چؤل و بیر تورپاقلی جادا ساغدان سولا چکیلمیش. صحنه نین اورتاسیندا – جادا قیراغیندا – اوجا دیره ک واردیر، اوچ مفتیل اوندان کئچیر. پرده آچیلیر.
بیر کولونگون یئره چیرپما سسی یاخیندان قولاغا ده ییر. سس قیریلیر و نئچه آن سکوتلا کئچیر. سونرا بوغونتولو سس قولاغا ده ییر، سانکی چکیش ایله یئری دؤیورلر. سس قیریلیر.
آیاق سسی قولاغا ده ییر. کور بیر کیشی صحنه یه گیریر؛ ساغ الینده عصا، سول الینده بالاجا بیر چکیش. بؤیوک بیر توربانی تسمه یه تیکمیش و تسمه نی بئلینه باغلامیش. توربا، یارییا قده ر دولودور.
کور کیشی، دولو آغزیلا – گووه یه رک – گیریش یئرینده دایانیر. نئچه دؤنه عصاسی ایله یئره وورور و قولاق آسیر. بیر آددیم ایره لی گلیر. عصاسینی بتردن یئره ووروب قولاق آسیر. بیر آددیم ساغا ساری گئدیر. عصاسینی یئره وورور و قولاق آسیر. یئنه وورور و قولاق آسیر.
اوتورور، کولونگ ایله یئری قازیر و تورپاغی بارماقلارلا قیراغا چکیر. بیر تیکه قورو چؤره ک چیخاردیر، چؤره یی دیشلیر و قالانینی توربایا قویور.
آیاغا دورور. بیر آددیم قاباغا گلیر. یئری عصاسیلا وورور و قولاق آسیر. سولا ساری گئدیر، یئری وورور و قولاق آسیر.
اوتورور و یئری قازیر. بؤیوک بیر میخ تورپاقدان چیخیر. میخی اللریله اوینادیر. بیر آن فیکره دالیر و سونرا میخی قیراغا آتیر.
آیاغا قالخیر. بیر آددیم ایره لی گلیر. یئری وورور. قولاق آسیر، اوتوروب قازیر. بیر تیکه قورو چؤره ک تورپاقدان چیخاردیر، دیشلیر و قالانینی توربایا قویوب آیاغا قالخیر.
ساغا ساری گئدیر. یئری وورور و قولاق آسیر. بتردن وورور و قولاق آسیر. اوتوروب یئری قازیر. تورپاغی ایکی الیله ائشیگه چیخاریر. کیچیک دؤرد آیاقلینی تورپاق آلتیندان چیخاریر. دؤرد آیاقلینی الیله اووور. فیکره دالیر و سونرا اونو قیراغا قویوب آیاغا قالخیر.
آستا – آستا عصاسیلا یئره وورقولار ووراراق قاباغا گلیر. بتردن وورقو وورور و قولاق آسیر، اوتورور یئری قازیر، تورپاقلاری قیراغا چکیر. یئنه قورو بیر چؤرهک چیخاریر. اونو دیشله ییب و قالانینی توربایا آتیر و آیاغا قالخیر.
عصانی یئره ووراراق، باشقا یؤنه گئدیر، دایانیر. بتردن وورغو ووروب قولاق آسیر و فیکره دالیر. یئنه احتیاطلا یئری وورور. قولاق آسیر. شک ایله کئچیر. یئنه قاییدیب دایانیر. فیکره دالیر، قاییدیر و یئنه همان یئره وورور. امین اولمادان اوتورور، یئری قازیر، تورپاقلاری قیراغا چکیر و بیر مکتوبو یئردن چیخاریر. نامه نی اووُوشدورور. فیکره دالیرو یئنه الینه آلیب فیکره دالیر. مکتوبو قیراغا آتیر. تله سیک آیاغا قالخیر، یولا دوشور.
یئری چالیر. دایانیر و بتردن وورغو ووروب قولاق آسیر. اوتورور و یئری قازیر. قالین بیر ایپ تورپاقدان چیخاریر. ایپی اوووشدورور. فیکره دالیر. ایپی قیراغا آتیب آیاغا قالخیر.
بیر آددیم ایره لی گلیر. یئری دؤیور و قولاق آسیر. اوتوروب یئری قازیر. قورو بی تیکه چؤره ک ائشیگه چیخاریر، دیشله ییر و توربایا قویور.
آیاغا قالخیر و ایره لی گلیر. یئری وورور و قولاق آسیر. اوتوروب قازیر. یئردن بیر داش چیخاریر. داشی اووشدوروب قیراغا قویور.
آیاغا قالخیب ایره لی گلیر. یئری ووروب قولاق آسیر. اوتوروب قازیر. بیر تیکه چؤره ک چیخیر.
آیاغا قالخیب ساغا ساری گئدیر. وورغو ووروب دایانیر و فیکره دالیر. باشقا بیر یاواش وورغو ووروب یئنه فیکره دالیر. اوتوروب یئری قازیر.
تورپاقلاری قیراغا چکیر، بیر اؤلو کله سی ایله بیر مکتوب تورپاغین آلتیندان چیخیر. کله و مکتوبو اوووشدورور و قیراغا قویور.
آیاغا قالخیر و ایره لی گئدیر.
وورغو ووروب ایره لی گئدیر و صحنه دن چیخیر. وورغولارین سسی سونا چاتمایاراق اوزاقلاشیر.
نئچه آن سونرا، کولونگ سسی ائشیدیلیر. . . سسلر اوزاقلاشیر، اوزاقلاشیر داها چتین قولاغا ده ییر.
بیر – ایکی چرخلی سوره ن تاپیلیر.
دالیندا بیر یوک باغی اولاراق، تله سیک و هر زادا دقتسیز، فیشقا چالاراق گلیب کئچمه ده دیر، صحنه دن چیخیر.
یولدان گئچَن صحنه یه گیریر. ایستیر کئچسین آنجاق بیردن بیرینجی مکتوب دقتینی اؤزونه چکیر. مکتوبو گؤتوروب تعجوب و دقتله اوخویور. یئره و چئوره سینه باخیر.
سونرا یئنه مکتوبو اوخویور. سانکی مکتوبدا دستورلار واردیر: دؤرد آیاقلی و ایپی گؤتورور، تخته دیره یین آلتینا قویور.
دولانیر، دولانیر و بیردن میخی تاپیر.
مکتوبا باخیر و داش دالیجا یان – یؤره سینه گؤز سالیر. داشی تاپیب یئردن قالخیر.
گئدیر دؤرد آیاقلینین اوستونه و میخی داش ایلن تخته دیره یه چالیر. یئنه مکتوبو اوخویور: ایپین او باشینی گیرده له ییب، بتردن میخا باغلیر و دؤرد آیاقلیدان آشاغی ائنیر. مکتوبو اوخویور و یان – یؤره سینه باخیر.
ایره لی گئدیر و قورخاراق کله نی گتیریب دؤرد آیاقلینین اوستونه قویور و ایکینجی مکتوبو ایپین گیردهسینه قویوب تله سیک صحنه دن قاچیر.
قازیلمیش یئرلردن اللر ائشیگه چیخیر و التماس ائده رک یاواش – یاواش گؤیه قالخیر.
زیرزمیدن بیر کیشی و قادین آغلاماسی قاوزانیر، کسیلی – کسیلی، بوغاز آراسی، آغلاییب زارییرلار
پست های مرتبط
عرفانی دویغو
بایاتی
ادب ساحه سینده