هاوا پاييز لاميشدی. يارپاق‌لار بير-بير ساراليب، سولورکن ا‌للری آغاجين قوينوندان اوزولوردو.
خزل‌لر آياق آلتیندا قالاراق، گليب-گئده‌نه دئيينيرديلر. پاييز قوش‌لاری ایسه اؤزلرينی اويان-بويانا چيرپيب، قورو كوللاردان آيريليب، گونش باغچاسينا گئتمه‌یه، ساچ‌لارينی يولوب، یئره تؤكوردولر.
كول‌لار دا اونلارا قارا يئلين گلمه‌یيني و بونلاری گونش باغچاسينا آپارماسينی وعده وئريردی.. ياواش-ياواش آغاج‌لار اسمه‌جه‌يه دوشدولر و قورخولاريندان اولوب-قالان يارپاق‌لاريني دا تؤكدولر. بالاجا قاسيرغالار بورجودا-بورجودا قارا يئلين گلمه‌یينی موشدولوق وئرديلر.
گئتمك زاماني يئتيشمیشدی. قارا يئل قانادلارينی آچميشدی و پاييز قوش‌لاری تلسه-تلسه قونوردولار قانادلارينا و ماوی گؤيه ساري چكيليرديلر.
اونلار گؤيون ماويليیينده ساده‌جه اؤزگورلویو دوشونوردولر. هردن ده گؤزلری ساتاشيردی اونلارلا ویداعلاشان یئرده‌کی کول‌لارا.
پاييز قوش‌لاری گئتديكجه گؤزدن ايتدیلر. هيجان هامیسی‌نين روحونو بوروموشدو.
قارا يئل ده دايانمادان قاناد چالیردی و سينيرلاری كئچيردی. پاييز قوش‌لاری سئوينجك قارا يئلين قانادلاري نين آراسيندا يئره باخيب، نه قده ر گؤی‌لره قالخدیقلارینا گووه‌نيرديلر. بو آندا گؤزلری ساتاشدی يئرده بيتن قارا كول تيكان‌لارينا. تیکانلی کول‌لار يئل‌لرين قانادلارينی يارالاییب، پاييز قوش‌لاری نین چوخونو توتموشدولار.
قارا يئل بير آز دا اوجالدی. کول‌لاردان اوزاقلاشماق ایسته‌ییردی.
بو يوكسلمك آلچاق بولودلارين چوخونو قيسقانديردی. اونلار قاش- قاباقلارينی ساللاييب، شيمشك‌لریله پاييز قوش‌لارینین اورک‌لرینی اوزوردولر. آنجاق يئر- گؤيو پاييز قوشولا دولو ایدی.
كولا ايليشن كيم، باتداغا باتان كيم، آمما اونلارين هامیسی‌نين تکجه آماجی گونش باغچاسينا چاتماق ايدی.
بو قورخونج سينيرلاریدان سونرا، قارا يئل كي قاناد وورماقدان يورولموشدو ياواش-ياواش يئره ياخينلاشدي بير آندا هاي دوشدو گونش باغچاسي، گونش باغچاسي گؤرونور، پاييز قوشولاری ال-آياغا قالديلار و سئوينديك لريندن يئرده – گؤيده دايانماديلار.
گونش باغچاسي اوزاقدان ره به ره سوسنميشدي، اورادا هر بير زاد دوم -دورو گؤرسه نيردي. همه شه باهار آغاجلاري نين يارپاقلاري پاييز قوشولارين گؤزلريني قاماشديريردي .
آمما گونش باغچاسي داها قاباقكي كيمي دئييل دير. اطرافينا مفتيل دن بير تور چكميشديلر كي قارا يئلين قانادلاريندا او گوج قالماميشدي كي او سينيري آشسين.
اونا گؤره گلن پاييز قوشو اؤزونو چيرپيردي تورا، و تورون دليكلري ده او قدر كيچيك ايدي كي اونلاردان سووشانلاريندا له له ك لري يولونوردو و اوچماغا قادير دئييل ديلر و تورون بو اوزونده قالانلار دا ساده جه گونش باغچاسي نين حسرتيني ياشاييرديلار.
فقط پاییز قوشولاردان نئچه سی کی اوچماغا اینانمیشدیلار ائله یه بیلدیلر گونش باغچاسینا چاتسینلار.
پاييز قوشو: يئل قووان، قاصدك
قاسيرغا: گيجه لك
اؤزگورلوك: آزادليق
سوسنمك: بزنمك
قيسقانماق: گؤزوگؤتورمه مك
تهليكه لي: امنيت سيز
About Author
پست های مرتبط
عرفانی دویغو
بایاتی
ادب ساحه سینده