قان

قارلار اَری میری. شاختا بوران آداملارا کار سالمیری . ککلیک لرین قاققیلتی سی آغا بورونن تپه لردن قولاغا گلمیری .
آدام لاری گؤروب قاققیلتی لارینی کسیب لر . توفنگ لر آما قاققیلدیرلار .
ککلیک لر سس لرینی کسسه لرده ، آلا قورا رنگ لری و جیل لیک لری نن قارلارین آغ مخمر لری اوسته گؤزه چارپیرلار .
چوخ ائولرده بو گئجه ککلیک لر قابلامالار دا ، قایناماق دا اولاجاق لار .
اینسان ، قارنی اوچون هر رذالته اَل آتیر . یارالی قوشلارین باشلارین اوزوب قانلاری سوزه سوزه چی یین لریندن آسلاییب کئف ائده – ائده قارلارا ایز سالیرلار .
ککلیک لر اینسانلاردان قاچسالاردا یئنه گئدیب اونلاری تاپیرلار .
ککلیک اوووندایدیم .
گؤزلریم ایلیم – ایلیم اونلاری آختاریردی .
آما ته تی یه چکمک بیله مه ندنسه عذاب گلیردی . بو گون بیله مه نم نه اولموشدور.
دونیانی شعر کیمی لطیف گؤروردوم .
اونلارین گؤزه ل لییی کؤنلوم ده سئویملی بیر جوشقو یارادیردی .
نه محکوم ایدیلار نه سوچلو . هئچ بیر اتهام لاری یوخ ایدی .
پوسقودا یاتارکن اؤزومو اعدام لیق اولان آداملارین سینه سینی دئشه ن عسگر لر کیمی حیس ائدیب توفنگیمی یئره قویدوم .
اونلاری قاچارکن قووالاماق ایسته دیم . نئچه سی کی منیم کیمی اووا چیخمیشدیلار منی گؤره رکن هویا باسیب یاری یولدان قایتاردیلار . قان تؤکمه یین اونلارا باشقا بیر لذتی وارایدی .
شیکاردان داد داماغ آلیب قالانمیش تونقال لاردا قیزیشماق شاختانین کسکین لی یینی آزالدیردی و بیر سیرا آداملار هدف سیزجه سینه گولله آتیردیلار . هم مه شه اَلی دولو قاییداراق ، بو دفعه اَلی بوش دؤنمه ییم اؤزوموده حیرته دالدیرمیشدی .
گونش ساریمتیل ایشیقینی بولوتلار آلتیندان سوزدوره رک ، یول اوسته عجیبه بیر قالابالیق یاشانیردی . اؤنه گئدیب آددیم لاریمی ایتیلده رک ، قانا بَلَشمیش بیرینی گؤردوم .
ناغافیل بیرگولله اونون گیژگاهینا توخونوب یومروق بویدا باشیندا یئر آچمیشدی .
او اؤزوده شیکارچی ایدی . بیله سینی یاخشی تانیردیم .
حتتا ائوی نین دامینا اوچ جئیرانین بورنوزونو تیکمیشدی . جماعت ژاندارمری یه خیر وئرسه لرده هله گلیب چیخان اولمامیشدی . اَل ده توفنگی اولان بیر – بیر اَکیلیردی . و اونون باشیندان آخیب دونان قان ، باشی اوزولموش ککلیک لرین قانلی بدن لرینی قانا بولامیشدی .
قانین ، قانین لا فرقی یوخ ایدی .

About Author

saghi

See author's posts