نیسگیل

سحر آلاتورانلیق،یوخودان آییلماق همن،اوزومده ن ایکی یاش کیچیک اولان باجیم ایله بیرلیکده کووشنه ساری یولا دوشدوک.سحرین سرین مئهی قابیرغالاریمیزا دؤیوردو.شئه ده مونجوق – مونجوق مرجی قوزالارینین اوستونه اله نیردی.
هله بیز ائرته لی دورسایدیق دا، بیزده ن اونجه تارلالارا چاتانلار چوخودو. بیز یئیین – یئیین گئده رک،اللریمیزده اولان ساری یاغ دورمنج لرینه هرده ن بیر دیش باتیریردیق.
هاوا تزه – تزه ایشیقلانیردی،سحر شئهی نین واختلی اولماسی، کندی لری کووشنه ساری چکمیشدی.دالا قالان عاییله لرده، بوتون عاییله عوضولری ایله بیرلیکده، اکین درمک اوچون،سئحیرلی کووشنه آیاق قویوردولار.بویوک – کیچیک تارلالاردا کندلی لرین اولدوغو،اوزاقدان گوزه چارپیردی.
بیرده ن محصولو وغمله میش بیر مرجی تارلاسینین آرخاسیندا دایانیریق، بو تارلا گوره سن بیزیم اولاجاق می؟! دئیه ره ک، اوزوموزوه آرخایینلیق وئره ره ک،وار گوجوموزله درمه یه باشلاییریق
درهادردی،آی باجی،هامی نین هم گووو،ایمه جی سی،یوخسا دا باشقا ایش چی سی وار دئیه،کومک سیز اولماغیمیزی،دیله گتیریب،کدرلنیردیم!دا نه بیلیم،منیم اون دورد و باجیمین دا اون ایکی یاشلی اولماغی،داها دا منه آغیر و آجینیاقلی گلیردی!آمما هرده ن فلک ده ن گیلئیلن سه ی دیم ده،هئچ واخت،غورورومو آیاق آلتیندا سیندیرا بیلمه ییردیم!
– دای نه بیلیم آی باجی،شانسیمیز اولسایدی،آتامیز واختسیزجاسینا سئلده بوغولمازدی!ایندی ایشچی ده تاپیلماییر،حاققی ایله گلیب،بیزه یاردیم ائده.دئییرلر،صاغیر مالی دی!اونلاردان آلدیغیمیز امه یی یئمک اولماز!یوخسادا یئتیم – یئسیر دی لر،اونلارا یاردیم ائدینجه،گئدیب وارلی – کارلی لارا کومک ائدیب،یاخشی امک حاققی قازاناریق دئیه،بیر کیمسه بیزه خوش اوز گوسته رمه ییردی!
دومان قات – قات یئر ایله گوی آراسیندا سورونوردو،دومان سوروندوکجه یئنه شئه سالخیم لاری مرجی پیتالارینین اوستونو آلیردی.فیکریمیزده ن کئچن خیاللار،اونوموزده اومود یارادیردی! یوخسا دا آیدین بیر گله جه یه چاتماغیمیزی قارشیمیزدا گوروردوک! بئله بیر حالدا یئنه باجیما ساری اوز توتوب،دئییردیم:- آی باجی،گره ک الیمیزده ن گلدیکجه یئیین ده ره ک.بو سوزو دئمک له،یازیق باجیما دا تک اولدوغوموزو بیلیندیریردیم!هابئله اونو بو گئرچک له تانیش ائدیردیم.آمما اوره یینی ایشیقلاندیرماق اوچون هر ده ن ده اومودلو سوزلر دیلیمه گتیریردیم.
آنجاق اونون خیال دونیاسی و آرخاسیندا گئرچکلرله یاناشماسی منه اوستو اورتولو ایدی! بو حالدا یازیق باجیمدا،قارشیمیزداکی آیدین بیر گله جه یه اینانیردی.او، ایکی اللی اولسایدی دا،ایکی سی نی ده بورج آلاراق،مرجی تارلاسینا آرتیق توو گلیردی!دئمه لی اونون آرخاسیندا دره نده ،اونلا آیاقلاشا بیلمه دیییمی دویوردوم.
بولدویوموز ولین یاری سیندا دایاناراق،آی باجی،داها یورولدوم،نه اولارکی بو ولی چیخاندان سونرا یئمک،یئمک اوچون اوتوراق،یئمک حالدا منیم ده بئلیمین آغری سی توختاسین،- دئدیم.
– باجیم جاوابیمدا دئدی:
آی قارداش،باشیوا دولانیم!هله تئزدی.گورورسن کی قونشولاریمیز هله ده یئمک،یئمه یه اوتورماییبلار.اونلار یئمک،یئمه یه اوتوراندا،بیزده اوتوراریق.یوخسا بیز تئز اوتورساق،اونلار بیزی لاغا قویارلار! دئیه رلر کی هله گلمه میش،یئمه یه باشلادیلار! بئله اولسا دا بس هانسی زامان مرجی دره جه ییک؟!
من ده یئنه جاوابیندا دئییره م:
ـ آی باجی،بوراخا،« قارداشخان» ساعات اون بیرده یئمه یه اوتورار.اونو نئجه اوزوموزه اورنک توتاق می؟ اونا باخساق،گره ک آجیمیزدان اوله ک!
باجیم یئنه دئییر:
ـ آی قارداش،ایندی درمه سه ک،شئه چکیلر.داها وقمله میش مرجی نی نئجه دره بیله رییک! یوخسا دا قوزالار توکوله ر،هم ده ایش قاباغا گئتمه ز.
یئنه باشیمی آشاغی سالیب، مرجی درمه یه باشلاییرام! دره – دره خیال منی چولقالاییر.گوره سن: ناواخت محصولوموزو ییغیشدیرییب،خرمه نه آپاریب،دویه جه ییک؟! گوره جه یم او گونو کی مرجی نی آپاریب،شهرده ساتمیشام،اونون پولی ایله مئهریبان باجیما،بیر جوت قیزیل سیرغا آلمیشمام؟! بئله خیال منی چولقادیقدا،اوره ییمده قالانان کدرلر اومودا چئویلیردی!
خیالدا سویله دیییمین، هردن بیر نئچه سینی دیلیمه گتیریردیم!آی باجی،اینشاالله کی مرجی نین یولی ایله سنه،بو ایل بیر جوت قیزیل سیرغا آلاجاغام.
باجیم دا جاوابیمدا دئییر:
ـ آی قارداش،سنین ساغلیغین منه قیزیل سیرغادی! چوخ شئیلرده ائویمیزه گره گ دیر،هله ایندی یه دک، آلینماییب دی.اونلار آلینسالار بس دی. دئمه لی سنه ده پول احتیاج دی،آخی شهره گئدیب،اورادا درس اوخویاجاقسان.قیزیل سیرغا دان اوستون،سنین مکتب پالتارین،کیتابلارین و باشقا آلاجاقلارین دی! ائله سن اونلاری آلا بیلسه ن،بویوک بیر ایش دی،من ده قیزیل سیرغا دان واز کئچیره م!
یازان: عسگر علیائی کلیان ( یاشیل )

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz