روزنامه کثیرالانتشار سراسری صبح ایران
به دو زبان ترکی و فارسی

۱۳۹۷/۰۸/۲۷
روزنامه ساقی آذربایجان
آمار بازدید
  • کاربران حاضر: 0
  • بازدید امروز: 224
  • بازدید دیروز: 1,580
  • کل بازدید ها: 874,006
گئدیرم ساغلیقلا قال! ( شاعر درویش جوانشیر بیر باخیشدا )

جوانشیر موسی اوغلو ممّدوف ۱۹۵۴-نجو ایلده نخجوان شهری­نین علی ­آباد کندینده آنادان اولموشدور. ۱۹۸۲-نجی ایلده آذربایجان دولت اونیوئرسیتئتی­نین فیلولوگیا فاکولته ­سینی بیتیرن درویش طلبه ­لیک ایللریندن بدیعی یارادیجیلیغا باشلامیشدیر، یعنی او ۷۰-نجی ایللردن پوئزیا عالمینه قدم قویموشدور.
“گؤزومون ایلک اووو” ۱۹۸۱-نجی، “عمروموزده یانان چیراق” ۱۹۸۹-نجو، “من قریبین قارداشی­یام” ۱۹۹۶-نجی، “دورنالار قریب اولمور” ۲۰۰۰-نجی، “حاقدان یانان بیر چیراغام” ۲۰۱۰-نجو، “قبله یئلی” ۲۰۱۳-نجو، الینیزده ­کی “هؤرون منی دیوارلارا” شعر توپلوسو ایسه ۲۰۱۲-نجی ایلده اونون نشر ائدیلمیش اثرلری­دیرلر.
من درویشین باشقا اثرلرینی اوخومادیغیما رغماً، اونون نئجه بیر شخصیت اولدوغونو محض “هؤرون منی دیوارلارا” کتابیندان چوخ راحاتجاسینا باشا دوشورم، باشقا ایفاده ایله دئسک درویشین بو اثری اونون ایچری دونیاسینی گؤسترمکده، دیشاری دونیایلا قورودوغو مناسبتینی سرگیله ­مکده لازمی قده ر یئترلی­دیر. او، ایلک اؤنجه یاشامدا ایچینده حرکت ائده­ جه ­یی چرچیوه ­نی بللندیریر، انسانجیل دیه­رلری اؤزونه مقصد گؤتوره ­رک وارلیغین، کائناتین و اؤزونون سئیرینه واریر. اولو تانری­یا اینام، دوزلوک، صداقت، یاخشیلیق، انسانلارین برابر حقوقا مالک اولماقلاری، رئاللیق، سئوگی، محبت، یالان دونیایا باغلانماماق و اینجه بیر نیسگیل درویش شعری­نین آپاریجیلاریندان­ ساییلیر. من دئدیکلریمی اونون شعریندن اؤرنکلر وئرمکله اساسلاندیرماق ایسته ­ییرم؛ درویش دونیانین و انسانین ماهیّتینی دوشونه­رک ایدئولوژیک و فلسفی باخیشلارینی دا شعرلرینده یئرلشدیرمکله انسان حیاتینا، انسان داورانیشینا ندنلرینی وورغولایاراق آیدینلیق گتیرمه ­یه چالیشیر؛ بیزی بیر آللاه یارادیب­سا بیر-بیره بوینوز گؤسترمه­یه، فخر ساتماغا، اؤیونمه ­یه نه سبب قالیر کی:
یا درویش اول یا شاه عباس،
بیـــــــزی بیر یارادان وار
و یا اونون اؤزونو، نفسینی آریدیب تانری­یا قوووشماق آماجی عرفان ­بویالی مصرعلرینده اؤزونو گؤسترمکده­ دیر:
اؤلومده گوناه بیلـــــمرم
بیلسم کی گوناهسیز اؤلدوم
حقه چاتماق، حقه دوغرو یورومک، حق اوغروندا مبارزه آپارماق انسانلارین آمالی و قاباریق خصوصیتلریندن بیری­ دیر، بس حقدن قورخان کیمسه­ نین اؤزونده بیر پروبلئم اولمالی­دیر:
سن نییه حاقدان قورخورسان، حلالیندا حرام وار؟!
زماندان آسیلی اولاراق، آداملار گئت-گئده دونیا چیرکابینا بولاشیر، انسان آدینا لایق یاشامدان اوزاقلاشیرلار تأسّفله، بئله بیر دورومدا، شاعر صاف-صادق انسانلاری بولماقدا چتینلیک چکیر، بیردن اؤزونه گلیر کی اؤزو ده سهو اوجوندان و یا خود مجبور حالدا، آختاردیغیندان اوزاقلاشمادادیر، نتیجه­ ده قلمیندن بئله بیر ایفاده سوزولور:
گوزگوده ده اؤزومون اوخشاریمی گؤرمه­دیم!
بو قونودا درویش دونیایلا باریشا بیلمیر، داها دوغروسو دونیایا آلیشا بیلمیر، اونون کئچیجی ماهیّتینی بئله آیدینلادیر:
دونیا ائویمیزدی، دئییردین بابا
بیریسی قاپیدی، دؤردو پنجره
دونیایا گـلندن گئدن تئز بیلیر
سئوینجی قاپیدی، دردی پنجره.
