… علـــــی ایشــــه
گئتمـــــــیردی. فیکرین
توپلایا بیلمیردی. دوشــونوردو
گؤره‌سن نئجه اولاجاق؟ آخـــشام
اوشاغی‌نین قیزدیرمادان هذیان دئمه‌یین
اونوتمامیشدی. حیات یولداشی اوشاغی
حکیـــــــمه آپارماسینی دئسه‌ده، قولاق
آردینــــــا وورموشدو. بیلیردی کی هئچ
حکیم پولسوز باخمیر. هله حکیم باخسادا
درمان دوکانلاری پولسوز درمان وئرمزلر. اودور کی بیر تئشت گتیریب، اوشاغین ال- آیاغین سویوق سو ایله یویاراق، اونون تضیقینی آزالتمیشدی. اوشاق بیر آز اؤزونه گلرک یوخویا گئتمیشدی. اودا مطبخه کئچیب، بیر- ایکی سیگارت توستوله‌دندن سونرا یاتاق اوتاغینا کئچدیکده، یوخوسو عرشه چکیلمیشدی. دان یئری سؤکولمه‌میش یئریندن دوروب گئیینه‌رک، کوچه‌یه چیخمیشدی. همشه بئله واخلی‌دان دوروردو. تاکسی کیرایه‌سی وئرمه‌سین دئیه، ایش یئرینه پیادا گئده‌رک،‌هامیدان تئز ایش یئرینده اولدوغوندان دونندن قالان تؤر-تؤکونتولری ساهمانلاییب، اوستانین گلمه‌سینی گؤزله‌ییردی. آمما بوگون هئچ نه ائتمه‌دن بیر کونجه سیخیلیب، فیکره دالمیشدی. اوستانین گلمه‌سینی‌ده بیلمه‌میشدی. اوستا اونو چاغیراندان سونرا اؤزونو اله آلیب، یئریندن قالخدی :
– سالام صاباحین خئیر اوستا
– صاباحین خئیر.
اوستا آشاغیدان یوخاری کیشینی سوزدو. نسه اطرافا بویلانیب سؤزه گلدی:
-ائله بیل کئفسیزسن ، یوخ.
-یوخ ، نئجه‌یم؟
-هئچ ، ائله- بئله سوروشدوم.
اوستا دای هئچ‌نه دئمه‌دی. ایش پالتارین دییشیب، ایشه باشلادی. آمما گؤروردو بو گونده‌کی کؤمکچیسی دئییل. هئچ ائله بیل ایشی دوشونمور،
گون‌اورتایا یاخین ایشدن
ال چکه‌رک:
-بیر آز ایشیم وار ، سن‌ده گئت.
***
کوچه‌یه گیره‌رکن، قاپیــــدا ییغینجاق
گؤرونـــــدو. بوتون مـــحلله، قادین –
اوشـــــاقلار اونون قاپیسیــــنی دؤوره‌یه
آلمیشــــــدیلار. حتا کوچـــه‌نین تینینده
اولان اسماعیل باققال‌دا دوکانینی باغلامایاراق، اورادایدی.
کوچه‌یه گیرر-گیرمز آیاقلاری سوستلاشدی. گؤزلری تورلاندی. قاپی‌یا چاتار-چاتماز، ائله بیل بیر چیناری کؤتویوندن تورپاقدان آییردیلار، گروم-گوپپاز اوزاندی.
هرنه‌یی آنلامیشدی. یئریندن قالخماغا گوجو قالمامیشدی. باشا دوشوردوکی…
ائلیار پولاد