یاز ماهنی لاریندان

خومار اولدو گؤزوم

مست اولوب، باده­ ی ناب آلدیم الیندن یاریمین،
یازماغا شعری، کتاب آلدیم الیندن یاریمین.
منده عادتدی کی مئی ایچمه­ رم اولمونجا مزه،
لبلرین، قالمادی تاب، آلدیم الیندن یاریمین!
مست اولوب یار ایله بیرلیکده، خومار اولدو گؤزوم،
وصله چاتماغا حجاب آلدیم الیندن یاریمین.
ال اوزاتدیم یاریمین شانه ­ده گولموش تئلینه،
اوزو گؤرسندی، نقاب آلدیم الیندن یاریمین.
دئسه ­لر هاردان، «عزیز»، سرخوش اولوب شعرین، دئه:
ایچمه ­رم اؤزگه شراب، آلدیم الیندن یاریمین.
عزیز حمیدی

About Author

saghi

See author's posts