یاخشی شعیر

کانت بویورور: یاخشی شعر روحو جانلاندیرماق اوچون ان قودرتلی واسیطه دیر.
میکائیل موشفیق بویورور:
قوخوسوز لاله دیر معناسیز شعیر
قانادسیز قوشدور خولیاسیز شعیر
گـؤزه ل سیز چالقی سیز مجلیسه بنزه ر
مضمون سوز آهنگ سیز اداسیز شـعیر.
بوگون ائل ایچینده شعیردن سؤز آچاندا، ائله بیل کی اینسانلارین گونده لیک بیر ایسته ییندن و یا احتیاجیندان دانیشیرسان. بو سؤزو بئله آچیقلاماق اولورکی خالقیمیز اینجه دویغولو و درین دوشونجه لی اولدوقدان، شعیرده یئنی بیر یاشاییش و یئنی بیر دونیا آختاریشیندا واردیرلار. ائله بو نه دنله بؤیله بیر خالقین اؤنونده باش اَییب و اونون ادبیاتی حاقدا سؤز آچیب دانیشماق لازیمدیر.
دییه بیلرم کی بیر شعیری دیققتله اوخوماق، دوشونمک و معناسینی اولدوقجا آنلاماق اؤنجه اینسانین کندی روحونا تایسیز تاثیر بوراخیر و اونا یئنی لیک باغیشلاییر.
میثال اوچون اولاراق:
دیلیمیزین و زنگین ادبیاتیمیزین اؤلمز شاعیری بختیار واهابزاده نین (خالق) شعرینده (خالقدان قووت آلان اؤزوده خالق اولار) بئیتینی اوخویاندا هر بیر وطن سئون و خالق سئون اینسان آرخاسیندا ان بؤیوک داغلاردان آغیر، اوجا و چوخ چوخ هوندور بیر قارای حیس ائتمیش اولور.
و یا دوغانی کاغاذلار اوسته ادبیات عالمینده اؤلومسوز بیر شرایطه چئویرن و ابدی لیک یاشیللیقدا ساخلایان صمد وورغونون (محبت ایلهاما چاغیریر منی) شعرینده هر بیر دویغوسال اینسان حیات لا، اینسانلیقلا، سئوگی و سایقی لا چوخ عظمتلی بیر باریشیقلیق دویور و حقیقت اولاراق بئله دئمک اولارکی بو سؤزلر او قده ر صمیمی و صداقتلی دیرکی یاشاماغین زنگین لشمه سینده بؤیوک رول اویناییر. و ائله بو دئییم لردی کی بشر حیاتینا اؤزه ل اؤیودلر وئریب و دوزگون عؤمور سورماغین یول لارینی بوتون اینسانلار اوچون گؤسته ریجی اولوب و سونا قده ر ائله بو یول لاردا گئتمکده اونلارا یاردیمجی اولوبلار.
بیلمه لی ییک کی هر بیر شعیری اوزون و یا قیسسا اولاراق، یالنیز و یالنیز ایلهام اودو، سئوگیسی و کسگین دویغو یارادیر. خیال لار، رؤیالار، اومیدلر، آرزولار، حسرت لر، آیریلیق لار، محبت لر، سئوینج لر، کدرلر، دوشونجه لر، اینسانلیق لار، دویغولار و هابئله اینسانلارین معنوی حیاتیندا اورتاق اولان هر بیر معنا، شعیرین یارادیجی لیغیندا ان بؤیوک رول اویناییر. و دئمک اولار شاعیرلیک یئنی بیر دوغوش دور. و بو دوغوش داکی شاعیر اینسان عادی آداملارین همیشه گؤردوکلرینده یئنی بیر معنا گؤرور. اونون اوره یی نین گؤزو داها اوستون گئرچک لره نفوذ ائدیر و اونون خیال قوشو داها یوکسک لره قانادلانیب گؤرونتو مئیدانینی گئنیش لندیریر و اینجه لیکله ان گؤزه ل لیکلری و یاخشی لیق لاری سئویب سئچیب شعیرده تجسّم ائدیر.
میکائیل موشفیق دئییر:
اولدوزلار فیکریمین چیراغبانی دیر
بولود خیالیمین کاروانی دیـــــــــر
سماکی حیسسیمین آشیانی دیـــــر
بؤیله بیر سمادان نئجه اَل چَکیـــم؟
بو شعیر اوخوناندان سونرا اینسان وجودوندا، فیکرینده یئنی دویغو و یئنی خیال تؤره دیر و بیرده شعیرین معناسی دویولان کیمی اینساندا یئنی اومیدلر حیس اولونور.
و یا:
آه من گوندن گونه بو گؤزه ل له شن
ایشیقلی دونیادان نئجه اَل چَــــــکیم؟
بو یئرله چارپیشان گؤی له اَل له شـن
دوستدان آشنادان نئجه اَل چَکـیم؟!!!
پارچاسینی اوخویاندان سونرا هر دوشونجه ده اولموش اولورسا اولسون هر بیر اینساندا گله جه یه دوغرو داها آیدین داها دورو عشق و سئوگیله قدم باسماغا یاردیمچی و اؤیره تیجی اولور. حیاتدا باشقا بیر سئوگی گه زیر، دوستلوقلارا گؤوه نیر، آشنالیق لارا آلقیش دئییب هامینی سئومه یه باشلاییر و کؤنول قول لارینی آچاراق بوتون اینسانلاری قوجاقلاماغا جان آتیر.
حسرتده قالیب، حسرتی اوزون ایللر یاشاییب و ان سون گونلرده حسرتی سیندیرماقدان اؤنجه تانری چاغریشینا سئوگی گؤسته ریب و فانی دونیانی ترک ائدن مدینه گولگون دئییر:
آچیلماز کؤنلوم گؤزوم
قورویار سؤز دنیــــزیـم
قالماز نیشانیم ایزیــــــم
محبت اولمایانـــــــــدا
دکتر اکبر رضایی

دیدگاه بگذارید

avatar
  Subscribe  
باخبر شدن از