اوزوک قاشی

بیر گون یونس نقاش قورخولو و هووشنه لی اوره ک ایله امام هادی(ع) حضرتلری نین یانینا گئدیب دئدی: ای منیم آغام! منیم عائله م اوچون یاخشی لیق ایسته!
امام(ع) بویوردو: نه خبر اولوبدور؟! یونس دئدی : تصمیم دوتموشام بوردان گئده م.
امام هادی(ع) بیر حالدا کی گولومسوله نیردی بویوردو: نییه ؟!
یونس دئدی: موسی بن بغا (بنی عباس حؤکمرانلیغی نین بؤیوکلریندن بیریسی ) منه بیر ده یه رلی اوزوک قاشی تاپیشیردی و مندن ایسته دی اونون اوستونده نقش قازام. من ایشله ینده قاش ایکی یئره بؤلوندو. گره کدیر صاباح اونو تحویل وئرئیدیم.
بو حال دا صاباح یا منه مین شاللاق ووراجاقلار یا اؤلدوره جکلر.
امام هادی (ع) حضرتلری بویوردو: ائویوه قاییت، صاباح خئیر بیر زاددان باشقا ائشیتمه یه جکسن!
صاباح گئنه یونس ، قورخولو و تیتره ک حالدا امامین قوللوغونا یئتدی و بویوردو: مأمور گلیبدیر اؤزوک قاشین ایسته ییر.
امام(ع) بویوردو: قاییتگیله ! خئیردن باشقا هئچ زاد گؤرمه یه جکسن!
یونس سوروشدو: ای منیم آغام! اونا نه دئییم؟
امام(ع) گولومسوله نیب بویوردو: قاییت و هر نه دئدی اونا قولاق آس! خئیردن باشقا بیر زاد گؤرمه زسن!
یونس گئتدی ، بیر آز سونرا گولوش دوداقلاریندا ، قاییدیب حضرته بویوردو: ای منیم آغام مأمور دئییر، کنیزلریمین بیر بیرلریله میرتلاری واردیر ، آیا او قاشی ایکی یئره بؤله بیله رسن کی بیزده سنی یوخسوللوقدان قورتاراق؟
امام هادی(ع) سئوینجک گؤیه ساری باخیب بویوردو: « ای تانری! حمد و تعریف، یالنیز سن اوچوندور و تشککور ائدیرم کی بیزی او آداملارین ایچینده قرار وئریبسن کی سنی ایسته ییب تعریف ائدیرلر.

About Author

saghi

See author's posts