مظفریه تیمچه‌سی

مظفریه تیمچه‌سی تبریزین اؤرتولو بازارینین ان گؤزل و قدیمی‌حصه‌لریندن بیریدیر. خالچا بازاری آدیلادا تانینان بو تیمچه، تبریز بازارینین ایکی مرتبه‌لی حصه‌لریندندیر. تیمچه‌نین اوجا تاوانی، ایکی یانیندا قورولان تاختا قاپیلاری، قیراقلاردا تعبیه اولونان کیچیک و بؤیوک بویالی پنجره‌لری و ائنلی کریدورلارینین اطرافیندا انتظاملا دوزولن حجره‌لری بو تیمچه‌یه گؤزللیک بخش ائده‌ن معمارلیق ائلمئنتلریندندیر. تیمچه قمری تاریخی اعتباریله ۱۳۰۵ینجی ایلده (تخمینا ۱۳۰ ایل بوندان اؤنجه) حاج شیخ جعفر قزوینی‌نین تشبثی‌ایله تیکیلیبدیر.
اونون آدینین “مظفریه” اولماسی باره‌ده بئله بیر روایت وار کی، گویا او زامانلار شه‌هرده تیکیلن هر بیر اؤنملی بینانی، حؤرمت نیشانی اولاراق شه‌هرین حاکیمینه هدیه ائدرمیشلر. بو تیمچه تیکیلیب قورتاراندان سونرادا، بیر قاعده اولاراق اونون بانیسی‌ تیمچه‌نی واختی‌یلا تبریزده یاشایان قاجار ولیعهدی مظفرالدین میرزایا هدیه ائتمه‌لی‌ اولاجاقمیش. آنجاق حاج شیخ جعفر قزوینی بو موضوعنو چوخ اوستالیقلا اؤز نفعینه حل ائدیر. بئله کی او، تیمچه‌نین آچیلیش گونو ولیعهدین تیمچه‌نین چوخ گؤزل اولدوغو سؤزونون مقابلینده، “بو تیمچه‌نین گؤزللیگی ولیعهدین آدینی داشیماقلا داهادا گؤزللشه‌جک. اونا گؤره‌ده من تیمچه‌نین آدینی “مظفریه” قویموشام”- دئییر.
بئله‌لیکله تیمچه‌نین یالنیز آدی “مظفریه” یعنی مظفرالدین میرزایا منسوب اولور و ولیعهدده بیر سؤز دئمه‌دن بو تکلیفی قبول ائدیر. روشن نوروزی

دیدگاه بگذارید

avatar
  Subscribe  
باخبر شدن از