روزنامه کثیرالانتشار سراسری صبح ایران
به دو زبان ترکی و فارسی

۱۳۹۷/۰۹/۲۰
روزنامه ساقی آذربایجان
پخله وئــریم ؟

فرمان عمی نین پخله چی توکانی بیزیم ائوین یاخینلیغیندا دیر. آخشامدان آخشاما ایش یئرینده ن چیخاندا ائوه گئتمه میشده ن اورا باش ویریب فرمان عمی نین داشدان یوموشاق پخله لرین یئمه سم او گونو ائله بیل یاشامامیشام.
البته دوزون آختارساز اصلینده مقصد پخله یئمک ده ییل، تکجه فرمان عمی نین یئنی ـ یئنی سؤزلرین، ایشلرین ائشیدیب گؤرمک دیر. ایری اوتوروب دوز دانیشساق فرمان عمی نین ساواد سیز لیغینا باخمایاراق هرده ن ائله سؤزلر دانیشیر، ائله سؤزلر دئییر، ائله زادلاردان خبر وئریر کی آز قالیرسان بوینوز یئرینه نه بیلیم نه چیخارداسان!! همی ده فرمان عمی محلله نین آغ ساققالی اولدوغونا؛ هرده نـده آت گئتمز ایشلر ده ن، یئرلرده ن خبر وئرمه سینه گؤره محلله ایچینده یامان حؤرمتی وار. من ایللر بویو درس اوخوموشامسا اونون قده ر بیلسئیدیم بلکه ده ایندی مجلیسه زادا کاندیدا زاد اولاردیم. یادا بیلمیره م بعضی ایشلرده الیم اولاردی. بعضی ایشلر ده دئینده اختلاس میختیلاس زاد یوخ ها فیکریز جایماسین بعضی ایشلر دئینده فیکریم بعضی ایشلردیر…آنجاق اوزون سؤزون قیسّاسی بو کی فرمان عمی یامان کیشی دیر. اینانماساز دالیمجا گلین سیزی آپاریم اونون توکانینا گؤرون کی یالان دانیشماییرام.
دونن یئنه ده هر گونه تای یولومو فرمان عمی نین توکانیندان سالدیم. فرمان عمی دئمه، دئ چرچیل. دئ هیتلر، نه بیلیم دئ آللاهین یانار اودو. قاپیدان ایچری گیردیم. منی گؤرمکده اؤزونو یئتیریب: آی مهندیس بس سن هارداسان؟ دئیه بوش صندل لرین بیرینی منه گؤسده ردی.هویوخموشدوم.
ـ آی مهندیس سنی آللاه یئتیردی.
ـ نه اولوب فرمان عمی؟ دئیه فرمان عمی گؤسده ره ن صندلین اوستونده اوتوردوم. میزلرین اوستونو سیلن چیگنینده کی دسماللا آلنینی سیلرکن: آی مهندیس بیلمیره م بو بعضی آداملار نییه منده ن اَل چکمیرلر!!
ـ آی فرمان عمی منی جانا گتیردین آخی، دئمیرسن نه اولوب؟ دئیه بارماغیملا پخله تییانین عمی یه گؤسده ردیم. عمی اَلینده کی ملاغانی قیلینج کیمی گؤیده بیر فیرلادیب سونرا باسدی تییانین ایچینه. اطرافدا اوتورانلار­سا هامیسی قولاقلارین شوشله میشدیلر گؤرسونلر عمی نه دئیه جک.
فرمان عمی ملاغانی تییانین تکینده گزدیره ـ گزدیره سانکی باهالی بیر زاد آختاریر اوزونو منه ساری توتوب: مهندیس من ستار عمی ایله بیرلیکده مشروطه زامانیندا استبدادلا دؤیوشموشم. بونو سن هامیدان یاخشی بیلیرسن کی! دئدی.
بوغازیم بیچیلمیشدی. من هاردان بیلیردیم فرمان عمی ستارخانلا بیرلیکده مشروطه زامانی دؤیوشوب؟!!
ـ آخی… فرمان عمی من…
ـ هه، مهندیس بیلیره م سن ائله اؤزونده اوزامان ستارعمی نین مجاهید لرینده ن بیری ایدین.
