شعر

آذربایجان

دشمنلر قـارشیندا محکـم دایـانان قهرماندیـر ائلی آذربایجانین بؤیوتمه یه ایگیت شانلی قهرمان باغلانیبدیـر بئلی آذربایجانین * جانیم قـوربان آذربایجان ائلینه تبریزین او گؤزه ل شیرین دیلینه من عاشقم بولبول کیمی گولونه عطیرلی دیر گولی آذربایجانین * فضاسیندا اسیر بهشتین یئلی یاشیل چمن لری قیرمیزی گولی اوخور بوداقلاردا شیدا بولبولی بزه نیبدیر چؤلو آذربایجانین * تاریخی […]

دشمنلر قـارشیندا محکـم دایـانان
قهرماندیـر ائلی آذربایجانین
بؤیوتمه یه ایگیت شانلی قهرمان
باغلانیبدیـر بئلی آذربایجانین
*
جانیم قـوربان آذربایجان ائلینه
تبریزین او گؤزه ل شیرین دیلینه
من عاشقم بولبول کیمی گولونه
عطیرلی دیر گولی آذربایجانین
*
فضاسیندا اسیر بهشتین یئلی
یاشیل چمن لری قیرمیزی گولی
اوخور بوداقلاردا شیدا بولبولی
بزه نیبدیر چؤلو آذربایجانین
*
تاریخی یاد ائدیر ارکین بناسی
آرتیقدیر ساوالان ، سهند بناسی
جنّتدن بخش اولوب گؤزه ل هاواسی
بئجه ردیر گولو لعل آذربایجانین
*
ایسته رم یوردومون ائلی شاد اولسون
آنا یورددا دائم عدل و داد اولسون
اوردا کئچن آشنا اولسون یاد اولسون
شاد یاشاسین ائلی آذربایجانین
*
خائن گره ک یوردوموزدان آزالسین
ظالیملرین کؤکـو دیبدن قازیلسین
ادبیّات اوجاغیندا یازیلسین
صفالی دیر دیلی آذربایجانین
*
« حسین زاده » دئییر آذر ایلی یم
قیزیلجا کندی نین آچیق دیلی یم
وار یئری هر گئجه گوندوز سؤیله یـم:
قهرماندیر ائلی آذربایجانین