مارچوبه

همیشه لیک بیتگی لردندیر.
ساقه لری نازیک و داغینیق دیر.
چوخلو واخت یارپاقا سایاق قوللاری ده ییشیلیر.
نارینجه چالمیش قیرمیزی یا بنفش رنگینده میوه لری اولور.
آنجاق آییق اولون کی میوه لری سمّ لی دیر و بیتگی نین بوتون یئرلری حساس لیق یاراداندیر. بو بیتگی نین چوخ نوعلاری واردیر.او جومله دن : تولکو قویروغو نوعو، گردی نوعو ، شویویدی نوعو و …
بو بیتگی نین ایسته کلری بئله دیر:
-سووارماق: بیتگی نین دیبی هئچ واخت قوروماسین و هفته ده اوچ گون سو وئریلسین.
-شئح: گونده اوستونه سو توزو سه پیلسین.
-ایستی: اون تا ییرمی دؤرد درجه ایستی بو بیتگی اوچون یاخشیدیر. هاوا ایستیله شدیکجه سو توزو سه پمه گی چوخالدین!
-ایشیق: گونه وه ر پنجره نین قاباغی بو بیتگی اوچون لاپ یاخشی یئردیر. چون ایشیغا چوخ نیازی واردیر.
-تورپاق: یاخشی تورپاق قاریشیغی بو بیتگی اوچون بئله دیر: پیت ماس ، قوم، باغچا تورپاغی. آنجاق گره کدیر تورپاغی کئشه لن اولسون.
-چوخالتماق: دیبدن آییرماق ایله و توخوم یولو ایله چوخالتماق مومکوندور.
گؤزله مه ک:
-اگر گؤرسه ز یارپاقلاری سارالیر بیلین کی : یا ایشیغی آزدیر یا بیتگی نین دیبی قورویوبدیر. هئچ واخت بیتگی نین دیبین قورو ساخلامایین!
-اگر گؤرسه ز یارپاقلار سارالیبدیر و اوستون شئیطان تورو آلیبدیر بیلین کی: یای دا سوسوز قالدیغینا گؤره « کنه » آلیبدیر و سمّ وورماقیله کنه لری آرادان آپارین!
-اگر گؤرسه ز یارپاقلار تؤکولور بیلین کی: یا سوسوزلوقداندیر یا ایشیغین آزلیغیندان یا ایستی نین چوخلوغونداندیر.

About Author