ايكي قونشو كند واريدي. يـوخاري چاخماق بولاق، آشاغي چاخماق بولاق. نئچه ايل قاباق دولو ياغيب بوتون اكيني آرادان آپاردي. بئله اولاندا هر ايكي كندين آداملاري شهره كؤچوب، كندي بوراخديلار. كندلر بوش قالدي. ايكي قارداش داغداكي ماغارادان آشاغي ائنيب، كنده گلديلر. قارا آيي يوخاري كندده، ساري آييدا آشاغي كندده ساكين اولدولار. آييلار- بئكار قالماياق- دئـيه، زميلري شوخوملايـيب بوغدا اكيرديلر. آييلارين ايشلمهسي بولودلارين خوشونا گليردي؛ بونون اوچون اونلارين زميلريني بير آن سوسوز قويموردولار..
بو ايل ده گؤم- گؤي زميلر يـئل اسديكجه، دنيز كيمي دالغالانيردي. گونش زميلري گؤروب وجده گلدي. او، قيزيل شفقلريله بوغدالاري بركيديب، ساپ- ساري رنگه بويادي. بير گون قارا آيي يـئتيشميش سونبوللري يـيغيب، خرمنه گتيردي. سونرا سونبوللري دؤيوب، سامانيني آيـيردي. ساپ -ساري تميز بوغدالاري تليسلره دولدوروب، بير- بير آنبارينا داشيدي. ائرتهسي گون آنبارا گيريب، بوغدا تليسلريني سايماغا باشلادي. او، سول الينين بارماقلاريني بير- بير ساغ اليله بوكوب، تليسلري سايدي. تليسلرين سايي، اونون سول الينين بارماقلارييلا دوز برابر ايدي. قارا آيي سئوينجيندن اوجادان بؤيـوردو، آخي بو ايل اونون محصولو اؤتن ايلدن ايكي تليس چوخ اولموشدو. قارا آيي بو قرارا گلدي كي، تليسلرين بيريني قارداشينا پاي وئرسين. قارا آيي فيكيرلشدي كي، بو ايشي گيزليجه گؤرسه، داها آرتـيق قارداشينين سئوينجينه سبب اولار. بئله اولاندا گئجه ياري يـوخودان دوروب، تليسلرين بيريني دالينا آليب يـولا دوشدو. او، تليسي آپاريب، قارداشينين آنبارينا قويـوب، سسسيز- سميرسيز اؤز كندينه قاييتدي. او گئجه سحرهدك بال كيمي يوخويا گئتدي.
صاباحي گون آنبارا گيرنده، قارا آيي گؤزلرينه اينانمادي! اونون تليسلري يئنه ده بئش دنه اولموشدو. او، دؤنه- دؤنه سول الينين بارماقلاريني بير- بير قاتدايـيب، تليسلري سانادي. تليسلر دوز بـئش دنه ايدي. بو ايش يقين جين- شيطانين ايشيدير- دئـييب، قارا آيي فيكره گئتدي. ايندي كي، بئلهدير، هر گون بير تليس قارداشيما آپارارام، قوي جينلرده هر گئجه بير تليس منه گتيرسينلر- دئدي. يـئنه گئجه ياريسي بير تليسي دالـينا آليـب، سسسيزجه آپاريب قارداشينين آنبارينا قويوب، قاييتدي. قارا آيي گون چيخاركن آنبارينا باش ووردو. يئـنه ده جين- شيطانلار بير تليس بوغدا اونون آنبارينا گتيرميشديلر. اونا داها يـقين اولدو كي، بو ايش بيزدن يـئييلرين ايشيدير. اوچونجو گئجه، يـئنه قارا آيي بير تليسي سئوينجك دالينا آليب يـولا دوشدو.
هله كنددن چوخ اوزاقلاشماميـشدي كي، يـولون اورتاسيندا بير قارالتي گؤزونه ساتاشدي.
– يـقين جينلردير- دئـييب، بير داشين داليندا گيزلندي. قارالتي گئت به گئت اونا ياخيـنلاشدي. بيردن اؤز قارداشي ساري آيـيني گؤروب، ائشييه توللاندي. ساري آيينين دا، بير بوغدا تليسي داليندايدي. ايكي قارداش يـولون اورتاسيندا بير- بيريني باغرينا باسديلار.
About Author
پست های مرتبط
ادای احترام سران قوا و مسئولان ارشد کشور به پیکر امام شهید
تصاویر دیده نشده از شهید آلهاشم
کاریکاتور روز/ کنترل تخلفات ساختمانی در تبریز به کمک پهپاد