نیشاط خالانین گؤزلری

اؤزونو تانییاندان بری گؤزلری
قاپیــــیا دیکیلی قالیب؛ اؤزونو تانییاندان
دؤنه – دؤنه اؤزونــــدن «نه اوچون بس
من قارا یازی‌نین آدینی نیشاط قویوبلار؟»
سوروشموشدو. هس-هوس آنلــــایاندان
گؤزلری قاپییا دیکیلیر: «هاچـــان آنام
سفردن گله‌جک؟» چوخ چکمیر گلیر،
آمما، آنا یئرینه آنالیق گلیر؛ الیـــــنده
چـــوبوق سوپورگه‌سی، آغزیندا آجی
دیل، باخیشیندا ایسه هده – قورخو.
ائولنمک معناسین باشا دوشن گوندن،
نیشاطین گؤزلری قاپییا دیکیلیر:
«هاچان بیریسی تاپیلاجاق، قولومدان
یاپیشاجاق، منی بو ائودن قورتاراجاق؟»
تاپیلیر بیریسی؛ قولونداندا یاپیشــــــیر،
بخت ائوینه‌ده آپاریــــر، آمما نیشاط
خالانین گؤزلری قاپیدان اوزولمه‌ییر:
«هاچان بویوما اوشاق دوشه‌جک،
‌هاچان دؤشـــــومدن سوت
داشلاناجاق، داشاجاق؟»
بیــر ایل، ایکی
ایــــل، اوچ
ایل… داوا – درمان، پیتیک – یازی، چیلله سویو تؤکمک، نذیر وئرمک، امامزادایا دخیل دوشمک و…، اون دؤرد ایل چکیر اوشاق بویونا دوشور؛ کؤرپه‌سی آغلاییر دا، دؤشلری داشلانیر دا، داشیر دا، آمما یئنه‌ده نیشاط خالانین گؤزلری قاپیدان اوزولمه‌ییر.
دؤوران ده‌ییشیر؛ یئرلر بؤلونور، ارباب کنددن کؤچور؛ کاتدانین سؤزو کسردن دوشور؛ کند باشینا بوراخیلیر؛ کهریز خارابا قالیر، قورویور؛ سولو یئرلر دئمه چئوریلیر؛ دئم یئرلر قوراقلیقدان، قیتلیقدان کندلیلری شهره کؤچوردور.
یاخین شهرده ایش تاپیلمادان، نیشاطین اریده غوربت یولون توتوب گئدیر.
نیشاط خالانین غوربتچیل اری سون دفه اوغلو بئش یاشینا دولاندا ائوه گلیر.
بیر آی قالیر، سونرا گئدیر. او گئدیشدن داها گئری قاییتماییر. یئنه‌ده نیشاط خالانین بوینو بوکولور.
یئنه‌ده گؤزلری قاپییا تیکیلیر. ایللر اؤتور، دؤوران دولانیر.
بو دؤنه دؤوران کؤکدن دیبدن ده‌ییشیر. نیشاط خالا آمما اؤز عالمینی یاشاییر.
یالنیز، اوغلو جبهه‌یه یازیلان گون اؤزونه گلیر.
هله اؤزون اله آلیب آلمامیش،
گ«ـــؤزونون آغی قاراسی بیرجه بالاسی
محاربه‌یه یوللانیر.
بیر نئچه آی هردن بیر گلیر، گئدیر.
سونرا داها گلمه‌ییر؛ ائله آتاسی سایاقدا نه
اؤزو گلیر نه‌ده خبری.
بو دؤنه نیشاط خالانین بوتون وارلیـغی
بیر جوت گؤزه چئوریلیر تیکــــــیلیر
قاپییا. اون ایکی ایل تامام گؤزله‌ییر.
نهایت گلیر چیخیر، آنجــــــــاق اؤزو
گلمیرسه‌ده، پلاکی گلیب چاتیر.
بو دؤنه نیشاط خالانین بویـــــنو دئییل،
بئلی بوکولور. عؤمورلـــــوک اولاراق
گؤزلری قاپییا تیکیلیر: «هاچان عزرائیل
قاپیدان گیره‌جـــــک، اونو آغ خلعتینه
گئییندیره‌جک، قولــــــوندان توتوب
اوغلونون یانینا آپاراجاق؟» هله‌ده
کی وار نیشاط خالانین گؤزلری
قاپیدادیر.
نیشاط خالانین گؤزلری
گؤزله‌ییش گوزگوسودور.
نریمان ناظیم

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz