــــــی عاری سهندین
اصغر اسدی

دیدگاه بگذارید

avatar
  Subscribe  
باخبر شدن از