دؤنک (dönek):”دؤنوم، دؤنگه، دؤنوش نوقطه‌سی”. سؤزجویو ماراغادا ائشیتمیشم. باشقا بؤلگه و یؤرهلریمیزده ده اولابیلر. دؤنک، آنادولو و ایستانبول آغیزلاریندا، فرقلی معنالاردا، یایقین‌دیر. “دؤنوم، دؤنگه” معناسییلا، کرکوک، آرتوین(یوسوف ائلی)، آنکارا(کشانوز)دا گؤرولور. سؤزجویون تؤرهییشی آچیق ساییلیر. دؤنمک فعلینه، مکان آدی یارادان –Aq اکی گتیریلیبدیر. بنزرلری قوناق، یوناق(yunaq) و چؤکک(çökek)دیر. قوناق اسکی تورکجه‌دن بری، تورکیه تورکجهسینده اولدوغو کیمی “رباط، کروانسرای، قوناق ائوی” آنلامی داشیماقدادیر. قوناق، آذربایجان‌دا، اسکی تورکجه‌دن بری وار اولان، قوْنوق(qonuq) “مهمان” کلمه‌سی‌نین یئرینه گئچیبدیر. قونوق کلمه‌سی‌نین اسکی فارسجادا دا اؤرنک‌لری وار؛ مثلا مولانا “آمدیم ای شاه! ما اینجا قُنُق/ ای تو مهماندار سکّان اُفق” دئمیش بیر بیتی‌نده. یوناق ایسه بوگون داهی، آنادولودا “حامام” معناسیندا یایقین ساییلیر و یونماق(yunmaq) <یوماق>یویونماق(yuyunmaq)/ یووونماق(yuvunmaq) فعلیندن گلدییی ده آچیق گؤرونور. چؤکک ایسه، لهجه‌لریمیزده، “باتینتی(فرورفتگی)، باتیق یئر، گودال” آنلامیندا واردیر و چؤکمک “باتماق، یئره دوشمک، دیز اوستو اوتورماق” فعلیندن گلدییی ایلک باخیش‌دا آنلاشیلیر.
About Author
پست های مرتبط
عرفانی دویغو
بایاتی
ادب ساحه سینده