یوخو

احمد یوخوسوندا گؤرورکی، گوزه‌ل بیر یاز گونودور. کندیرینی و بالتاسینی گؤتوروب مئشه‌یه یول‌لانیر. یول اوزاندیقجا اوزانیر. لاله‌لی دوزلردن کئچیر. جه- جه ووران قوشلار احمدین باشینا، چینینه قونوب، شن- شن اوخویورلار. لاله‌لیک قورتاریر. احمد آغ چیچک‌لر دنیزینه دوشور. بوردا اونو زر ناخیشلی کپنک‌لر سالاملاییر. زومرود یاماج‌لی تپه‌نی آشان کیمی، گؤزلری اؤنونده باشقا عالم جانلانیر. شاه قیزی قیرخ گوزه‌ل قیزلا سئیره چیخیب. او ظریف‌لییی‌ایله بوتون قیزلاردان سئچیلیر. قیزلار دوم‌آغ، شاه قیزی ایسه آل-الوان گئییمده‌دیر. قیزلارین آیاقلاری یئره ده یمیر، قو قوشلاری کیمین آستاجا قاناد چالیر،‌هاوادا سوزور و شاه قیزینی ظریـف
اللری اوستونده آپاریرلار. احمد حئیرانلیقدا بو منظــره‌نی
سئیر ائدیر؛ اؤزونو دونیانین ان بخته‌ور اینسانی سانیردی.
بیرده گؤردوکی قیزلارین دسته‌سی اونا چاتماقدادیر.
بیر گؤز قیرپیمیندا قارشیداکی ایری پالیت آغاجینا چیخدی. قیزلار لاپ یاخینلاشدی‌لار. احمد یارپاق‌لار آراسیندا گیزلندی. قیزلار پالیت آغاجی‌نین آلتینا چاتاندا، شاه‌قیزی اینجه سسله دئدی:
– یورولدوم! دینجلمک ایسته‌ییرم!
قیزلار اونو اللری اوستوندن یئره ائندیردیلر. یئل پازه‌لـــری
ایله اونو یئلله‌دیلر. شاه قیزی یاواشدان الینی الینه ووردو.
سن دئمه، بو رقصه ایشاره ایمیش. قیرخ قیزین رقصی باشلاندی. قیزلارین آیاق‌لاری سانکی یئره توخونموردو. رقص بیتن‌ کیمی، گؤی گورولدادی؛ ایلدیریم چاخدی؛ لئیسان باشلاندی. قیزلار بیر گؤز قیرپیمیندا یوخ اولدولار. احمد اؤزونو یاغیش‌دان قوروماق اوچون بیر قد‌ه‌ر آشاغی ائنیب، قوجا پالیدین آلتینا گیردی.
دور باشینا دؤنوم! گون،گون اورتا اولدو. اودونون واختی کئچیر. ایستی‌‌یه دوشه‌جک‌سن- دئیه، ننه‌سی اونو یوخودان اویاتدی.
احمد گؤزلرینی اوغوشدوروب، آیاغا قالخدی. ال- اوزونو یودو.
شور چوره‌ک باغلاماسینی و بالتاسینی گؤتوروب، یولا دوزلدی. بو خوش یوخوسونو ایسه اوزون زامان اونودا بیلمه‌دی.

علی صمدلی

دیدگاه بگذارید

avatar
  Subscribe  
باخبر شدن از