من لاپ گیج قالمیشدیم. بو سؤزون جاوابیندا نه دئمه­ لی اولدوغومو بیلمیردیم. سونرا فرمان عمی اوزونو اطرافدان هوروت هوروت اونا باخانلارا توتوب: مهندیسین بئله لیگینه باخمایین ها، بو اؤزو یامان ایگید آدامدیر. واقتیندا سیزه دئیه ره م او زامان بو نه ایشلر گؤروب. دئیه تییانین تکینده ن بیر ملاغا دولدوروب بوشقابلارین بیرینه تؤکرکن منه ساری گلیب بوشقا بی میزین اوستونه قویوب منیم اوزومه اَیری ـ اَیری باخدیقدان سونرا یئنه تییانین باشینا قاییتدی.
ـ هه، مهندیس دئییردیم، دونن سنده ن سونرا بیر نفر بیلمیره م کیمین سؤزونه آلدانیب بوردا اوتورموشدو سفئه له ییردی. آلتدان ـ التدان منیم اوزومه باخیب، یئنه سؤزونه بئله داوام وئردی: مهندیس منی ایسته مه ین آداملار ایسته ینلریمده ن چوخدولار. اونلار چالیشیرلار منیم آبیریمی گؤتورسونلر. هئچ بیریسی منی گؤزلری گؤتورمور. بیلمیرسن یامان پیس زامانا اولوب. یئنه منیم اوزومه باخیب سؤزلرینه منده ن تایید ایسته ییب باشیمی آشاغی اوستده آپاردیقدا یئنه سؤزونون آردیندا: یادیندا اولسا اوندا من ستار عمی ایله چرنداب محلله سینده مشروطه مجاهید لرینده ن بیری ایدیم. بئله دی یا بئله ده ییل؟دئدی. یئنه باشیمی آشاغی اوستده آپاریب سؤزونو دامغالادیم.
ـ مهندیس اوگونو هئچ یادیمدان چیخماز ستار عمی کربلایی حسین خان باغوان ایلن دوه چی محلله سینده دؤیوشه باشلاری قاریشمیشدی. باشچی لاردان بیلمه دیم هانکیسی منی چاغیریب: آی فرمان سنده ن سونرا هئچ کیمه اینانمیرام، آتینی مینیب بو نامه نی سردارا چاتدیرمالیسان. دئدی. منده تئز قیر آتی مینیب باشچی نین سؤزونو یئرینه یئتیرمک اوچون دوه چی محلله سینه ساری یوللاندیم. توپ توفنگ گولله سی گؤیده ن نئجه یاغیر، سانکی یاغیشدی. فرمان عمی دانیشا ـ دانیشا بیرگؤزوده منده ایدی. دانیشماغا قیزیشاندا بیلمزدی هاردان دانیشیر نه دئییر. منده بیلمیردیم پخله یئییم یوخسا عمی نین سؤزلرینه قولاق آسیب اونون تاییدینده باشیمی توولاییم!! گاهدان بیر گؤز آلتی اطرافدا اوتورانلارا گؤز دولاندیریردیم. هامیسی ائله گؤزلرین فرمانین آغزینا تیکمیشدیلر ائله بیل اونون آغزیندا ایندیجه قیزیل تؤکوله جک.
ـ مهندیس فیکرین منده؟ قوشبازلیق ائله مه منه قولاق آس دئیه عمی، سؤزلرینه داوام وئردی. آغای مهندیس شیرین جانیوا آند اولسون آتین اوستونده ائله اوتورموشام، سانکی هیتلر تانک اوستونده اوتوروب اوردوسونا روسیه یه فرمان حمله سی وئریر. نئجه آتی میزله ییره م. توپ توفنگ گولله سی ده منه طرف گلدیکده باشیمی اَییب ردده وئریره م. بیلمیره م نه قده ر چکدی من اؤزومو سردارا چاتدیریدیم. گؤزدوم سردار شیرین جانی ایله چالیشیر. مسلسل اَلینده دوشمنین جانینا زلزله سالیب. آنجاق پیس کؤکده اؤزومو سردارا چاتدیریب آتدان یئره یئنیب: سردار سیزه مکتوب گتیرمیشم دئیه اونا یاخینلاشدیم.
سردار دؤیوشمکده ن اَل گؤتوروب منه ساری دؤندو، ائله دؤندو ساندیم ایندیجه منی دوشمنله ده ییشیک توتاجاق. آنجاق مکتوبو سردارا ساری توتوب احتیرام ائله دیم. سردار بیر منه باخیب بیر قیراقدا باغلادیغیم آتا باخیب ساغول مجاهید سنی مین یاشا دئییرکن منده ن: بو آتلا گلیب سن؟ سوروشدو. احتیراملا اَلیمی سینه مه قویوب بلی سردار بو آتلا گلمیشم دئدینده گؤردوم سردارین آغزی آچیق قالیب. فرمان عمی سؤزلرینین بوراسینا چاتاندا یئنه اوزونو منه ساری توتوب، مهندیس اؤزو سرداری منده ن یاخشی تانییاردی. اینانماساز اوندان سوروشون دئدی. آردیندا هوروت ـ هوروت اونا باخانلارا: هه، قارداش سردار منده ن: مجاهید بس دئمکده ن بو آتلا گلیب سن؟ سوروشدو.
یئنه احتیراملا اَلیمی سینه مه قویوب: بلی سردار بو آتلا گلمیشم دئدیم. سردار تعجوبله منده ن: بس بو آتین باشی هانی؟ سوروشاندا، آرخایا باخدیقدا بیلدیم آتین باشین توپ گولله سی آپاریب. یازیق آتین باشیندان نئجه قان گئدیریدی. آللاه سیزی ایناندیرسین، مهندیس یاخشی بیلیر، آز قالدیم اوتاندیغیمدان یئره گیره م. سردارا نه دئیه جه ییمی بیلیمیردیم. تئز فیکیرله شیب: سردار آتدا سیزین فدایی لریز ده ندیر. اودا گره ک باشین سیزین یولونوزدا وئرسین دئیه سردارا ساری دؤندوم. سردار منی قوجاقلاییب: مجاهید منیم سنه تای بئش ـ آلتی دؤیوشه نیم اولسایدی، ایندی من اؤزوم گلیب بوردا دؤیوشمزدیم دئدی.
سؤزلر بورا چاتاندا پخله لری قوتاران بوشقابی فرمان عمی یه ساری توتوب: سویوندا وئر دئدیم. فرمان عمی منده سؤزلرینه تایید اوموردو. چاره سیزلیکده ن: هه، فرمان عمی او گونلر اولایدی کاش. دئدیم. فرمان عمی فاتئح سردار کیمی ملاغانی باشینین اوستونده فیرلادیب: گؤردوز؟ گؤردوز یالان دئمیره م؟ دئدیم مهندیس گلسه منیم سؤزلریمی تایید ائده جک دئدی. آنجاق کی فرمان عمی سئویندیگینده ن قاناد چیخاردیب اوچماق ایسته ییردی.
ـ فرمان عمی دئمه دین آخی دونن کی اوغلان نه دئییردی؟ هه، مهندیس، دونن بورا گلن اوغلان منه: آخی سن کی بئله دئییرسن، بو سؤزلره شاهیدین ده واردیر سوروشوردو. منده : صاباح یئنه ده گل، مهندیس گلسین اوندا گؤره رسن یالان دئمیره م دئدیم جاوابیندا. سونرا اوزونو اوتورانلارا توتوب: آی جاماعات گؤردوز کی من دئدیکلریمی مهندیس ده تایید ائله دی دئدی.
سونرا باشقا بیر بوشقاب گؤتوروب منه ساری باخیب: مهندیس یئنه پخله وئریم؟ دئدی.
یاواش ـ یاواش گئتمک واقتی چاتمیشدیر. او گونوده ایش یئرینده چوخ یورولموشدوم. آیاغا قالخیب یوخ عمی ساغول دئدیم. فرمان عمی نین پخله پولون وئرمک اوچون اونا ساری یؤنلدیم. ـ مهندیس هارا اوتور هله سنله ایشیم واردیر. پولونودا قوی جیبینه سونرا آلارام دئدی. چوخ دئینده ن سونرا عمی یامان یورولموشام صاباح گؤروشه ریک دئیه عمی ایله گؤروشوب، ساغوللاشیب، توکاندا ائشییه چیخدیم. دوزون آختارساز عمی نین سؤزلری منی ائله توتموشدو کی سانیردیم من ائله او گونو فرمان عمی ایله دؤیوش مئیدانیندا ایمیشم.
رضا عالی

دیدگاه بگذارید

avatar
  Subscribe  
باخبر شدن از
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز