روزنامه کثیرالانتشار سراسری صبح ایران
به دو زبان ترکی و فارسی

۱۳۹۹/۰۷/۰۵
روزنامه ساقی آذربایجان
تبلیغات
آمار بازدید
  • 0
  • 136
  • 761
  • 1,332,837
مدرنیتـه

«گئلئن وارد» مدرنیته‌نی مدرنیزاسیون دوشونجه‌سییله ایلگیده بیلدیکدن سونرا دئییرکی: «مدرنیزاسیون بیر شئیی گونده‌لیک اؤز احتیاج و مئتودلاری ایله گونجل‌لشدیریب اویوملاشدیرماق آنلامیندادیر. اؤرنک اوچون مطبخیمیزی مدرن‌لشدیرمک فیکرینه دوشمکدن مقصد، اونو ان سون و ان یئنی امکان و جیهازلارلا «بو گونکو» اوسلوبدا بَزه‌مک‌دیر» (وارد:۲۳:۱۳۸۴). او مدرنیته یا «مدرن دؤنم»ین اؤزللیک‌لرینی: «ایره‌لیله‌مه، نیک‌بین‌لیک (اوپتیمیست)، اوسچولوق (خردگرایی)، بیلیم، تئکنولوژی، توپلوم و سیاستده کسین‌لیک آراماق، بوتون باشقا بیلیم‌لرین اؤزولو اولان اؤزونو تانیماق دوشونجه‌سی» کیمی آنلاییشلاری ساییر. (یئنه اورادا:۲۱).
آرتیرمالییام یوخاریدا دئییلن مدرنیزاسیوندان مقصد، صنایع‌‌لشمه و یئنی تئکنولوژیک مئتودلارینا جیهازلانماقدیر. مدرنیته‌نی چئوره‌ین اؤزللیک‌لره باخدیقدا اونون داها چوخ توپلومسال گؤزونون تارازلیغی آغیرلاییر.
مدرنیته‌نی سوسیولوژیک بوجاقدان آچیقلایانلار ایچه‌ریسینده آنتونی گیدئنز اؤزل سئچیلیر. او، مدرنیزمین قورومسال بویوتلارینی دؤرد استقامتده گؤرور:
کاپیتالیزم(سرمایه‌چیلیک)، ائندوستورالیزم (صنایع‌لشمه)، نظارت و یوخلاما، قابالیق آراجلاری‌نین کنترولو.
او بو دؤرد بویوتو آشاغیداکی جدول ایله آچیقلاییر: (بونو آیریجا بیر فوتو کیمی آشاغیدا گتیرمیشم)
گیدئنزه گؤره:
«کاپیتالیزم، اؤزل سرمایه مولکیتی ایله مولکیت‌سیز موزدولو امک آراسیندا ایلیشکی مرکزینده قاتی‌لاشمیش بیر امتعه اوره‌تیم سیستئمی‌دیر…
«صنایع‌لشمه»نین [گیدئنز صنایع‌لشمه‌یه تئکنولوژیدن علاوه، صنعت و پئشه صاحیب‌لری او جومله‌دن یازار و صنعتچی‌لری ده قاتیر] آنا کاراکتئریست‌لییی ایسه جانسیز ماددی گوج قایناقلاری‌نین مال اوره‌تیمینده استفاده اولونماسی‌دیر. ماشینلار [تئکنولوژی] بو اوره‌تیم سورَجینده اؤنملی رول اویناییر… بوندان علاوه صنایع‌لشمه تکجه ایش چئوره‌سینی یوخ، همی ده نقلیات، رابیطه و گونده‌لیک ائو یاشامینی دا ائتکیله‌ییر…
«نظارت»، نظارت سیستئمی ایله باغلی اولان توپلولوقلارین سیاسی ساحه‌ده‌کی فعالیت‌لری‌نین «یوخلاما»سینا[تفتیش] اشاره ائدیر؛ آنجاق بیر اداره ائدیجی گوج تملی اولاراق اؤنمی، هئچ بیر بیچیمده تکجه بو ساحه‌یه محدود قالماییر. یوخلاما، دوغرودان اولا بیلر (فوکو طرفیندن دارتیشیلان بیر چوخ دورومداکی کیمی جزا ائولری، مکتب‌لر یادا آچیق چالیشما ساحه‌لری بونا اؤرنک وئریله بیلر) آنجاق داها تصوور ائدیجی اولاراق دولایلی‌دیر و اینفورماسییا کنترولو اوزرینده اؤز قورولوشونو قورور.
