گریپ فروت

بو میوه ده ، ویتامین « ب یک » و ویتامین « ث » چوخدور .
گریپ فروت تورش میوه لردن دیر و یاخشیدیر کی اونو آیری مرکباتلاریله بیرگه یئسینلر. بو میوه نی بؤلجه یین گره کدیر یئییلسین ، چونکی خاصیتین الدن وئریب تئز آجیلاشار.
بو میوه نین تورشلوغو ، تورش لیمودان آزدیر. آنجاق او کسلر کی تورش لیمودان فایدالانا بیلمه ییرلر اونون یئرینه گریپ فروت دان مئیل ائتسینلر.
گریپ فروت میوه سی نین ده یه رلی خاصیتلری بونلاردان عبارتدیر:
-بو میوه نین قیرمیزی و صورتی رنگینده کی نوعلاریندا « بتا کاروتون » واردیر کی بدن اونو آلیب « آ » ویتامینینه چؤنده ریر.
-بو میوه ده ده میر و کلسیوم تکی معدنی موادلاردان علاوه « آ » و « ب » ویتامین لری ده واردیر.
-بو یئمه لی ده بیر نوع موادلار واردیر کی اوره ک ناخوشلوقلاری و سرطان ناخوشلوقلاری نین قاباغین آلیر.
-پئشابا آپاراندیر.
-قیزیشمانی آزالداندیر.
-اگر بو میوه نی ناشتا یئسه ز فیشاری یئندیره ر .
-ناهاردان قاباق مئیل ائدیلسه « واریس » اوچون یاخشی درماندیر.
-بو میوه نی غذا دان قاباق یئمه ک ، کؤکه لمه گین قاباغین آلار.
-قره جییه ر اوچون فایدادیر. چون قانی پاکلایار.
-بو میوه ده آنتی اوکسیدان چوخدور.
-بو یئمه لی ، قره جییه رده اولان یاغ آسیدلرین آرادان آپاریر. آنجاق او کس لرین کی قره جییه رینده یاغ آسیدلری واردیر ، هفته ده اؤچ دؤرد ائوینه بو میوه دن فایدالانسینلار.
-بو میوه ده رینی یوموشاق و تمیز ساخلایار.
-بو یئمه لی ده سدیوم و یاغ یوخدور. اوندا اولان آنزیملر بدنین یاغین آرادان آپارماق اوچون فایدالی دیر و آریقلاماقا یاردیمدیر.
-تدقیقات نیشان وئریبدیر کی بو میوه ، « پروستات » سرطانی ، معده، باغارسیق، آغ جییه ر، ده ری و آغیز سرطانی نین قاباغین آلماقدا بؤیوک یاردیمدیر .
-بؤیره ک داشی و یبوست ناخوشلوغونون قاباغین آلار.
-هر بیر دارابی دا اوتوز گرم حدودیندا کربوهیدرات واردیر. قند ناخوشلوغو اولانلار دا بو میوه دن مئیل ائده بیله رلر.
-بؤیره ک پیوندی ووران ناخوشلارا بو میوه فایدادیر.
-آغ جییه رین شیشین آلار. صوبح ساعات اوندا و آخشام ساعات بئش ده مئیل اولسون.
-بو میوه نین طبعی سویوقدور.
-بو یئمه لی نین سویو ، بدنی سویوغون قاباغیندا داواملی ائدیر.
-بو میوه دن گوندوز یئمه ک ، میکروبلو یاراسی اولانلار اوچون ، فایدالی دیر.
-بو میوه اشتهانی تئز وورار و بدنی یونگول لتمه ک اوچون یاخشیدیر.
-بو میوه ، هضمی آسانلادار و معده ایله کیسه صفرانین ایشین یونگول له ده ر .
-بو یئمه لی بیر نوع آنزیملر یارادیر کی سرطانین جورلنمه گی نین قاباغین آلیر.
-بو میوه نی صوبح – ناشتا یئمه ک ، بدنین سمّ لرین آرادان آپارار.
-قانی دورولدار . بؤیره ک و قره جییه ری پاکلار.
-دارابی یئمه ک، « وَجئح » قانی نین قاباغین آلار.
-سه رین بیر میوه دیر و عطش لیگی آرادان آپارار.
-مفصل ناراحتلیقلارین آرادان آپارار.
-چون بو میوه ده آز کالری واردیر ، اؤزون آریقلادانلار اوچون یاخشی یئمه لی دیر.
بو میوه نین قندی پرتقال دان آزدیر.
-یوخو گتیره ن دیر.
ایسته سه ز راحات یاتاسیز یوخلامامیش دان قاباق بیر دارابی مئیل ائدین یا بیر استکان اونون سویوندان ایچین!
-بو میوه سویوق ده یمه نین قاباغین آلار و قیزیشمانی آلار.
-اونلار کی بؤیره کلری ، مثانه لری و صفرا کیسه لری داش جورله ییرلر ، دارابی یئسینلر .
چون بو میوه داشین جورلنمه گی نین قاباغین آلیر.
-اوره ک اوچون فایدادیر. دامارلارین کئهره سین اریده ر و قانین یاغین آزالدار.
-گریپ فروت بویلو قادینلاردا فیشارین چوخالماغی نین قاباغین آلار و واختیندا تئز دوغماق یا اوشاق سالماق خطرین آزالدار.
-بو میوه جنین و آنا اوچون فایدادیر. چون بو یئمه لی ده ویتامین ث و آنتی اوکسیدان واردیر. آمما حددیندن چوخ یئمه سینلر. هفته ده اوچ دؤنه کیفایتدیر.
-آییق اولون: بو میوه تورش اولدوغونا گؤره ، معده نین آسیدین چوخالدار . یاخشیدیر غذا دان قاباق یئییلسین.
-بو میوه نی بعضی داوالاریله بیر گه یئمه ک موشگول یارادار.
مثال اوچون: فیشار حبّین آتاراق بو میوه دن ده یئییلسه ، چون ایکیسی ده فیشاری یئندیره ر ، فیشار حددن آرتیق آشاغی گله ر و زیان یارادار.
آنجاق چوخلو داوالار واردیر کی بو میوه نین خاصیتی ایله بیرگه موشگول یارادیرلار.
یاخشیدیر کی داوا آتانا یاخین یا داوا آتماقدان سونرا دارابی سویو مئیل ائدیلمه سین و بو میوه دن یئییلمه سین!

About Author

saghi

See author's posts