آغاج‌دلن‌لر نه اوچون آغاج‌لاري دؤیورلر

تاق، تاق، تاق…
– كيمدير؟
تاق، تاق، تاق…
– آیدين، بالا گؤر كيمدير؟ – آنا اوتاقدان چاغيردي.
آیدين ائیواندا، تزه‌جه قایيرديغي اوچورتماسينا, قویروق دوٍزلديردي. شيريق- شيريق کسديیي کاغيذلاري حالقالایارکن زينجير حالقالاری کيمي بير- بيرينه کئچيردی. آیدين اوچورتماسي‌‌نين قویروغونو زينجير‌لتمک ايسته‌یيردی. آیدين آناسي‌نين سسيني ائشيدرکن گئديب قاپيني آچدي، هئچ ‌کيمي گؤرمه‌دي. تزه‌دن ائیوانا قایيتدي. اوتوروب- اوتورماميش تزه‌دن قاپيني دؤیدولر: تاق, تاق, تاق…
عصبي‌ليکله یئنه ‌ده قاپي‌یا ساري گئتدي. بو دونه ‌ده کيمسه‌ني گؤرمه‌دي. اؤز- اؤزوٍنه بئله دوٍشوٍندوٍ کي، بلکه بير دجل اوشاق اونو ساريیيب اينجيتمک ايسته‌یير. قاپيني آچيق قویدو، ایه ر اورا یاخينلاشان اولسا اونو گؤره بيلسين.
تاق- تاق- تاق…
بو دؤنه قاپيدان چوخ اوزاقلاشماميشدي و بير‎ده‌کي قاپی آچيق‌ايدي، آنجاق یئنه کيمسه گؤرونمه‌دي.
حئیرته دالاراق تعجّوبلو- تعجّوبلو حیطين اورتاسيندا دایانميشدي.
آناسي اوتاقدان چاغيردي:
– قاپي دؤیه ن کيمدير؟
آیدين باشيني قالديردي, آناسينا جاواب وئرسين كي، بيردن گؤزلري حیطين قيراغينداکي یاشلي بؤیوٍک آغاجا دوشدو. آغاجين گؤوده‌سينده اوتورموشدو و اوتوردوغو گؤوده‎یي سورعتله ديمديک‌له‌یيردي. تاق- تاق سسي چيخاريردي. آیدين ائهمالجا قوشو آناسينا گؤستره‌رک دئدي:
– قاپيني دؤیه ن باخ بو قوشدور.
آنا پنجره‌دن ائشيیه باخاراق گوله- گوله دئدي:
– بو قوشون آدي آغاج ده لن‌دير، دوزدور بو تاپدالایان آغاج ده لن ایميش.
– آناجان نه اوچون بو آغاج‌ ده لن بئله بيزيم آغاجيميزي یارالایير- دئیه آیدين آناسيندان سوروشدو؟ من اينديجه گئديب اونو داش ایله وورارام بلكه، بيزيم آغاجيميزي یارالاماسين.
– یوخ آیدين ‌جان، بو ايشي گؤرمه, آغاج‌دلن‌لر هئچ واخت آغاج‌لارا زيیان یئتيرميرلر، بلکه اونلارين بو ايشي آغاج‌لار اوٍچوٍن چوخ دا فایداسي واردير. آغاج‌دلن‌لر برک و اوزون ديمديک‌لري‎ايله آغاج‌لارين قابيق‌لاريني دئشيب اونلارين آلتيندا گيزله‌نن زيیانکار قورد- قوش‌لاري اوجوب یئيیرلر. بئله‎ليكله اونلار آغاجلاري زيیانكار قورد- قوشلارين زيیانيندان قورتارارلار. من ايسه چوخ سئوينيرم ‌کي، بو آغاج‌ ده لن بيزيم ائوده‌کي آغاجي تاپيب و اونون ساغلامليغينا یارديم ائله‌یير.
آیدين دئدي: ايندي آنلاديم نه اوچون آغاج‌دلن‌لر آغاج‌لاري تاق- تاق تاققيلداديرلار.
– قريبه گوزه‌ل لطيفه‌دير- آنا دئدي: دئیه بيليرسن آغاج‌دلن‌لر نه اوچون آغاج‌لاري دؤیورلر.
– آغاج‌دلن‌لر قاپيني دؤیورلر كي، قورد- قوش‌لار ائشيیه چيخان کيمي اونلاري دوشوروب یئیيرلر.

About Author