آییرد ائدیلمه‌سی لازیم اولان دؤردونجو بیر قورومسال بویوت واردیر: «قابالیق آراجلاری‌نین کنترولو». حربی گوج، مدرنیزم اؤنجه‌سی مدنیت‌لرین هر زامان مرکزی بیر اؤزللییی اولموشدور. آنجاق بو مدنیتده سیاسی مرکز، هئچ بیر زامان داواملی بیر حربی دستک مدافعه ائتمه‌یه یئتکین و صلاحیتلی دئییلدی و تیپیک اولاراق اؤز تورپاقلاریندا قابالیق آراجلاری اوزرینده اؤزونه مخصوص بیر کنترولو گئرچک‌لشدیرمه‌یین چوخ اوزاغیندا دورموشدور… قابالیق آراجلاری‌نین، تورپاق آچیسیندان قطعی‌لشن سرحدلر ایچینده باشاریقلی بیچیمده اؤز الینه آلینماسی، مدرن دؤولته مخصوصدور. بوندان علاوه، صنایع‌لشمه ایله، هم حربی تشکیلاتلانماغا هم ده استفاده ائتدیک‌لری سیلاحلارا قده ر اوزانان معین باغلارین وارلیغی دا بو کیفیتده‌دیر. «ساواشین صنایع‌لشمه‌سی»، اؤنجه بیر «بوتونسَل [اینتقراسییا اولموش] ساواش» دؤنمی‌نین و آرخاسیندان دا نووه چاغین یولونو آچاراق ساواشین کاراکتئرینی کؤکوندن دَییشیدیریر».. (گیدئنز:۱۹۹۴ :۶۲-۵۵)
مدرنیته‌نی بیر دؤنمسل سورج کیمی آراشدیرمایانلار دا وار. بونلارین باشیندا میشئل فوکو دورور. داها دوغروسو بونلارین نظرینده «مدرن» سؤزونه اکله‌نن «ایزم» اَکی، مدرنیته‌ ایله مدرنیزمی آییران آچار نؤقطه‌لردن‌دیر. فوکو «مدرنیته»نی زامان سوره‌سینده یاتیمینا(افقی) اوزانان زامان بؤلمه‌لرینه پارچالانان بیر دؤنم کیمی یوخ، اونو دیکئی اوخدا (عمودی محورده) زنگین‌لشن بیر باخیش، بیر دوشونجه، بیر دونیا گؤروشو کیمی آراشدیریر. منجه بو آندان «مدرنیته» اؤز آخاریندا باشقا بیر قاوراملا هم آنلامینی یئتکین‌لشدیریر هم ده اؤز جیغیرینی آییریر. او دا «مدرنیزم» قاورامی‌دیر. بیز، مدرنلشمه‌ سورجینده چئشیدلی و بعضن ده فرقلی آنلامدا اوچ سؤزله اوزلشیریک: مدرن، مدرنیته و مدرنیزم. مارشال بئرمن اؤز کیتابی‌نین قونوسو حاقدا «بو کیتاب مدرنلشمه (مدرنیزاسیون) و مدرنیزم دیالئکتیکینی آراشدیریر» سؤزونده ده بو فرقی سئزمک اولور. (مدرنیته و مدرنلیک:۹۲:۱۳۹۲)؛ بئرمن: ۳۱:۱۹۹۴).
قایناق: “مدرنیزمین چاغداشلیغی” کیتابیندا چاپ اولان “گله‌نک و مدرنیزم” مقاله‌مین بیر بؤلومو (صص ۲۸۳-۲۸۰)

دیدگاه بگذارید

avatar
  Subscribe  
باخبر شدن از
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز