کلاسیک و مدرن ادبیات ایلیشگیلری حاقدا بیر نئچه توییت

فضولی، قوسی، نسیمی کیمی شاعیرلر ایندی یاشاسایدیلار چاغداش ادبیات اوسلوبلاریندادا شعر یازاردیلار، . چون کی چاغیمیزین بؤیوک شاعیرلری ناظیم حکمت‌دن توت، ادونیس، احمد شاملو، محمود درویش و ….ـه/ا کیمی هامیسی یئنی اوسلوبلاردا یازاردیلار.
*
کئچمیشی ساوونوب ایندینی دانانلار، کئچمیش‌ده اولان داهیلرین “دوها”لارینا دوشماندیلار. چون او داهی‌لر اؤز زامانلاریندا گئریچی اولوب یئنی فضالاردان قاچسایدیلار، یئنی ایزلر بوراخا بیلمه‌ییب آدلاری دا تاریخده قالمازی بو گون گئریچی‌لره بوت اولماق اوچون.
*
بولوت قاراچورلو “سهند” سازیمین سؤزونده گئدیب دده قورقوردلا گؤروشور، اوندان ایستیر قاییدیب توپلومو بو فلاکتدن نجات وئرسین. دده قورقود دئییر: دؤن اؤز زامانینا اوغلوم،
“هر عصرین اؤزونون اؤز قورقودو وار”
سهند بورادا کئچمیشله دوغرو بیچیمده ایلگیلنمه‌یین یولونو بیزه گؤستریر.
*
بیزده کئچمیش ادبیاتیمیزلا ساغلام ایلگی قورولماییر. کیمی‌لری کئچمیشی اتوپیا گؤروب،‌ کیمی‌لری بوسبوتون دانیر. ادونیس عربین ان مدرن شاعرلریندن، کلاسیک اثرلردن گؤزل بیر آنتولوژی یاییملاییب‌. احمد شاملو همیشه تاریخ بیهقی و قدیم فارسی تفسیرلری اوخویوب، شعرینین دیلینده او دیله دایاناردی .
*
محمود درویشین بیر گؤزو بودلر، رمبو، پازدا اولسایدی بیر گؤزو لسان العربده، معری‌ده ایدی. بیر قولاغی ایله پیانو دینلسه‌ بیر قولاغی مارسیل خلیفه‌نین عود ایفالارینی دینلردی. اونلار تک قانادلی قانادلانیب یئنی اوفوقلارین کشف ائتمه‌سینی امکانسیز بیلیردیلر.
*
آرادا باشقا بیر مقام دا وار. فضولی‌یه سؤیکه‌نن گرک ابن‌سینانی، فارابینی‌ ده اوخویا. یئنی ادبیاتا دایانان گرک اونون آرخاسیندا اولان فلسفه‌نین کلیاتیندان بیر شئی‌لر قاورایا. فضولی اؤز زامانیندا اولان بوتون فلسفی – کلامی چلیشگیلری گئنل اولاراق بیلیردی و او حاقدا بیر کیتابدا یازیب‌دیر.
*
ساده‌جه فضولی اوخویوب کئچمیش ادبیات حاقدا دانیشماق، بازاردا فقط بیر ویترینی گؤروب، بازار،‌ تولید مناسبت‌لری، سیاست و … قونولاردان دانیشماق کیمی‌دیر. هر بازاردا اولوشان ویتری‌نین دالیندا اونلارجا ندن و اونلارجا پروژه و پروسه واردیر. اونلاری بیلمه‌دن ویترینی آنالیز ائتمک اولماز.
حیدر_بیات

دیدگاه بگذارید

avatar
  Subscribe  
باخبر شدن از