و نهایت یئنیلمزلیک موقعینده دوراراق دونیایلا بئله بیر آنلاشمایا قول چکمه ­نی اونا تکلیف ائدیر:
گؤتور اللریمی قوی سنین اولسون
آیاقلار بسیمدی یوللار کئچمه­یه…
دونیا، سنی سئون دوشمنین اولسـون
من چوخدان حاضرام سندن کؤچمه­یه
عمومیّتده آذربایجان شاعرلری­نین اورتاق اؤزللیکلری طبیعته، دوغایا وورغون اولماق، اوندان الهام آلماق و اونا جانلی بیر وارلیق کیمی، خطاباً دویغولارینی سؤیله­ مک­دیر، یئنه ده زماندان آسیلی اولاراق، بیر طرفدن شهر محیطی­ نین قاپالی و صنعتی یاشاییشی، باشقا طرفدن ایسه طبیعتدن مجبوری آیریلیق درویش­ده ده نوستالوژیک حسّلرین یارانماسینا سبب اولور، ایاغی طبیعته، محتشم داغلارا چیخارکن بو حسّلرینی طبعی­نین نیسگیل سازیندا سسلندیریر:
دیلی سؤزلـــــــو قوواقــــدیم،
بیر نغمهـــــ­کار بولاقــــــــدیم
داغــــلار، ســـــــنده قوناقدیم
گئدیـــــــرم ساغلیــــــقلا قال.
***
منیمکی، آ داغلار قسمتدن کئچیب
چتین بیرده گلـــم اوجاق اوستونه
باخیــــب سئوینمه­ییم دونیایا دیه­ر
آتا اوجاغیندان چیخان توســـتویه.
***
او داغین، دره­نین، آشیریملارین
دوشم یاغیشینا، دؤزم قارینــــــا
گؤزله­سه منی او داغـلار گؤزله­یر
بلدم دونیانین اعتبارینــــــــــا.
هر بیر دوشونجه ­لی، وطن­پرور، صلح­ سئور انسان کیمی دونیادا باش وئرن دؤیوشلر، ظلمکارلیقلار، باسقینلار، رئقیوندا اوز وئرن قانلی حادثه ­لر، خصوص ایله ده مسلمان و آذربایجان تورپاقلاری­نین اشغال اولونماسی درویشین ده جانینی درده گتیریر، مسئله ­یله علاقه­ دار تورپاغا اولان مناسبتینی آیری-آیری آچیلاردان نمایش ائتدیریر:
هؤرون منی دیوارلارا
دیوارلار اوجا گؤرونسون
***
اجل گلـــــــسه گؤندر منه
اؤلومدن یوخ خــــطر منه..
بئش آرشین تورپاق وئــر منه
بئزدیم کفنیمــــــدن آللاه.
بیر چوخ قونولاردا درویشین یارادیجیلیغینی آراشدیرماق اولار، شفاهی خلق ادبیاتیندان یارارلانماق، آذربایجان فولکلور خزینه ­سیندن اینجیلر سئچمک، تای­سیز آتا-بابا مثللریندن اوستالیقجاسینا بهره ­لنمک، بدیعی ایفاده ­لر یاراتماق شاعرین آخار، صمیمی شعرلری­نین باشقا اؤزللیکلری و گؤزللیکلریندن­دیر:
باشیم اوستدن، قارا بــولود
گل گئت گؤزلریم نم چکیر
ســـنی کولک قووور، منی
باسیب باغرینا غم چــــکیر.
***
بو قونولارین هر بیریندن کئچنده، ایلک نؤوبه­ ده شاعری شاعر ائدن سئوگی، سئوگی گوجودور، سئوگی­یه یاناشمایان، سئوگیدن آلیشمایان بیر شاعر تاپیلاسی دئییل، آنجاق درویشین شعرلرینده ناکام بیر سئوگی­نین ایزی دالغالانماقدادیر، بلکه اونو یازدیران دا، سئودیرن ده ائله بو ناکام سئوگی­دیر:
کؤنلومه سئـــــــــودان دوشنده
آللاهیـــــن تک صــــبری گلیر.
***
اییده­لر چیچه­یینی تؤکدو نئیله­دیم،
ســـــــــن آیریلاندا نئیلــــه­ییم؟
***
تکــــــجه سئونلردی آلیشیب یانان
اونلاردا هئچ زامان اوز-اوزه چیخمیر
سون سؤز اولاراق، درویش جوانشیر انسانی باشقا یاراتیقلاردان فرقلندیرن دانیشما قابلیّتی اؤزللیگینی خاطرلایاراق، انسان حیاتی­نین طالعینی همین “سؤز”ه باغلی بیلیر؛ گئرچکدن ده بئله ­دیر، بوتون داورانیشلار، اولایلار فکردن، دوشونجه­ دن دوغور، دوشونجه ­نی ایسه سؤز حیاتا کئچیریر:
سونوم سؤزدور، ایلکیم سؤزدور
واریم سؤزدور، مولکوم سؤزدور
قـــوروسام دا کؤکوم سؤزدور
من بیر سؤزدن گؤیه­ـــره­جم.
منبع: «دنیز» نشریه سی، نؤمره ۶۳ – نشر تاریخی ۲۹ آذر ۱۳۹۳
اکبر حمیدی علیار – تهران

دیدگاه بگذارید

اولین نفری باشید که نظر میدهید!

باخبر شدن از
avatar

wpDiscuz
سامانه پیامکی
اشتراک روزنامه

عزیزان علاقه مند به دریافت مرتب روزنامه ساقی آذربایجان از طریق پست می توانند با دفتر روزنامه تماس حاصل نموده و یا به سامانه پیام کوتاه روزنامه پیامک بفرستند.

اشتراک یکساله: 340 هزار تومان

اشتراک شش ماهه: 170 هزار تومان

ضمنا هزینه بسته بندی و ارسال از طریق پست بر عهده روزنامه می باشد.

درخواست اشتراک آنلاین

اشتراک پیامک

برای عضویت در خبرنامه پیامکی، اطلاعات خود را وارد کنید

اشتراک ایمیلی

نظرسنجی

وب سایت را چگونه ارزیابی می کنید؟

نمایش نتایج

Loading ... Loading ...
آذربایجانین گوزه للیک لری
پیگیری وعده مسئولان
  • از مسئولین محترم استان که وعده های آنان در این ستون پیگیری گردیده خواهشمند است توضیحات خود را در خصوص علل عدم تحقق وعده های داده شده جهت اطلاع شهروندان محترم و تنویر افکار عمومی به دفتر روزنامه ساقی ارسال فرمایند.

تصویر روز